Ang Akong Hapit Mawala nga Misyonaryong Kasinatian
Ang tagsulat nagpuyo sa Sergipe, Brazil.
Gusto kong mopaambit sa ebanghelyo, apan kinsa kaha sa akong mga higala ang interesado?
Paghulagway pinaagi ni Michael Mullan
Alang sa usa ka tumong sa Personal nga Kauswagan, nagsugod ko sa pag-ampo nga makaangkon og usa ka misyonaryong kasinatian. Naningkamot ko sa paghunahuna kinsa sa akong mga higala ang labing andam nga mopasakop sa Simbahan.
Mga bulan ang milabay, naghunahuna ko nga dili na nako masinati ang akong gitinguha—hangtud nga akong nahimamat si Brenda. Una kadto niya nga tuig sa among eskwelahan.
Sa nagdagan ang tuig, nagkasuod mi, apan wala nako siya maimbitar sa simbahan hangtud nga usa sa akong higala midapit ni Brenda sa iyang simbahan. Nakaingon ko nga, “dili ko makatuo niini! Ako unta ang nakahunahuna niana.”
Pagkasunod semana miingon si Brenda nga nalingaw siya sa pag-adto sa simbahan sa among higala ug gustong moadto pag-usab. Nakaingon ko, “Nawagtangan ako.” Dili tungod kay usa kini ka kompetisyon, apan gusto kong modala sa ebanghelyo ngadto sa mga anak sa Langitnong Amahan.
Nianang higayuna ang among meetinghouse giayo ug giiskedyul nga ipahinungod pag-usab sa moabut nga pipila ka bulan. Nanghatag ang bishop og mga imbitasyon para sa open house ug pagpahinungod. Gidapit nako ang akong mga higala nga nagpuyo duol sa meetinghouse. Ang bugtong tawo nga midawat mao si Brenda. Nalipay ko.
Pipila ka adlaw sa wala pa ang open house, miingon si Brenda nga basin og dili siya makaadto kay ang iyang mama dili gustong moadto siya. Nasagmuyo ko, apan akong nasabtan ug giingnan siya nga dunay laing mga oportunidad sa pagkat-on bahin sa Simbahan.
Apan, didto sa open house, nakalitan ko nga nakita si Brenda didto. Giistoryahan diay niya ang iyang mama, ug gitugutan siyang moadto. Gipaila-ila nako siya sa mga misyonaryo. Gisulod namo ang tanang kwarto sa meetinghouse ug naminaw sa mubo nga deskripsyon sa matag usa nga organisasyon sa Simbahan. Sa katapusan, nangadto mi sa cultural hall ug mikuha og mga pamphlet bahin sa Pagpahiuli, family history, mahangturon nga kaminyoon, ug uban pang mga hilisgutan sa ebanghelyo. Miingon si Brenda, “Mituo ko niini!”
Pagka-Dominggo misimba siya. Pagka-Lunes mitambong siya og usa ka proyekto sa pagserbisyo sa Mormon Helping Hands.
Ang binhi nga natanom sa kasingkasing ni Brenda mitubo sa matag adlawng milabay. Nagsugod og kausab ang iyang mga kinaiya nga pinauyon sa mga sugo ug wala madugay nabunyagan.
Karon, pipila ka tuig ang milabay, siya sa gihapon mosulti nako nga malipayon kaayo siya nga nakakita sa tinuod nga ebanghelyo ug mapasalamaton nga mitabang ko niya nga makit-an kini.
Daghang higayon nga lisud ang pakigsulti sa mga tawo mahitungod sa ebanghelyo, apan kon kita mag-ampo, magtuon sa kasulatan, maminaw sa Espiritu Santo, ug andam nga makig-istorya sa uban, ang Ginoo motabang kanato.