Mga Tubag gikan sa mga Lider sa Simbahan
Unsaon sa Pagpangita og Hingpit nga Kalipay
Ni Elder Dallin H. Oaks
Sa Korum sa Napulog Duha ka mga Apostoles
Gikan sa Oktubre 1991 nga pakigpulong sa kinatibuk-ang komperensya.
Mga kaigsoonan, tigulang ug batan-on, mohangyo ko sa matag usa ninyo hinumdumi nga ang pagkadautan dili gayud mahimo nga kalipay ug ang sala makapaalaut. Kabatan-onan, ayaw tinguhaa ang kalipay diha sa nagilak-gilak apan mabaw nga mga butang sa kalibutan. Dili nato makab-ot ang malungtarong kalipay pinaagi sa pagtinguha sa sayop nga mga butang. Usa ka tawo kausa miingon, “Kamo dili gayud makakuha og igo gikan sa unsay wala ninyo kinahanglana, kay ang wala ninyo kinahanglana dili makatagbaw kaninyo.”
Mga batan-on ug tigulang, ilayo ang inyong mga mata ug inyong kasingkasing sa malinglahon nga mga mensahe sa media. Walay kalipay diha sa alkohol o mga drugas, pagkaulipon ra. Walay kalipay diha sa kabangis, kasakit ug kasub-anan ra. Walay kalipay diha sa sekswal nga mga relasyon ug pisikal nga kaanad nga gawas sa higot sa kaminyoon, kondili pagkunhod ug mas madali ang pag-angkon og espiritwal nga kamatayon.
Walay malungtarong kalipay diha sa atong mga naangkon nga butang. Ang hingpit nga kalipay moabut kon unsa, siya dili kay kon unsa ang iyang mga naangkon o unsa siya nga tan-awon. Kabatan-onan, hupti gayud og hugot ang inyong mga sumbanan. Tun-i ug gamita ang makaluwas nga mga pamplet nga, Alang sa Kalig-on sa Kabatan-onan.
Ang pagkamatarung mougmad og pagkamatarung. Ang mga epekto sa matarung nga mga ehemplo bation sa mga henerasyong moabut. Ang maayong pagkaginikanan mamunga og mga batan-on nga mahimong maayong mga ginikanan. Sama sa kadaghanan nato nga nalig-on tungod sa halangdong mga ehemplo sa atong mga katigulangang pioneer sa daghang kayutaan, mao usab ang matarung nga mga pagpili ug mga sakripisyo sa atong panahon makapanalangin sa atong mga pamilya ug sa atong mga higala ug sa atong nasud alang sa tanang katuigan nga moabut.
Ako mopamatuod kaninyo mahitungod sa malungtaron ug hingpit nga kalipay niadtong mogamit sa hugot nga pagtuo sa Dios ug motuman sa Iyang mga sugo. Ako moawhag ninyo nga pangitaon ang hingpit nga kalipay nga naggikan sa pagsunod sa mga sugo sa Dios ug paningkamutan ang matarung nga impluwensya alang sa kaayohan niadtong atong gihigugma.