Pagserbisyo diha sa Simbahan
Among Gipili nga Moserbisyo
Ang tagsulat nagpuyo sa Bavaria, Germany.
Ang akong bana nanlimbasog batok sa kanser, apan among gidawat sa walay pagduha-duha ang tawag nga moserbisyo sa Templo sa Frankfurt Germany.
Paghulagway pinaagi ni Ben Sowards
Niadtong Disyembre 12, 1994, nakadawat mi og tawag sa telepono gikan sa Siyudad sa Salt Lake. Usa ka mahigalaon nga tingog ang misulti kanamo nga si Presidente Thomas S. Monson, nga nianang higayuna nagserbisyo isip Ikaduhang Magtatambag sa Unang Kapangulohan, gusto nga makigsulti kanamo.
“Ang presidente sa Templo sa Frankfurt Germany ganahan nga motawag kanimo nga mahimong iyang magtatambag ug ang imong asawa nga mahimong assistant sa temple matron,” si Presidente Monson misulti sa akong bana, nga si Gerhard. Dayon si Presidente Monson mipahayag og kabalaka mahitungod sa panglawas sa akong bana.
Si Gerhard nakigbatok sa chronic lymphocytic leukemia sulod sa 11 ka tuig. Bisan pa niana nga hagit, ang Ginoo mitawag kanamo, ug kami mitando sa walay pagduha-duha.
Sa dihang mi-resign ko sa akong trabaho agig pagpangandam nga moserbisyo, ang akong boss nangutana, “Ako ka bang mapabilin kon akong patas-an ang imong sweldo?”
“Dili, kinahanglan kami nga moadto,” mitubag ko, nagsulti kaniya nga kami misaad sa Ginoo nga moserbisyo mi og misyon. “Nagtinguha mi nga moserbisyo sulod sa duha ka tuig, apan wala ako masayud kon ang akong bana buhi pa ba kaha nianang higayuna.”
Sa dihang si Gerhard napaubos sa regular nga pag-eksamin walay duha ka semana human niana, ang doktor misulti kaniya, “Dinhi ra ka; taas ang risgo nga mamatay ka.”
Iyang kahimtang mas migrabe. Kami nahugno ug dili namo mahunahuna kon unsaon namo sa pagtuman ang among calling, apan kami napuno sa hugot nga pagtuo, paglaum, ug kasiguroan. Among gisalig ang tanan diha sa kamot sa Ginoo. Kon Siya adunay buluhaton alang kanamo, Siya mohimo og paagi aron matuman namo kini.
Niadtong Enero 2, 1995, mibiya kami alang sa among misyon. Sa kalit akong naamguhan kon unsa ang akong gibiyaan: ang akong inahan, ang akong mga anak, ang akong mga apo, ang akong trabaho, ang akong balay, ug ang akong garden. Apan pagkasunod adlaw didto na kami sa among dapit sa Templo sa Frankfurt, diin usa ka mangitngit nga gabii ang nahimong usa ka hayag nga bag-ong adlaw alang kanamo. Tanang kakapoy sa matag adlaw nga pagpakabuhi mibiya kanamo.
Niining balaan nga dapit among nakita ang gugma, kahayag, paglaum, kalipay, pagsalig, kainit sa pagbati, kasiguroan, proteksyon, ug ang kalinaw nga nagdan-ag gikan sa atong Manluluwas. Samtang kami nagserbisyo, kami nakahimamat og talagsaon nga mga tawo gikan sa daghang mga nasud. Bisan tuod kon lain-lain ang ilang mga pinulongan, ang pinulongan sa gugma mao ang mibugkos kanamo. Ang among pagserbisyo sa templo nakapalipay kaayo kanamo.
Ang diwa sa templo ug ang kalig-on sa Dios mao ang mipatunhay sa akong minahal nga bana sulod sa 26 ka bulan. Usa ka adlaw sa wala madugay human mi na-release sa among calling sa templo, si Gerhard miadto sa ospital alang sa naandan nga pagpatambal. Niining higayuna ang mga doktor mipabilin na kaniya didto. Pipila ka bulan ang milabay siya namatay.
Kon akong hinumduman, akong nakita kadtong mga tuig sa pagserbisyo sa templo isip usa ka gasa gikan sa langit—nagserbisyo kauban sa akong bana diha sa balay sa atong mahigugmaong Amahan samtang kami mituman sa among saad nga kaubang magserbisyo og misyon. Mapasalamaton ko sa tibuok nakong kasingkasing alang niana nga kasinatian.