Ang Inyong Kaugmaon: Talagsaon nga Desinyo

Gusto ba nimo og maanindot nga trabaho, pamilya, ug pagpamatuod? Makapili kamo sa dalan padulong sa kalampusan karon!

Mga paghulagway pinaagi ni Adam Koford

Ang paghimo og mga kapilian karon aron makab-ot ang inyong mga damgo alang sa kaugmaon ingon og mahagiton, apan ang mga maayong desisyon sa inyong pagka tin-edyer magbunga ra. Kining paagi nagsunod niini ang tambag gikan sa usa ka propeta: “Ang atong inadlaw nga buhat ug pagpili ihaum gayud sa atong mga tumong” (Quentin L. Cook, “Maalamong Mopili,” Liahona, Nob. 2014, 49).

Kining upat ka mga istorya nagpakita nga bisan unsa pa man sa inyong piho nga personal nga mga tumong, inyong makab-ot ang kalampusan sa kaugmaon pinaagi sa matinud-anon nga mga pagpangandam karon.

Naghulagway sa mga Superhero: Clint Taylor

Si Clint nagtubo sa Utah ug kasamtangan nagtrabaho sa California, USA, sa Nickelodeon Studios isip usa ka storyboard artist.

Unsa ang pipila ka kalampusan nga ikaw mapasigarbuhon?

Nahimo kong direktor sa Warner Brothers Animation, ug nakatrabaho sa Disney, Warner Bros., DreamWorks Studios, Marvel Comics, ug Sony Pictures Entertainment. Akong natrabaho ang kingkoy [animated] nga mga pasundayag gikan sa Teenage Mutant Ninja Turtles ug X-Men hangtud sa Dora the Explorer.

Giunsa nimo nga nahimo kang maayo sa unsay imong gibuhat?

Sa bata pa ko, malingaw ko nga mag-drowing og mga litrato nga akong ganahan. Migahin ko og oras sa pag-drowing og mga sundalo o superhero o mga hayop o bisan unsa lang nga ganahan nako nianang panahona. Sa pagsige nako og praktis, mas nahimo akong maayo niini. Akong nakita nga ang akong talento milambo pinaagi sa pagkugi, obserbasyon, ug paglahutay. Mibati ko nga ang Dios mihatag kanako og usa ka talagsaon nga gasa, ug gusto ko nga mouswag niini.

Sa unsang paagi nga ang imong misyon miandam kanimo alang sa kalampusan sa trabaho?

Ang akong misyon sa Korea ang mahinungdanon kaayo nga kini nakatabang kanako sa pagkat-on sa hugot nga pagtuo, pagdisiplina sa kaugalingon, ug pasalig sa kamaayo. Nahuman ko sa akong misyon uban sa mas dako nga pagbati sa pagsalig. Nahimo nako ang butang nga lisud ug milampus niini. Kini nakatabang gayud nako nga mahimong mas maayo nga estudyante sa kolehiyo.

Unsa nga bahin sa imong edukasyon nga nakatampo sa imong kalampusan?

Human sa akong misyon nagtuon ko sa painting ug sa pag-drawing sa University of Utah College sa Fine Arts. Dayon migahin ko og laing semester sa gawas sa nasud didto sa France sa pagtuon og art ug sa kultura sa Europe, nga nakapabukas sa akong mga mata ug mga hunahuna alang sa dungang artwork.

Tungod niini nga mga kasinatian, nakaangkon ko og igo-igong kalapad sa kahibalo sa artwork. Sa dihang migradwar ko gikan sa unibersidad, nadawat ko og trabaho sa usa ka tawo nga nangita og artist nga mobuhat sa Marvel’s Spider-Man and His Amazing Friends.

Pagkahimong Eksperto sa Computer: Ioana Schifirnet

Si Ioana nagtubo sa Romania ug nag-major sa Information systems sa Brigham Young University.

Unsa ang imong gibuhat isip batan-on nga nag-andam kanimo alang niini nga trabaho?

Wala mahitabo nga sa pagmata nako maayo na dayon ko sa pagprogram o pagdesinyo, nga maoy gisigihan nako og buhat karong panahona. Nasayud ko nga makuha nako ang trabaho nga akong gibuhat tungod sa dako kaayong panahon sa ginagmayng desisyon.

