Tabang pinaagi sa Espiritu Santo
Ni Elder Chi Hong (Sam) Wong
Sa Seventy
Ang Espiritu Santo makatabang kaninyo sa eskwelahan, sa pamilya, ug sa trabaho ingon man usab sa espirituhanong mga butang.
Paghulagway pinaagi ni Red Hansen
Ang Espiritu Santo makatabang kanato sa matag bahin sa atong kinabuhi. Nakakat-on ko niini sa usa ka praktikal nga paagi sa dihang ako usa ka estudyante sa kolehiyo didto sa Brigham Young University–Hawaii.
Nianang higayuna, ako nagtrabaho ug dunay puno nga iskedyul sa klase. Ang akong asawa ug ako usab dunay gamayng anak nga atimanon. Sa tanang gipangayo sa akong iskedyul, ako walay igong panahon sa pagtuon. Ako nag-ampo matag adlaw alang sa pagpakig-uban sa Espiritu Santo. Nagkinahanglan ko og giya nga makatabang nako sa epektibong paggamit sa akong panahon. Nagkinahanglan ko og tabang nga makasabut sa materyal ingon man usab sa paghinumdom niini sa kaulahian atol sa eksamin.
Langitnong Tabang alang sa usa ka Eksamin sa Eskwelahan
Usa ka adlaw atol sa klase, usa ka propesor ang nagsulat og mga advanced equation diha sa whiteboard aron sa paghulagway sa usa ka punto. Kining komplikado nga mga equation walay kalabutan niana nga klase, apan gusto siyang maghisgot mahitungod niini og kadiyot. Human sa pipila ka minuto gipapas sa propesor ang gisulat sa pisara.
Ang akong sunod nga klase mao ang computer science, ug duna mi eksamin nianang adlawa. Kadtong eksakto nga mga equation gikan sa pisara sa akong miaging klase anaa sa eksamin! Unsa ang tinud-anay nga katalagsaon mao nga wala gayud namo kini matun-i sa una diha sa among klase sa computer science. Tanan niana akong nahinumduman og balik gikan sa lain nga klase nga akong gitambungan, ug nakatubag ko sa problema.
Sa dihang ang propesor sa computer science migrado sa eksamin, siya sigurado gayud kaayo nga walay nakatubag og husto nianang piho nga problema nga awtomatik niya kining gimarkahan og sayop alang sa matag estudyante. Apan sa dihang nadawat nako og balik ang akong papel, akong gipakita niya nga ang tubag nga akong gisulat sa papel husto. Talagsaon kadto.
Ang Espiritu Santo mitabang nako nga epektibong magamit ang tanan nakong oportunidad sa pagtuon sa tibuok panahon sa kolehiyo. Nakakuha ko og taas nga mga grado ug nakaangkon og mga scholarship, nga nakatabang nako sa pagbayad sa eskwelahan.
Giya sa Kinabuhi
Hinapos sa akong pagtuon, daghan sa akong mga higala ang nagplano nga magpadayon sa ilang pag-eskwela ug makaangkon og master‘s degree. Ganahan ko nga magtuon ug gustong mohimo sa samang butang, apan ang Espiritu klarong misulti kanako nga ang akong misyon sa Hawaii nahuman na. Panahon na kadto nga mobalik ko ngadto sa Hong Kong.
Ang akong asawa ug ako misunod sa pag-aghat. Nianang higayuna wala ko makasabut nganong gigiyahan ko palayo sa pagpadayon sa akong edukasyon. Apan usahay kita mosunod sa Espiritu nga wala masayud sa tanan nga mga detalye. Bisan tuod nga ang akong asawa ug ako wala masayud unsay mahitabo samtang nangita mi og trabaho ug apartment, kami napanalanginan ug sa wala madugay nagmalampuson.
Samtang ako naghinumdom karon, nakasabut ko nganong ang Espiritu kusog kaayo sa pag-awhag kanamo nga mobalik sa Hong Kong. Mahinungdanon kaayo kini sa akong pamilya ug kanako nga malig-on sa Simbahan kauban sa mga miyembro didto. Nagserbisyo ko isip bishop, isip magtatambag sa kapangulohan sa stake, ug isip presidente sa stake sa wala pa matawag isip Area Seventy. Human miretiro sa akong propesyon, naangkon nako ang master‘s degree. Tanan niadtong mga kasinatian nakatabang nako sa pagpangandam alang sa akong calling karon.
Ako mopamatuod kaninyo nga ang pagtinguha ug ang pagsunod sa giya sa Espiritu Santo mao kanunay ang pinakamaayong paagi sa pagplano ug pagpakabuhi. Gihatagan na kamo sa gasa sa Espiritu Santo sa dihang kamo nakumpirmahan isip miyembro sa Simbahan, ug kon kamo mogamit niana nga gasa, kini mahimong dako nga tabang sa tanan ninyong buhaton.