Mensahe sa Unang Kapangulohan
Luwas nga Pagtugpa Taliwala sa Kusog nga Hangin
Image © iStock/Thinkstock
Dili pa lang dugay ang akong asawa, si Harriet, ug ako anaa sa airport nga nagtan-aw sa maanindot nga mga eroplano nga motugpa. Kadto usa ka adlaw nga kusog ang hangin, ug ang mapintas nga hangin mihampak og maayo sa nagsingabut nga eroplano, maoy hinungdan nga ang matag usa mosaliring ug mokilog atol sa pagtugpa.
Samtang kami nakamatikod niining panlimbasug tali sa kinaiyahan ug sa makina, nahinumdom ko sa akong kaugalingong training sa pagpalupad og eroplano ug sa mga baruganan nga akong nakat-unan didto—ug wala madugay mitudlo sa ubang mga piloto atol sa training.
“Ayaw pugsa pagkontrol ang eroplano sa unsay inyong gusto atol sa kusog nga hangin,” ako kanunayng mosulti kanila. “Magpabiling kalma; ayaw pasubrahi ang reaksyon. I-focus ang inyong panan-aw sa linya sa tunga sa tugpahanan. Kon kamo mosimang gikan sa inyong gitinguha nga agianan sa pagtugpa, paghimo og dinalian apan pinahimutang nga mga koreksyon. Salig sa potensyal sa inyong eroplano. Padayon sa paglupad hangtud mohunong ang kakusog sa hangin.”
Ang sinati nga mga piloto nakasabut nga sila dili kanunayng makapugong sa mga butang nga mahitabo libut kanila. Dili sila makapahunong sa kakusog sa hangin. Dili sila makapahanaw sa ulan o snow. Dili sila makapahunong sa paghuros sa hangin o sa pag-usab sa direksyon niini.
Apan nakasabut usab sila nga usa kini ka sayop nga mahadlok sa kakusog sa hangin—ug ilabi na nga dili makalihok tungod niini. Ang paagi sa luwas nga pagtugpa kon ang kondisyon dili maayo mao ang pagpabilin sa husto nga dalan kutob sa mahimo.
Samtang nagtan-aw ko sa usa ka eroplano human sa lain nga motugpa ug nahinumdom sa mga baruganan nga nakat-unan gikan sa akong katuigan isip usa ka piloto, naghunahuna ko kon wala bay leksyon diha niini alang sa atong inadlaw-adlaw nga kinabuhi.
Dili kita kanunayng makapugong sa mga kalisdanan nga atong masinati sa kinabuhi. Usahay ang mga butang dili mahitabo sa paagi nga gusto nato. Kita mahimong mobati nga nahasol sa kalisdanan sa kasagmuyo, pagduda, kahadlok, kasub-anan, o kakapoy.
Niadtong mga panahona, sayon ra nga maapil sa tanang butang nga sayop ug sa paghimo sa atong mga kalisdanan nga maoy sentro sa atong hunahuna. Ang tintasyon mao ang pag-focus sa mga pagsulay nga atong giatubang imbis nga sa Manluluwas ug sa atong pagpamatuod sa kamatuoran.
Apan dili kana mao ang pinakamaayong paagi sa paglawig agi sa atong mga hagit sa kinabuhi.
Sama sa usa ka sinati nga piloto nga mo-focus dili sa mga unos kondili sa sentro sa tugpahanan ug sa husto nga katugpahan sa eroplano, kinahanglan usab kita nga mo-focus diha sa sentro sa atong pagtuo—sa atong Manluluwas, sa Iyang ebanghelyo, ug sa plano sa atong Langitnong Amahan—ug sa atong katapusang tumong—nga makapauli nga luwas ngadto sa atong langitnong destinasyon. Kinahanglan kitang mosalig sa Dios ug mo-focus sa atong mga paningkamot sa paghimo sa mga butang nga kinahanglang himuon sa usa ka disipulo. Kinahanglan natong i-focus ang atong panan-aw, mga tinguha ug hunahuna diha sa pagpakabuhi sa paagi nga atong nasayran nga kinahanglan natong buhaton.
Ang pagpakita sa atong hugot nga pagtuo ug pagsalig sa Langitnong Amahan pinaagi sa malipayong pagsunod sa Iyang mga sugo makahatag kanato og kalipay ug himaya. Ug kon magpabilin kita sa dalan, malabyan ra nato ang bisan unsang gikusgon sa hangin—bisan unsa kini kakusog tan-awon—ug makabalik nga luwas ngadto sa atong langitnong panimalay.
Hawan man ang kalangitan nga naglibut nato o puno sa mga panganod nga naghulga og kusog nga unos, isip mga disipulo ni Jesukristo, kita mangita og una sa gingharian sa Dios ug sa Iyang pagkamatarung, nasayud nga kon ato kining buhaton, tanan natong gikinahanglan sa katapusan ihatag ra (tan-awa sa Mateo 6:33).
Unsa ka importante nga leksyon sa kinabuhi!
Kon mas mag-focus kita sa atong kalisdanan, panlimbasug, pagduha-duha, ug sa atong kahadlok, mas mahimong lisud ang mga butang sa umaabut. Apan kon mas mag-focus kita sa atong katapusan nga langitnong destinasyon ug sa kalipay sa paghimo sa mga butang nga kinahanglang himuon sa usa ka disipulo—paghigugma sa Dios, pagserbisyo sa atong silingan—mas malampuson kitang makalahutay sa panahon sa kasamok ug sa kakusog sa hangin.
Minahal kong mga higala, bisan unsa pa kalisud ang atong kinabuhi, ang ebanghelyo ni Jesukristo kanunayng motanyag sa labing maayo nga dalan aron makab-ot ang atong tumong sa gingharian sa atong Langitnong Amahan.