Filifili le Malamalama
Saunia e Elder Vern P. Stanfill
O Le Fitugafulu
E tatau ona tatou filifili e gauai atu i fautuaga faaperofeta, ia iloa ma faatino uunaiga faaleagaga, ia usiusitai i poloaiga a le Atua, ma ia saili atu i faaaliga faaleatagata lava ia.
E lei leva tele atu, sa tonu ai ia i ma’ua ma lo’u toalua o le a ma matua asaina atoa le matagofie o se eria e latalata i lo matou fale i sisifo i matu o Monatana. Sa tonu ia i maua e vili a ma uila i le Alasopo o Hiawatha, o se auala nofoaafi na suia e avea ma ala ‘alo mo uila lea e sopoia ai Atumauga Papa matagofie i le va o Monatana ma Idaho. Sa ma faamoemoe mo se aso fiafia e mafuta ai ma uo lelei, ma olioli i le matagofie faalenatura o le eria.
Sa ma iloaina o le a aofia i le ma tietiega i le ala ‘alo matagofie e 15-maila (24 km) ia alalaupapa o nofoaafi e ui atu i vanu vaapiapi tifato ma ana uumi e tipi atu i atumauga lafulafua. O lea sa ma tapenaina ai i ma’ua lava ma moli sa fusi i o ma pulou ma uila.
Sa lapataia i maua e i latou na muamua ia i ma’ua e pogisa ia ana ma sa manaomia ni moli matua malolosi lava. A o matou faapotopoto i luma o le faitotoa maa tele o le Taft Tunnel, sa faamalamalama mai e se tausifanua ia nisi o mea matautia i le ala ‘alo, e aofia ai ni ‘autu i autafa, o ni puipui talatala, ma le matua pogisa lava. I le le onosai, sa ma agai atu i le ana. I nai minute talu ona vili atu a ma uila, sa ufitia i ma’ua e le pogisa na muai faailoa mai. O moli na ou aumaia sa mautinoa le le taitai ona lava, ma e lei pine ae soloatoa i le pogisa. Na faafuasei ona ou lagonaina le popole, le mautonu, ma ua le mau manatu.
Sa ou maasiasi e faailoa lo’u atuatuvale i a’u uo ma le aiga. E ui o au o se tietie uila ua i ai le poto masani, ae o lea ua ou lagonaina nei e pei ou te lei tietie lava i se uila. Sa ou tauivi e tumau ai a o faateleina lo’u fememeai. Mulimuli ane, ina ua uma ona ou faailoa atu lo’u faaletonu i e na i ou autafa, sa mafai loa ona faalatalata atu i se malamalama e sili atu ona malosi a se uo. O lo’u faalatalata atu ia te ia ma faalagolago i ai mo se taimi i lana sulu, ma le malamalama tuufaatasi a le matou vaega, sa matou agai atu ai i le loloto o le pogisa o le ana.
Ina ua mavae se taimi sa foliga mai ua umi tele, sa ou vaaia sina mata o le malamalama. Toetoe o le taimi lava lea, sa amata ai ona ou lagonaina le toe faamautinoaina o le a lelei mea uma. Sa faaauau pea ona ou agai atu i luma, ua faalagolago i le malamalama a a’u uo ma le mata o le malamalama ua faatupulaia. Sa faifai malie ona toe foi mai lo’u talitonu mautinoa a o faateleina le malamalama. A o lei taitai ona tau i le iuga o le ana, sa ou le toe moomia le fesoasoani a a’u uo. Sa mou atu le atuatuvale uma a o matou vili faatopetope atu i le malamalama. Sa ou lagonaina le toafilemu ma toe faamautinoa ai ae matou te lei oo atu i le atoaga o le mafanafana ma le matagofie o le taeao.
Ua tatou ola i se lalolagi o le a tatou feagai ai ma luitau o lo tatou faatuatua. Atonu tatou te lagonaina le talitonu mautinoa faapea ua tatou saunia e feagai ma na luitau—ae iloa ane e lei lava a tatou tapenapenaga. Ma e pei foi ona sa lapataia ai au e la’u uo e uiga i le pogisa, ua lapataia ai foi tatou i le taimi nei. Ua uunaia i tatou e siufofoga faaAposetolo e saunia i tatou lava i le malamalama mamana o le malosiaga faaleagaga.
E faapena foi, atonu tatou te lagonaina le maasiasi, le toafilemu, pe fememeai faaleagaga pe a tatou fetaiai ma se luitau o lo tatou faatuatua. O le masani lava, o le loloto ma le malolosi o nei lagona o le a faalagolago i lo tatou tali atu i ai. Afai tatou te le faia se mea, masalosalo, faamaualuluga, ma iu ina ono tata’iese i tatou e le liliuese mai le malamalama.
