Ua I Ai Iinei e Auauna Atu mo se Mafuaaga Amiotonu
Saunia e Carol F. McConkie
Fesoasoani Muamua i le Au Peresitene Aoao o Tamaitai Talavou
Tau ina ia tatou filifili e auauna atu i se mafuaaga amiotonu o ni sui lotototoa a lo tatou Alii o Iesu Keriso.
Ou te faafetai ua mafai ona tatou faatasi ma tamaitai faamaoni e pei o Lisa—le tamaitai i le ata vitio—o e alolofa i le Alii ma auauna atu ia te Ia, e oo lava i le lotolotoi o o latou lava tofotofoga. O le tala ia Lisa ua faamanatu maia ia te au le tatau ona tatou fealofani ma vaai i le matagofie o le agaga i totonu o isi. Na aoao mai le Faaola, “Ia manatua ua tele lava le taua o agaga i le silafaga a le Atua.”1 Pe 8 pe 108 o tatou tausaga, e “pele i [tatou taitoatasi] i [Lana] silafaga.”2 E alofa o Ia ia i tatou. O tatou o afafine o le Atua. O tatou o uso i Siona. Ua i ai se tatou natura paia, ma e i ai se tatou galuega mamalu e fai.
I le aluga o le taumafanafana sa ou asia ai se tina talavou lalelei o ni fanau teine. Sa ia faasoa maia ia te au lona lagona e manaomia e o tatou tamaitai talavou se mafuaaga, se mea e fesoasoani latou te lagona ai le taua. Sa ia iloaina e mafai ona tatou iloa lo tatou taua faaletagata lava ia ma faavavau e tusa ai ma lo tatou faamoemoega paia i le olaga faitino. Sa lagiina e lenei aufaipese matagofie i lenei po ni upu o loo aoao maia lo tatou faamoemoega. E ala i tofotofoga ma faigata, e oo lava i le fefe ma i le lotolotoi o le faanoanoa, e totoa o tatou loto. Ua tatou naunau e faia la tatou vaega. Ua tatou i ai iinei e galulue mo se mafuaaga amiotonu.3 Uso e, e taua i tatou i lenei mafuaaga. E manaomia uma i tatou.
O le mafuaaga amiotonu tatou te auauna atu ai o le mafuaaga e ā Keriso. O le galuega o le faaolataga.4 Na aoao mai le Alii, “O la’u galuega ma lo’u mamalu lenei—ia aumaia le tino ola pea ma le ola faavavau o le tagata.”5 O tatou le mafuaaga na ala ai ona mafatia, ma afutoto Iesu Keriso mai puninii uma, ma o le alofa atoatoa na Ia foai mai ai Lona soifua. O Lona faamoemoega o le tala lelei, “o le tala fiafia, … na afio mai o ia i le lalolagi, o Iesu lava, e faasatauroina mo le lalolagi, ma tauave agasala a le lalolagi, ma faapaia le lalolagi, ma faamama mai amioletonu uma; ina ia mafai ona faaolaina e ala ia te ia i latou uma.”6 Sa “fai [e le Faaola] le ala ma taitai mai.”7 Ou te molimau atu a tatou mulimuli i Lana faataitaiga, alofa i le Atua, ma auauna i isi ma le agalelei ma le alofa, tatou te tutu ma le mama, “le pona i luma o le Atua i le aso gataaga.”8 Tatou te filifili e auauna i le Alii i Lona mafuaaga amiotonu ina ia tasi i tatou ma le Tama ma le Alo.9
Na tautino mai le perofeta o Mamona ma le lototoa, “Ona ua i ai sa taua galuega e fai a o ta i ai i lenei fale apitaga omea, ina ia ta faatoilaloina le fili o le amiotonu uma, ma malolo ai o taua agaga i le malo o le Atua.”10 Na uunai atu i luma ma le lototoa ma le faamaoni naunautai ia taitai ma paionia o talafaasolopito anamua o le Ekalesia ina ia faatuina le talalelei toefuataiina ma fausia malumalu e faia ai sauniga o le faaeaga. O paionia o nei ona po, o lona uiga o oe ma a’u, tatou te uunai atu foi i luma ma le faatuatua, “e galulue i le tovine [a le Alii] mo le faaolataga o agaga o tagata.”11 Ma, e pei ona aoao mai e Peresitene Gordon B. Hinckley, “o le a maeu lava le matagofie o le lumanai a o fofola atu e le Silisiliese Lana galuega mamalu … e ala i [auaunaga] le manatu faapito a e ua tutumu o latou loto i le alofa mo le Togiola o le lalolagi.”12 Matou te auai faatasi ma tamaitai faamaoni ua mavae, o le taimi nei, ma le lumanai, ma le tupulaga faiae pe a faatasia i tatou i le galuega o le faaolataga!