Wala ko mahadlok nga mokuha og lisud nga mga klase, ug ako migahin og panahon sa pagsiksik sa lain-laing mga natad ug ang mga tawo niini. Miduol usab ko sa mga propesyonal ug nakakuha og tambag gikan kanila. Sila nasayud sa maayo ug sa dautan nga bahin sa mga trabaho ug makatabang sa paghatag kanimo og pipila ka mga direksyon.

Unsa nga mga subject sa eskwelahan nahimong labing makatabang?

Sa akong kasinatian, ang labing makatabang nga mga hilisgutan sa high school, ug ilabi na sa kolehiyo, adunay kalabutan sa teknolohiya. Ang pagkat-on sa langyaw nga pinulongan (alang kanako, kini mao ang Iningles) nakatabang usab tungod kay kini nagtudlo kanako nga mahimong mas masinabtanon ug matinahuron sa ubang mga tawo ug mga kultura. Sa langyaw nga pinulongan mahimong dili dayon magamit sa usa ka trabaho, apan ang mga employer ganahan makakita nga duna kamoy dakong nakamahoan.

Unsa ang pipila ka kahadlok nga imong nasinati?

Sa batan-on pa ko, nahadlok ko nga dili nako makaplagan ang butang nga makalingaw nako. Dayon kon akong nakit-an, nahadlok ko nga wala koy ikasarang nga magmalampuson.

Normal lang nga mobati og kahadlok kon ang imong gipangitaan ug paagi ang makalingaw nimo, apan ayaw kini og pasagdi nga makaparalisar ninyo.

Giunsa nimo pagbuntog ang imong mga kahadlok?

Ang labing maayo nga butang nga nakatabang nako kay ang pag-adto ug pag-apil sa makahuluganong mga kalihokan, sama sa online tutorials ug sa pag-apil sa organisasyon. Diha miabut ang katin-awan, kahibalo, ug sa pagsalig. Ang usa ka grupo sa mga higala o club kansang mga sakop mipakigbahin sa ilang mga hilig mahimong usa ka gamhanan nga tinubdan. Ang kalibutan kanunayng nagkausab ug kanunayng adunay butang nga bag-ong makat-unan, apan kon ikaw aduna usa ka lig-ong sistema sa tabang ug talagsaong kahanas, ang paghimo niini mahimong makalingaw.

Pagpalambo og Gugma alang sa Ebanghelyo: Jess McSweeney

Si Jess, usa ka young adult gikan sa England, naghisgut kabahin sa iyang mga paningkamot isip usa ka tin-edyer nga magpabiling lig-on sa ebanghelyo.

Sa unsang paagi nga gipalig-on nimo ang imong pagpamatuod?

Sa tin-edyer pa ko nagtuon ko sa mga kasulatan tungod kay gitambagan ko sa mga lider sa pagbuhat sa ingon. Samtang ako nagtuon sa hugot nga pagtuo, naglaum alang sa akong pagpamatuod nga molambo, kana gayud ang nahitabo.

Karon, isip usa ka young adult, akong nakita nga ang akong tinguha nga makat-on ug molambo sa ebanghelyo miabut gumikan sa paagi nga ako kining magamit nga makaapekto sa uban. Ako nasayud nga ang tanan nakong nakat-unan makatabang sa uban ingon man usab ang akong kaugalingon.

Mihimo ka ba og mga tumong nga makatabang kanimo?

Sa dihang nagseminary ko, mihimo ko og tumong sa pagbasa sa mga kasulatan matag adlaw. Hinoon, sa dihang ang inadlaw nga pagtuon sa kasulatan nabatasan na, ang akong kadasig nga nausab. Misugod ko sa pagbasa dili lamang sa pagkab-ot og tumong apan usab tungod kay ako nahigugma sa mga kasulatan ug gusto nga malig-on ang akong pagpamatuod. Kana nga ganti dili mahikap, apan kini usa ka butang nga mahimo nakong sundon hangtud sa kahangturan.

Sa unsang paagi nga ang imong gugma sa ebanghelyo nakatabang nimo sa imong kinabuhi?