Sa ou aoaoina mai ni nai lesona taua mai lo’u aafiaga i le ana. O le a ou faasoa atu ni nai mea.
Muamua, po o le a lava le loloto o le pogisa o le masalosalo, tatou te filifili po o le a le umi ma pe o le a le tele tatou te faatagaina ai e faatosinaina i tatou. E tatau ona tatou manatua le tele o le alofa o lo tatou Tama Faalelagi ma Lona Alo ia i tatou. O le a La le tuulafoaiina lava i tatou, pe La te faatagaina foi i tatou ia toilalo pe afai tatou te sailia la La’ua fesoasoani. Manatua le mea na oo ia Peteru i galu matamataita o le Sami o Kalilaia. A o lagona e Peteru le pogisa malulu o siomia ai o ia, sa vave ona ia faailoa lona mafatia ma sa filifili ai i lena lava taimi e valaau atu mo se fesoasoani. E lei fesiligia e ia le mana o le Faaola e laveai ai o ia; sa na ona ia valaau atu lava, “Le Alii e, faaola ia te au.”1
I o tatou olaga, o le aao faaloaloa o le Faaola atonu e aumai i se fesoasoani a se uo faatuatuaina, taitai, po o se matua alofa. E ui ina tatou tauivi i le pogisa, ae e leai se mea e sese ai le faalagolago mo sina taimi i le malamalama o i latou o e alolofa ia i tatou ma mananao faamaoni e fesoasoani ia i tatou.
A tatou mafaufau totoa i ai, aisea o le a tatou faalogo atu ai i leo e leai ni foliga, o le au faitio o e o i le fale tele ma le ateatea o o tatou taimi ma faatuatuanai ai i aioiga a i latou e alolofa moni ia i tatou? O nei tagata masalosalo e sili ia i latou le faataumaoia o i tatou nai lo le siitia ae ma faamaasiasia i tatou nai lo le faagaeetia. O a latou upu amuamu e mafai ona elieli i o tatou olaga, e tele lava ina ala mai femilosaiga faaeletonika pupuu ma mo sina taimi ma pala mo’i ai ma faaumatia ai lo tatou faatuatua. Pe o se atamai ea le tuu o lo tatou soifua manuia faaleagaga i lima o ni tagata e le masani ai? Pe atamai ea le maua mai o se malamalamaaga mai i e e leai se malamalama e foai atu po o e foi e nanaina a latou mataupu mai ia i tatou? O nei tagata taitoatasi faalilolilo, pe ana fai e o mai ma le faamaoni ia i tatou, semanu e le tuuina atu lava i ai se minute o o tatou taimi, ae talu ai ua latou faaaogaina faaimamago ala o faasalalauga faaagafesootai, ma natia ai mai le suesueina, ua latou maua ai se pule e talitonuina ae le tatau ai.
O la tatou filifiliga e gauai atu ia i latou o e ulagia mea paia o le a tuueseesea ai i tatou mai le malamalama laveai e maua ai le ola mai le Faaola. Na tusia e Ioane: “Ona toe fetalai atu lea o Iesu ia te i latou, ua faapea atu, O a’u nei o le malamalama o le lalolagi; o le mulimuli mai ia te au, e le savali o ia i le pouliuli, ae ia te ia le malamalama o le ola.”2 Manatua, o i latou e alolofa moni ia i tatou e mafai ona fesoasoani ia atinae lo tatou faatuatua.
E pei lava ina ou maasiasi i le ana, tatou te ono maasiasi foi e fesili atu mo se fesoasoani pe a tatou masalosalo. Atonu e tasi i tatou ma isi o e ua vaavaai atu mo se malosiaga, ma o lea ua tatou moomia nei se fesoasoani. Pe a tatou iloaina lena malamalama ma le toafilemu e mafai e le Faaola ona tuu mai ia i tatou e matua taua tele ona galoma atu ona o le faamaualuga, o lea e mafai ona fesoasoani ai taitai musuia o le Ekalesia, matua, ma uo faatuatuaina. Ua latou saunia e fesoasoani ia i tatou mo le mauaina o faamautinoaga faaleagaga o le a puipuia ai i tatou mai luitau o le faatuatua.