Ae tatou te lei fananau mai, sa tatou talia le fuafuaga a lo tatou Tama Faalelagi “lea e mafai ai [e i tatou] ona maua se tino faaletino ma maua le tomai faalelalolagi e agai atu ai i le atoatoaga ma iu ai ina iloa [lo tatou] taunuuga paia o ni suli o le ola e faavavau.”13 O lenei feagaiga o le muai olaga, na faamalamalama mai ai e Elder John A. Widtsoe faapea: “Sa tatou ioe, i lena lava taimi, ia le avea ma ni faaola mo i tatou lava ae … o ni faaola mo le aiga atoa o tagata. Sa tatou faipaaga ma le Alii. O le faataunuuina o le fuafuaga sa le patino na o le Tama, faapea le Faaola ae ua avea ma a tatou foi galuega. O e itiiti ma faatauvaa o i tatou, o loo faipaaga ma le Silisiliese i le ausiaina o le faamoemoega o le fuafuaga e faavavau o le faaolataga.”14
Ua tatou toe osi feagaiga foi iinei i le olaga faaletino ina ia auauna atu i le Faaola i le galuega o le faaolataga. O le auai i sauniga paia o le perisitua, ua tatou tauto ai o le a tatou o atu i le galuega a le Atua ma o tatou loto, mafaufau, manatu, ma le malosi atoa.15 Tatou te talia le Agaga Paia ma saili Ana musumusuga e taitaiina a tatou taumafaiga. O le a salalau atu le amiotonu i le lalolagi pe a tatou iloa le finagalo o le Atua ma faia loa.
Ou te iloa se tamaitiiti Peraimeri sa fai atu i se uo a o tutu i le nofoaga faatali pasi, “Ei! E tatau ona ta o i le lotu ma aoao e uiga ia Iesu!”
Sa ou vaai i teneiti i se vasega a Tamaitai Talavou o uulima faatasi ma faia se tautinoga e auauna atu le tasi i le isi ona fuafua lea o se auala talafeagai e fesoasoani ai i tamaitai talavou o e o tauivi ma se vaisu.
Na ou vaai i tina talavou o tuuina atu o latou taimi, a latou taleni, ma lo latou malosi e aoao ai ma faataitaia mataupu faavae o le talalelei ina ia mafai ai e a latou fanau, faapei o atalii o Helamana, o tutu ma le lotototoa ma le faamaoni e ui i tofotofoga, faaosoosoga, ma faigata.
Ae atonu o se mea e sili ona faalotomaualaloina ai a’u o le faalogo lea o tautino mai e se tamaitai nofofua matua ma le naunautai se molimau mama faapea o le galuega sili ona taua e mafai ona tatou faia o le saunia lea mo se faaipoipoga ma se aiga. E ui e le o sona aafiaga lenei, ua na iloa o le aiga o se vaega sili ona taua lea i le galuega o le faaolataga. “O le fuafuaga paia o le fiafia, ua mafai ai ona faaauau fegalegaleaiga faaleaiga i tala atu o le tuugamau.”16 Tatou te faamamaluina le fuafuaga a le Tama ma vivii atu i le Atua pe a tatou faamalosia ma faamamaluina na fegalegaleaiga i le feagaiga fou ma le faavavau o le faaipoipoga. Ua tatou filifili ia ola i ni olaga mama ma amiomama aua pe a oo mai avanoa, ua tatou saunia e osia ma osia na feagaiga paia i le maota o le Alii ma tausiaina e faavavau.
Ua tatou aafia uma lava i taimi ma tau i o tatou olaga. Peitai, pe o tatou i ai i le aoga, i galuega, i nuu, ma aemaise i aiga, o i tatou o sui o le Alii ma ua tatou i ai i Lana feau.
