Mga Pangutana ug mga Tubag
“Ang uban nakong mga higala naghunahuna nga ang pagsimba usik sa panahon. Unsaon nako sa pagtabang nila nga makakita nga kini mahimong usa ka dako nga panalangin?”
Usa ka pagtandi mahimong makatabang sa imong mga higala. Mahimo nimong ipasabut nga sama sa inyong lawas nga kinahanglang mokaon ug moinom ug pagkatulog ug ang inyong hunahuna nga kinahanglang makat-on, ang inyong espiritu kinahanglan usab nga pakan-on. Ang pagtambong sa simbahan makatabang kaninyo nga mapakaon ang inyong espiritu.
Mahimo ninyo kini pinaagi sa pagkat-on sa ebanghelyo ug pag-ambit sa sakrament, pagbag-o sa sagrado nga mga saad nga inyong gihimo ngadto sa Langitnong Amahan. Kini nga pagpamalandong ug pagpasalig makatabang kaninyo nga makadawat sa gisaad nga panalangin nga sa “kanunay makabaton sa iyang Espiritu uban [kaninyo]” (D&P 20:77). Ang pagbaton sa Iyang Espiritu uban kaninyo makapalig-on sa inyong pagtuo ug makatabang kaninyo nga mas mahisama kang Kristo.
Mahimo usab nga makigsulti ka sa imong mga higala kabahin sa ubang mga panalangin nga imong nadawat. Mahimo kang mosulti kanila kabahin sa kalinaw nga imong gibati sa simbahan, mopakigbahin og usa ka butang nga makatabang nga imong nakat-unan sa simbahan, maghisgot mahitungod sa usa nimo ka oportunidad nga moserbisyo, o mopamatuod nga ang pag-adto sa simbahan makatabang sa paghimo sa adlaw nga Igpapahulay nga usa ka kahimut-an (tan-awa sa Isaias 58:13–14).
Tingali ang labing gamhanan nga paagi sa pagtabang sa imong mga higala mao ang pagdapit kanila sa pag-adto ug tan-awon nila. Samtang sila motambong sa sakrament miting ug sa ubang mga miting kauban nimo, sila mahimong mobati sa gahum sa Espiritu Santo, makakat-on sa ebanghelyo, ug makakita sa mga panalangin niini sa kinabuhi sa mga miyembro.
Tuguti ang Espiritu nga Mogiya
Mahimo kang mopamatuod mahitungod sa pag-adto sa simbahan. Mahimo kang mopasabut kon sa unsang paagiha kini mipabati nimo og nindot ug unsa ka espesyal ang mga butang nga imong nakat-unan. Samtang mopamatuod ka, ang Espiritu motabang nimo nga mahibalo unsay isulti, ug ang imong mga higala masayud nga ang imong gisulti tinuod. Kon mas daghan sila og nahibaloan, mas mahimo silang interesado. Mahimo gani nimo silang dapiton nga moadto sa simbahan uban nimo.
Mikelle M., edad 13, Utah, USA
Dapita Sila nga Moadto sa Simbahan
Lisud nga dunay mga higala kinsa nagtuo nga ang pag-adto sa simbahan usik sa panahon, bisan kon kita mobati og kalipay alang kanila samtang kita motabang kanila nga masayud kon unsa ang giandam sa atong Amahan sa Langit alang sa matag usa kanila. Makatabang kita kanila pinaagi sa pagdapit kanila sa simbahan aron sila mobati sa kalipay nga maanaa sa usa ka gipahinungod nga meetinghouse ug pinaagi sa pagbaton og hugot nga pagtuo nga sila mobati sa gugma ngadto sa Langitnong Amahan ug makahibalo sa mga panalangin nga atong madawat pinaagi sa pagsimba.
Oscar Y., edad 19, Monagas, Venezuela
Magmaisugon
Ikaw makatabang kanila nga makasabut pinaagi sa yano nga pakig-istorya kanila, pagdapit kanila, paghatag kanila og mga kasulatan, o pagdapit gani sa mga misyonaryo ngadto sa ilang balay. Ayaw kaulaw. Magmalipayon tungod kay basin magpamiyembro sila sa Simbahan.
David H., edad 12, New Mexico, USA
Buhata ang Imong Bahin
Ang pag-adto sa simbahan dili usik sa panahon kon ikaw aktibong moapil ug maningkamot sa pagkat-on ug pagsabut kon unsa ang gisulti o gitudlo. Mahimo nimong bation ang Espiritu, ug usahay makahimamat ka og bag-ong mga tawo.
Ethan H., edad 15, Utah, USA
Ipadan-ag ang Imong Kahayag
Isip mga miyembro sa Simbahan, atong mapakita ang mga butang nga atong nakat-unan diha sa ebanghelyo ni Jesukristo. Ang pagpakita og maayong ehemplo ug pagpakita sa imong mga higala nga ikaw malipayon sa mga panalangin nga imong nadawat pinaagi sa pag-adto sa simbahan posibling makatudlo kanila nga ang pag-adto sa simbahan angay lamang.
Johanna R., edad 20, Surigao del Sur, Philippines
Pag-focus sa Sakrament
Ang pag-adto sa simbahan importante tungod kay kini mao ang dapit diin kita makabag-o sa atong pakigsaad sa bunyag ug sa tanan natong pakigsaad pinaagi sa sakrament. Ang Ginoo misaad nga ang Iyang Espiritu kanunay nga magauban kanato kon kita moambit sa sakrament sa takus nga paagi ug motuman sa atong bahin sa pakigsaad. Ang proteksyon, direksyon, ug kahupayan nga atong makuha gikan sa Espiritu importante alang sa atong inadlaw-adlaw nga kinabuhi. Kining talagsaon nga mga panalangin dili madawat sa lain nga paagi gawas sa pagtungha diha sa simbahan ug pag-ambit sa sakrament.
Diana R., edad 16, Oregon, USA
Paghupot og Mahangturon nga Panglantaw
Ang pagkasayud nga ang Simbahan mao ang gingharian sa Dios dinhi sa yuta, kita moadto sa simbahan matag Dominggo aron sa paghimo og usa ka lakang ngadto sa pagkahingpit ug ngadto sa celestial nga gingharian. Pinaagi sa pag-adto sa simbahan matag Dominggo, mas maduol kita sa Langitnong Amahan pinaagi sa pagbag-o sa atong mga pakigsaad (pag-ambit sa sakrament), ug atong timbang-timbangon ang atong kaugalingon aron makita kon unsa ang atong kahimtang sa espirituhanong paagi.
Esther M., edad 17, Kasai-Oriental Province, Democratic Republic of the Congo