Brian K. Ashton

Fesoasoani Lua i le Au Peresitene Aoao o le Aoga Sa

O Brother Brian K. Ashton na valaauina e auauna atu i le au peresitene aoao o le Aoga Sa i le taimi ao faamaeaina lana auaunaga o se peresitene o le Misiona a Texas Houston i Saute. Na fofogaina le valaauga ia Iuni, ma sa lagolagoina o ia i le taimi o le konafesi aoao o Oketopa 2015.

O Brother Tad R. Callister o loo faaauau pea ona avea ma peresitene aoao, ma o Brother Devin G. Durrant, o lē sa avea ma fesoasoani lua talu mai Aperila 2014, ua avea ma fesoasoani muamua.

O le mafuaaga o le avanoa i le au peresitene ona o le tofiga o John S. Tanner e avea ma peresitene o le Iunivesite o Polika Iaga–Hawaii.

O Brian Kent Ashton sa soifua mai i Provo, Iuta, ISA, i le 1969, ia Kent ma Vicki Brown Ashton. O ia o le ulumatua o le fanau e toaiva. Na te manatuaina ona matua o ni faiaoga tumau o le talalelei i le fale.

Na auauna atu Brother Ashton faafaifeautalai i le Misiona a Peru Lima i Saute. O lana faaiuga e auauna atu sa uunaia e se uo mamae o le sa lagona le musuia e tau atu ia te ia e tatau ona ia auauna atu i se misiona. A o faaalia ai e lana uo ona lagona, sa lagonaina e Brian le faamautinoaga a le Agaga. I lana misiona sa ia tauivi ai ma ni luitau faalesoifua maloloina ina ua valaauina o ia e avea ma peresitene o se paranesi toatele. I lena taimi, sa ia tatalo faatauanau ma le aunoa i le Tama Faalelagi mo se fesoasoani. “Sa ou aoao e faalagolago ia te Ia, ma Na afio mai o Ia mo au,” o lana tala lea. “O le aoao e faalagolago ia te Ia ua faia ai se eseesega tele.”

Ina ua maea lana misiona sa ia auai atu i le Iunivesite o Polika Iaga, lea na ia feiloai ai i lona toalua i le lumanai, o Melinda Earl. Ae peitai, a o lei faaipoipo i laua, sa auauna atu (Melinda) i le Misiona a Sepania Malaga a o Brother Ashton sa galue i le ogatotonu i sisifo o le Iunaite Setete. Ina ua maea lana misiona sa la faaipoipo i le Malumalu o St. George Iuta. E toafitu o la alo.

Na maua e Brother Ashton se faailoga o le matua o faiva mo pulega faapisinisi mai le Iunivesite o Harvard, a o auai ai Sister Ashton i le aoga faafomai. O Brother Ashton o se tagata e faatulagaina ma amataina ni pisinisi ma ua amataina le tele o kamupani.

Sa avea Brother Ashton ma se epikopo, fautua maualuga, peresitene o le korama a toeaina, ma se faiaoga o Aoaoga Faavae o le Talalelei.