Kita Naghisgot kang Kristo

Pagpasaylo sa Akong Kanhi Bana

Pangalan gipugngan

Ang pagtuon sa ehemplo ni Kristo sa paghigugma ug pagpasaylo nakatabang kanako sa pagbuntog sa kasakit nga akong gibati human sa akong diborsyo.

Sa dihang nagbuhat ko og butang nga dili nako pamilyar, nag-atubang sa diborsyo nga dili nako gusto, ako nakasinati og kasakit ug pagsalikway nga wala pa gayud nako mabati kaniadto. Mga 45 na ko, nag-inusara sa pagpadako sa akong mga tin-edyer, dunay full-time nga trabaho, ug nagbayad sa datahan. Ako nabug-atan, gikapoy, ug nabalaka, apan kasagaran napuno sa labihan gayud kasakit nga akong gibati sukad.

Tungod sa akong pundasyon sa ebanghelyo ug sa akong tinguha sa pagpuyo nga matarung, nasayud ko nga kinahanglan ko nga mopasaylo sa akong kanhi bana. Nasayud ko nga importante nga dili gayud manaway kaniya sa atubangan sa mga bata, apan unsaon man nako pagbuntog kadtong mga pagbati sa pagsalikway nga nakapahimo kanako sa paghilak sa kasakit?

Matag adlaw sa akong kasakit, ako midangop sa mga kasulatan, nangita og direksyon gikan sa Espiritu. Makugihon kong nagsiksik adlaw ug gabii. Ako kinahanglan nga masayud kon unsa ang personal nakong mahimo niining panahon sa importante nga mga desisyon sa akong kinabuhi sa pagsunod sa ehemplo sa Manluluwas, sa pagsunod sa Iyang tawag sa pagsunod Kaniya.

Samtang nagtuon ko sa mga kasulatan, akong gisulat ang matag kinaiya ni Jesukristo nga gitinguha nakong palambuon sa akong kaugalingong kinabuhi. Akong girekord ang mga pagtulun-an gikan sa mga istorya ug mga sambingay nga Iyang gipakigbahin atol sa Iyang mortal nga pangalagad. Akong gihinumduman ang mga butang nga gipamulong sa akong kasingkasing mahitungod sa pagpasaylo. Makugihon nakong gisulat sa akong notebook ang mga kalisdanan ug mga pagsulay nga giatubang sa Ginoo ug giunsa Niya kini pagbuntog.

Sa kadugayan akong nakita nga ang Iyang kasakit mas grabe pa kay sa akoa, apan gipasaylo Niya kadtong nakapasakit Kaniya. Siya mao ang hingpit nga ehemplo. Kana nga notebook, nga puno sa mga leksyon gikan sa kinabuhi sa Ginoo, nahimong usa ka tinubdan sa dako nga kalig-on ngari kanako. Importante kaayo kadto alang kanako aron malampusong makabangon. Sa pagsunod sa Iyang ehemplo, ako determinado sa paglahutay sa akong pagsulay kutob sa akong mahimo. Ako andam nga mopadayon bisan pa man sa akong kasakit.

Misalir kini! Karon pipila ka tuig na ang milabay, napanalanginan ko og usa ka maayo nga relasyon uban sa akong kanhi bana. Bisan tuod nga siya nagminyo og usab, ang among relasyon isip mga ginikanan sa among mga anak nindot ug gawasnon sa kasakit. Pinaagi sa pagsunod sa ehemplo ni Jesukristo sa dili pagpanaway kaniya, akong nabuntog ang negatibong mga pagbati sa kasakit ug pagsalikway. Ako makahimo sa paghigugma!

Unsa ka bililhon nga leksyon ang akong nakat-unan atol niining grabe nga pagsulay. Mapasalamaton ko sa hingpit nga ehemplo sa akong Manluluwas. Siya ang akong kalig-on ug pundasyon. Ug wala gayud ako mobati nga nag-inusara. Naangkon nako ang Iyang gugma, Iyang Pag-ula, Iyang hingpit nga ehemplo, ug ang gugma ug mga panalangin sa usa ka mahigugmaong Langitnong Amahan.

Pagpasaylo: Ang Mahinungdanong Bahin sa Ebanghelyo

“Ang diwa sa pagpasaylo ug ang kinaiya sa gugma ug kalooy ngadto niadtong kinsa nakasala kanato mao ang labing mahinungdanon nga bahin sa ebanghelyo ni Jesukristo. Ang matag usa kanato adunay panginahanglan niini nga diwa. Ang tibuok kalibutan nanginahanglan niini. Ang Ginoo mitudlo niini. Gipakita Niya kini ingon nga walay laing tawo nga mipakita niini.”

Presidente Gordon B. Hinckley (1910–2008), “Of You It Is Required to Forgive,” Ensign, Hunyo 1991, 2.

Sa unsang paagi nga ang pagtuon sa kasulatan makatabang kanato panahon sa mga pagsulay?

“Ang kasulatan makahupay sa nahasol nga kalag, makahatag og kalinaw, paglaum, ug pagpahiuli sa pagsalig sa abilidad sa usa ka tawo sa pagbuntog sa mga hagit sa kinabuhi. Kini dunay kusog nga gahum nga moayo sa emosyonal nga mga hagit kon dunay hugot nga pagtuo sa Manluluwas” (Richard G. Scott, “Ang Gahum sa Kasulatan,” Liahona, Nob. 2011, 6).

Hunahunaa ang pagbuhat unsa ang gihimo niini nga sister nga nakasugakod sa iyang pagsulay: pagtuon sa kasulatan sa pagpangita og mga kinaiya sa Manluluwas ug sa ubang matinud-anon nga mga tawo. Ang ilang mga ehemplo makatabang kaninyo sa inyong mga hagit o mga pangutana. Kon kamo nasayud sa hilisgutan nga gusto ninyong tun-an—sama pananglit, “Lahutay,” “Pasaylo”, o “Pailub”—ang Giya ngadto sa mga Kasulatan mahimong mosugyot og pipila ka mga kasulatan sa pagsugod.