Pagpalambo og gugma sa pagkat-on sa ebanghelyo mao ang dili lamang kabahin sa pag-angkon og kahibalo; kini mao ang pagsabut ug paggamit sa mga baruganan sa ebanghelyo. Samtang nag-anad ko sa kinaiya sa pagpangutana ug mangita og tubag gikan sa mga kasulatan, ako nakabaton og pagpamatuod ingon man usab sa pagsalig sa pagpakigbahin sa mga butang nga akong nakat-unan sa uban.

Unsa ka importante ang pagtrabaho og maayo ug kakugi?

Pag-angkon og kahibalo sa bisan unsa nga mga dapit sa kinabuhi nagkinahanglan og panahon ug paningkamot. Apan alang kanako, ang pagkat-on sa ebanghelyo ni Jesukristo mao ang usa sa labing importante nga mga butang nga trabahoon pag-ayo. Kinahanglan magkat-on diha kang Kristo sa pag-angkon og pagpamatuod bahin Kaniya.

Pagmatuto sa Gagmayng Bata: Han Lin

Han Lin natawo ug nagdako sa Taiwan. Siya ug ang iyang asawa nabugkos sa Laie Hawaii Temple, ug sila karon nagpuyo sa Hawaii, USA, uban sa ilang duha ka mga anak.

Unsa ang imong pagpasabut sa usa ka maayong amahan?

Ang usa ka maayong amahan dili usa ka hingpit nga tawo, apan siya mao ang usa ka tawo nga mapainubsanon nga modawat og tambag gikan sa uban ug sa kanunay magtinguha sa pagpalambo sa iyang kaugalingon. Ang usa ka maayong amahan mouna sa iyang pamilya ug sa ilang mga panginahanglan. Siya ang andam nga mosakripisyo sa iyang panahon, personal nga interes, ug sa tanang butang aron sa paghimo sa iyang pamilya nga mas maayo. Siya maningkamot unsaon sa pagtabang ang matag usa sa sakop sa pamilya nga molambo ug mahimong sama kang Kristo.

Unsa ang imong gibuhat isip usa ka batan-on nga miandam kanimo kon asa ka karon?

Akong gibuhat ang akong labing maayo sa pagsunod sa mga sugo ug paghimo og maayong mga desisyon. Ang pag-adto sa seminary siguradong nakatabang usab. Kini usa ka dako nga pasalig tungod kay ako magmata sa alas 5:00 sa buntag. Hinoon, sa akong hunahuna nga ang pagbaton og mga higala nga susama nako og tumong nakatabang tungod kay mobayaw kami sa usag usa. Sa akong hunahuna ang tanang mga kalihokan nga among gihimo isip mga batan-on ug isip grupo sa maayo nga mga higala sa Simbahan nakatabang gayud namo.

Unsa nga mga mensahe gikan sa katilingban nga imong nabuntog aron mamahimong usa ka maayong amahan?

Ang kalibutan nagtudlo sa mga katawhan nga sila kinahanglan maglingaw lingaw ug minusan ang responsibilidad, apan ang pagtrabaho mahinungdanon aron magmalampuson sa bisan unsay imong buhaton. Ang pagkamaayong amahan nagkinahanglan sa tanang butang nga inyong mahatag; nagtubo ngadto sa pagkahingpit mao ang tibuok kinabuhi nga proseso—ako nagtubo uban sa akong pamilya.

Unsay imong ikasulti sa imong pagkatin-edyer ug sa ubang mga tin-edyer?

Ang tanan nagkinahanglan og mga higala, busa pakighigala sa maayo. Pakighigala sa mga tawo kinsa “matinguhaon nga moapil sa usa ka maayo nga katuyoan” (D&P 58:27). Pagkat-on gikan niining buotang mga higala, ug kamo maimpluwensya pinaagi sa ilang mga ehemplo ug tinguhaa nga mahimong sama kanila ug palamboa ang imong kaugalingon.

Buhata ang inyong pinakalabing maayo sa tanang butang nga gusto ninyong buhaton—ayaw pugngi ang bisan unsa nga butang. Niana nga paagi kamo walay pagmahay kon kamo molantaw sa nangagi.