Lona lua, e tatau ona tatou faalagolago i le Alii ina ia atinae le malosiaga faaleagaga i totonu o i tatou lava. E le mafai ona tatou faalagolago i le malamalama o isi e faavavau. Sa ou iloaina o le pogisa i le ana o le a le tumau ai pe afai ou te vilivili pea i autafa o la’u uo ma faatasi ai ma le saogalemu o le vaega. Ae o lo’u faamoemoega o le mafai lea ona ou agai atu pea o a’u lava ia i le taimi ou te vaaia ai le malamalama. Ua aoao mai i tatou e le Alii, “Faalatalata mai ia te au ma o le a Ou faalatalata atu ai ia te outou; saili mai ia te au ma le filiga ma o le a outou maua ai au; ole mai, ma o le a outou maua ai; tuitui mai, ma o le a tatala atu ai ia te outou.”3 E tatau ona tatou galulue, ma le faamoemoe o le a faataunuu e le Alii Lana folafolaga e sii ae i tatou mai le pogisa pe afai tatou te faalatalata atu ia te Ia. Peitai, o le fili, o le a taumafai e faatalitonu i tatou faapea tatou te lei lagonaina lava le faatosinaga a le Agaga ma o le a sili atu ona faigofie pe a tau a ina tuu le taumafai.
Ua fautuaina i tatou e Peresitene Dieter F. Uchtdorf “ia muamua masalosalo i ou masalosaloga ae e te lei masalosalo i lou faatuatua.”4 I la’u uarota, sa fai mai talu ai nei se alii talavou, “E i ai mea sa ou lagonaina e le mafai ona faamatalaina i se isi lava ala vagana ai e a le Atua.” O se amiosa’o faaleagaga lea.
Pe a feagai ma ni fesili pe faaosoosoina ia masalosalo, e tatau ona tatou manatua ia faamanuiaga faaleagaga ma lagona sa tuia ai o tatou loto ma olaga i aso ua mavae, ma tuu atu lo tatou faatuatuaga i le Tama Faalelagi ma Lona Alo o Iesu Keriso. Ua faamanatu mai ia te au le fautuaga na tuuina mai i se viiga e masani ai: “Ua le o i ai o sou pona, Ua matou iloa lou lelei.”5 O le faatuatuanai ma faagalogalo ia aafiaga faaleagaga ua mavae, o le a vavaeese ai i tatou mai le Atua.
O la tatou tulimataiga o le malamalama o le a faateleina e lo tatou naunau e faailoa pe a susulu mai i o tatou olaga. O loo faamalamalama mai e tusi paia o ona po nei le malamalama ma ua aumaia ai se folafolaga ia i latou o e taliaina: “O le mea e mai i le Atua o le malamalama lea; ma o ia o le e mauaina le malamalama, ma tumau pea i le Atua, e mauaina le malamalama atili; ma o lena malamalama o le a tupu susulu malamalama tele pea lava pea seia oo i le aso e atoatoa ai.”6 E faapei lava ina sa matou vilivili atu pea agai i le malamalama, o le tele o lo tatou naunau atu, o le atili ai foi lena ona malamalama Lona tosinaga i o tatou olaga. E pei o le malamalama i le iuga o le ana, o Lana tosinaga o le a aumaia ai ia i tatou le talitonu mautinoa, naunautaiga, mafanafana, ma—o le mea e sili ona taua—o le mana e iloa ai o loo soifua o Ia.
Lona tolu, e leai se pogisa e matuai mafiafia tele, matuai taufaamatau, pe matuai faigata faapea e le mafai ona faatoilalo e le malamalama. Na aoao mai talu ai nei e Elder Neil L. Andersen: “A o faateleina le leaga i le lalolagi, o loo i ai se mana faaleagaga e faapaleni ai mo e amiotonu. A o see ese atu le lalolagi mai ona taula faaleagaga, ua saunia e le Alii le ala mo i latou o e saili atu ia te Ia, ma ofo atu ai se faamautinoaga sili atu, faamautuuga sili atu, ma se talitonuga maumaututu sili atu i le itu faaleagaga o loo latou faimalaga ai. O le meaalofa o le Agaga Paia ua avea ma se malamalama susulu atili i le tafa o ata ua fotu mai.”7
Uso e ma tuafafine, e lei tuulafoaiina lava i tatou ina ia faatosinaina e manatu ma suiga uma i uiga o le lalolagi, ae ua ia i tatou le mana e filifili ai le talitonuga i lo le masalosalo. Ina ia tatou maua le mana faaleagaga folafolaina e faapaleni ai, e tatau ona tatou filifili e gauai atu i fautuaga faaperofeta, ia iloa ma faatino uunaiga faaleagaga, ia usiusitai i poloaiga a le Atua, ma ia saili atu i faaaliga faaleatagata lava ia. E tatau ona tatou filifili. Tau ina tatou filifili ia le malamalama o le Faaola. I le suafa o Iesu Keriso, amene.