Elder Gary E. Stevenson

Korama a Aposetolo e Toasefululua

A o ia tomanatu i lona valaauga i le Korama a Aposetolo e Toasefululua, na faaiuina ai e Elder Gary E. Stevenson o lana auaunaga i le malo o le Alii, ma aemaise lava o se Aposetolo o le a silii atu ona faatatau i le taitai e ala i le auauna atu nai lo le auauna atu e ala i le taitai.

“O Iesu Keriso na faitauina o Ia lava o se auauna,” na saunoa ai Elder Stevenson i le taimi o se faatalanoaga ma tusitala ina ua uma ona lagolagoina o ia. “Tatou te manatu foi ia i tatou lava ia o ni auauna” (tagai i le Mareko 10:44).

O le valaauga o Elder Stevenson i le Korama a Aposetolo e Toasefululua na oo mai faafuasei. Peitai, na te lagonaina o lana auaunaga i le Ekalesia—ae maise lava o se Pulega Aoao o Fitugafulu mai le 2008 i le 2012, ma avea ma Epikopo Pulefaamalumalu talu mai ia Mati 2012—ua fesoasoani e saunia ai o ia mo ona tiutetauave fou.

O se tasi o mea aupito sili ona taua ua ia aoaoina i le galuega a le Alii o le taua tele o fanau a le Tama Faalelagi. Ua tulimatai atu Elder Stevenson i avanoa faateleina o le a ia maua o se Aposetolo e mafuta ma molimau atu ai i fanau a le Atua i le lalolagi atoa.

Ua ia tulimatai atu foi i mafutaga faifai pea ma i latou o e o taitaia le Ekalesia a le Alii. “O le mafaufau i le saofai i aufono ma mafai ai ona aoao mai ia i [latou], ma lagona lo latou malosi ma a latou molimau ia Iesu Keriso ma Lana Togiola,” sa ia fai mai ai, “o se mea ou te talitonu o le a avea ma se aafiaga matagofie.”

Sa soifua mai Gary E. Stevenson i le aso 6 o Aokuso, 1955 ia Evan N. ma Vera Jean Stevenson. Ua mafai ona ia maua gafa o lona aiga e oo atu i uluai paionia o le Au Paia o Aso e Gata Ai i Iuta. Sa ia ola ae i le Vanu o Cache Iuta i se aiga e faatauaina le talalelei lea sa ia aoaoina ai le taua o le galue malosi ma le taua o le auauna atu. O lona tama, “o le epikopo o lo’u talavou,” e masani ona ia valaaulia o ia i ana asiasiga i le tele o fafine ua maliliu a latou tane o loo nonofo i le latou uarota. O lesona na aoaoina e Gary i lona talavou mai lona tama e uiga i le tausiga ma auaunaga faaKeriso na tuua ai se uunaiga e le mavae ese mai ia te ia ma o le a fesoasoani tele ia te ia i le avea ai ma se Epikopo Pulefaamalumalu.

“O epikopo o le Ekalesia,” na ia saunoa ai, “o ni a’u toa moni lava.”

O le auaunaga a Elder Stevenson i le Ekalesia na amata i se faatauanau ina ua valaauina o ia o se faifeautalai faamisiona i le Misiona a Iapani Fukuoka, lea sa ia atiina ae ai se alofa tumau mo tagata Iapani ma la latou gagana, lea o loo lelei ai lava lana tautala. Ina ua mae’a lana misiona sa ia auai i le Iunivesite o le Setete o Iuta, lea na ia feiloai ai ia Lesa Jean Higley. Sa la faaipoipo i le Malumalu o Idaho Falls Idaho i le 1979 ma o ni matua o ni atalii e toafa. Sa mauaina e Elder Stevenson se faailoga i pulega faapisinisi, faatasi ai ma se faamamafaga i fefaatauaiga. Na ia mauaina mulimuli ane ma avea ai ma se peresitene ma se ofisa sinia i se tasi o falegaosimea lauiloa i le lalolagi ma fefaatauaiga o masini faamalositino.

Na nonofo le aiga o Stevenson i Iapani mo le tele o tausaga. I le 2004 na valaauina ai Elder Stevenson o se peresitene o le Misiona a Iapani Nagoya. Ina ua valaauina o ia i le au Fitugafulu i le 2008, sa ia auauna atu o se fesoasoani ma se peresitene i le Eria o Asia i Matu. Sa ia auauna atu o se Peresitene o le Eria i le 2011 i le taimi na taia ai le talafatai i matu o Iapani i se mafuie malosi, ma mafua ai se sunami lea na maliliu ai le faitau afe o tagata. O lena aafiaga na avea ma se taimi taua tele o lona olaga.

Sa fesoasoani Elder Stevenson e faatulaga le tali atu o le Ekalesia, lea na tuuina atu ai ia meaai, sapalai, lagolago, ma se fesoasoani mo se taimi umi.

“O se faailoaga lea o le Ekalesia a Iesu Keriso o le faataunuuina o se tasi o ona tiutetauave tofia mai le lagi i le tausiga o e matitiva ma lē tagolima,” o lana tala lea. Sa ia fai mai o se avanoa paia e “auauna atu, ma faamanuia, ma faatulaga ai se fesoasoani.”