Mensahe sa Visiting Teaching
Ang Kaminyoon Gi-orden sa Dios
Tun-i sa mainampuong paagi kini nga materyal ug tinguhaa nga masayud unsay angay nga ipakigbahin. Sa unsang paagi nga ang pagsabut sa “Ang Pamilya: Usa ka Pamahayag ngadto sa Kalibutan” mopalambo sa inyong hugot nga pagtuo sa Dios ug mopanalangin niadtong inyong giamumahan pinaagi sa visiting teaching? Alang sa dugang nga impormasyon, adto sa reliefsociety.lds.org.
Hugot nga Pagtuo, Pamilya, Kahupayan
Ang mga Propeta, mga apostoles ug mga lider padayon nga “balaanong namahayag nga ang kaminyoon tali sa lalaki ug babaye gi-orden sa Dios ug nga ang pamilya mao ang labing mahinungdanon sa plano sa Tiglalang.”1
Si Elder D. Todd Christofferson sa Korum sa Napulog Duha ka mga Apostoles miingon: “Ang pamilya nga gitukod diha sa kaminyoon sa lalaki ug babaye nagsangkap sa labing maayo nga kahimtang aron ang plano sa Dios molambo. …
“… Ni kita o laing mortal makausab niining balaang han-ay sa kaminyoon.”2
Si Bonnie L. Oscarson, kinatibuk-ang presidente sa Young Women, miingon: “Ang tanan, walay pagsapayan sa ilang sitwasyon sa kaminyoon o gidaghanon sa mga anak, makapanalipod sa plano sa Ginoo nga gihulagway diha sa pamahayag bahin sa pamilya. Kon kini plano sa Ginoo, kinahanglan nga ato usab kini nga plano!”3
Si Elder Christofferson mipadayon: “Ang uban ninyo nahikawan sa panalangin sa kaminyoon sa mga rason nga naglakip sa kakulang sa takus nga kaminyuan, pagkaibug sa sama nga sekso, pisikal o mental nga kakulangan, o kahadlok nga mapakyas. … O tingali naminyo mo, apan kana nga kaminyoon natapos. … Ang uban ninyo nga naminyo dili makaanak. …
“Bisan pa, … ang tanan makatampo sa pagpadayag sa balaang plano sa matag henerasyon.”4
Dugang nga mga Kasulatan
Genesis 2:18–24; 1 Mga Taga-Corinto 11:11; Doktrina ug mga Pakigsaad 49:15–17
Buhi nga mga Istorya
Si Brother Larry M. Gibson, kaniadto unang magtatambag sa kinatibuk-ang kapangulohan sa Young Men, nakahinumdom nga si Shirley, karon ang iyang asawa, miingon:
“‘Ako nahigugma kanimo tungod kay ako nasayud nga nahigugma ka sa Ginoo nga labaw pa sa imong paghigugma kanako.’ …
“Kana nga tubag miigo sa akong kasingkasing. …
“… [Ug] gusto ko nga siya mobati kanunay nga gihigugma nako ang Ginoo labaw sa tanan.”5
Si Elder David A. Bednar sa Korum sa Napulog Duha ka mga Apostoles mitudlo: “Ang Ginoong Jesukristo mao ang sentro sa pakigsaad nga relasyon sa kaminyoon. … [Hunahunaa] ang pagkabutang sa Manluluwas sa kinatumyan niini nga triangulo, ang babaye anaa sa ubos sa usa ka suuk ug ang lalaki sa ubos sa laing suuk. Karon hunahunaa unsay mahitabo sa relasyon tali sa lalaki ug babaye kon sila tagsa-tagsa ug makanunayon nga ‘moduol ngadto kang Kristo’ ug maningkamot nga ‘mahingpit diha Kaniya’ (Moroni 10:32). Tungod sa Manluluwas, ang lalaki ug babaye magkasuod.”6