Pagpadako og Takus nga mga Anak nga Lalaki

Janness Johnson, California, USA

Paghulagway pinaagi ni Stan Fellows

Daghang katuigan ang milabay, dihang usa ako ka single nga inahan, nabug-atan sa pag-amuma ug pagsuporta sa akong upat ka mga anak, usa ka dako-dako nga gasa gikan sa akong inahan ug igsoong lalaki nagtugot kanako nga makaeskwela og balik sa kolehiyo. Sa akong pagdrayb padulong sa eskwelahan, maghunahuna ko sa akong mga pangandoy ug damgo alang sa akong mga anak. Usa ko ka kinabig sa Simbahan. Ang akong gihambin nga tinguha mao nga sila adunay oportunidad sa pagtudlo sa ebanghelyo ngadto sa uban ug pagdala kanila sa kalipay nga akong gibati.

Usa ka buntag, samtang nagdrayb ko paingon sa eskwelahan, naghunahuna ko sa akong duha ka kinamagulangang anak nga mga lalaki, kinsa adunay 22 ka mga bulan ang gintang sa edad. Kon sila magserbisyo, ang kinamagulangan mahuman na sa iyang misyon sa dayong pagsugod sa iyang igsoon. Naglibog ko og maayo niini ug naghunahuna unsaon nako nga makatabang kanila sa pagbayad sa ilang mga misyon. Dili ako sigurado nga makakita og kwarta nga mapadala sa nahauna, wala pay labot ang ikaduha.

Kini nga kahasol nagpadayon sulod sa upat ka adlaw, samtang nag-ampo ko alang sa tubag. Sa ikalima nga adlaw miabut ang tubag: “Pagpadako og takus nga mga anak nga lalaki. Sayon ra makit-an ang kwarta; ang takus nga mga anak nga lalaki dili.”

Napuno sa kalinaw ang akong kasingkasing. Ang tubag layo ra kaayo sa akong mga problema sa kwarta nga nakalitan ko. Ang akong trabaho mao ang pagpadako og takus nga mga anak. Magpahigayon ko og family home evening, motambong sa simbahan, mopatambong sa akong mga anak sa seminary, ug motabang sa akong mga anak sa mga kalihokan sa Young Men. Makahimo ko sa pag-ampo, pagpuasa, ug pagbasa sa kasulatan nga kabahin sa among kinabuhi sa pamilya. Nasayud ko nga kon akong gibuhat ang akong bahin, ang akong mga anak makabaton og oportunidad sa pagserbisyo og misyon.

Agig dugang sa among buluhaton, kami adunay usa ka talagsaon nga home teacher kinsa nahigugma sa among pamilya. Siya ug ang iyang asawa matinud-anong mobisita matag bulan. Siya mitudlo og mga leksyon sa akong mga anak, mihatag kanila og mga panalangin, ug mitambong sa ilang mga kalihokan sa sports. Ang mga higala midala sa akong mga anak ngadto sa mga miting sa priesthood sa stake ug tibuok gabii nga pagkamping. Dihay mga miyembro sa stake kinsa mihatag nila og mga oportunidad sa pagtrabaho ug pangita og kwarta, mga silingan nga sama sa dugang nga parisan sa mga ginikanan, ug mga magtutudlo sa eskwelahan kinsa mitudlo kanila og disiplina ug pagkamakanunayon pinaagi sa akademik, musika, ug sa sports.

Sa dihang ang akong kinamagulangan nga anak nga lalaki nag-19, adunay kwarta alang sa iyang misyon. Ang resulta, adunay kwarta aron ang upat ka mga anak makaserbisyo. Sila miserbisyo sa Mexico ug Brazil ug sa South Carolina ug Virginia, USA. Ang duha ka kamanghuran nagkadungan pa gani sa pagserbisyo!

Kana nga kasinatian kanunay magpahunahuna kanako sa mga pulong sa Ginoo diha sa Isaias: “Kay akong mga hunahuna dili mao ang inyong mga hunahuna, ni ang inyong mga dalan akong mga dalan” (Isaias 55:8).

Ang mga pag-ampo matubag kon kita mosunod sa tambag nga atong nadawat, ug magsunod kanunay ang mga panalangin. Ako nasayud nga ang serbisyo nga gihatag sa akong mga anak ngadto sa Ginoo miusab sa ilang mga kinabuhi ug sa mga kinabuhi niadtong ilang gitudloan. Ang ilang pagserbisyo nakapanalangin sa among panimalay ug magpadayon sa pagbuhat sa ingon sa umaabut nga mga henerasyon.