I le galuega o le faaolataga, e leai se avanoa mo ni faatusatusaga, faitioga, po o le tausalaga. E le o faatatau i le matua, tomai, po o viiga mai tagata lautele. O lenei galuega paia e faatatau i le atinaeina o se loto momomo, o se agaga salamo, ma se naunautaiga e faaaoga a tatou meaalofa paia ma taleni uigaese e faia ai le galuega a le Alii i Lana ala. O le mauaina o le lotomaualalo e pauu ifo i o tatou tulivae ma fai atu, “Lo’u Tama e, … aua le faia lo’u loto, a o lou finagalo.”17
O le malosi o le Alii e mafai ai ona tatou “faia o mea uma.”18 Tatou te sailia pea Lana taitaiga i le tatalo, i tusitusiga paia, ma i musumusuga a le Agaga Paia. Sa tusia e se tasi o tamaitai, na feagai ma se galuega ofoofogia, “O nisi taimi ou te mafaufau ai pe lei tuuina e tamaitai i le talafaasolopito anamua o le Ekalesia, e pei o i tatou, o latou ulu i o latou aluga i le po ma tatalo, ‘Po o le a lava le mea e oo mai taeao, e mafai ona e fesoasoani mai ia ou taulimaina?’” Ona ia tusia lea, “O se tasi o faamanuiaga o le tatou mauaina lea o le tasi ma le isi ma o loo tatou i ai faatasi i lenei mea!”19 Po o a lava o tatou tulaga, po o fea lava o tatou i ai i le ala e agai i le faaolataga, tatou te au faatasi i la tatou tautinoga i le Faaola. Tatou te lagolagoina le tasi ma le isi i Lana galuega.
Talu ai nei, sa tou faitau ai e uiga ia Sister Ella Hoskins, e 100 tausaga lea sa valaauina e fesoasoani i tamaitai talavou o lana uarota i le Alualu i Luma o le Tagata Lava Ia.20 Pe tusa ma le lua tausaga mulimuli ane, i le 102, sa maua ai e Sister Hoskins lona taui o le Aloaiaina i le Tulaga Faatamaitai Talavou. Sa potopoto faatasi ia tamaitai talavou, ma le au peresitene o Tamaitai Talavou ma le Aualofa a le siteki, ma tagata o le aiga e faamanatuina ana taumafaiga. O tulaga o le matua, faalapotopotoga, faaipoipoga e le taua i le auaunaga faamaoni. Na faaalia e tamaitai talavou le faafetai mo Sister Hoskins, mo ana aoaoga, ma mo ana faataitaiga amiotonu. Latou te fia pei o ia. Sa ou fesili mulimuli atu ia Sister Hoskins, “Na faapefea ona e faia?”
Sa ia tali vave mai, “Ou te salamo i aso uma.”
Mai se tamaitai agamalu, e tumu i le Agaga o le Alii lea sa susulu mai ai ma se malamalama mama, sa faamanatu maia ia te au faapea o le susulu atu matagofie o le paia, o le tutu atu ma le Faaola ma faamanuia i isi, e tatau ona tatou mama. E mafai ona maua le mama e ala i le alofa tunoa o Keriso pe a tatou teena mea e lē faaleatua ma filifili ia alofa i le Atua ma le manatu, mafaufau, ma le malosi atoa.21 Na aoao mai le Aposetolo o Paulo, “Solaese … i tuinanau o taulelea: … tausisi i le amiotonu, ma le faatuatua, ma le alofa, atoa ma le filemu, faatasi ma i latou o e valaau i le Alii i le loto mama.”22 E leai se tasi o i tatou e atoatoa. Tatou te sese uma lava. Peitai tatou te salamo ina ia mafai ona tatou lelei ma “taofi le suafa [o Keriso] ia tusia pea i o [tatou] loto.”23 Pe a tatou auauna atu i le suafa o le Alii, ma le mama o le loto, tatou te faasusulu atu le alofa o le Faaola ma tuu atu i isi se vaaiga o le lagi.
Tau ina ia tatou filifili e auauna atu i se mafuaaga amiotonu o ni sui lotototoa a lo tatou Alii o Iesu Keriso. Ia tatou tutu faatasi ma “le pese malosi i o [tatou] loto ma savavali i luma, ma ola i le talalelei, ma alolofa i le Alii, ma atinae [Lona] malo.”24 Ou te molimau atu ia tatou iloa le alofa mama o le Atua i lenei galuega mamalu. Ia tatou maua le olioli moni ma maua mamalu uma o le faavavau. I le suafa paia o Iesu Keriso, amene.