Gibasa Niya ang Akong Pagpamatuod

Faith Watson, Utah, USA

Paghulagway pinaagi ni Allen Garns

Sa pagtubag nako sa telepono, akong nadungog ang naghinam-hinam nga tingog sa usa sa lokal nga mga full-time nga misyonaryo misulti nako bahin sa usa ka bunyag nga himoon sa pipila ka adlaw. Ang mga bunyag, siyempre, sa kanunay maoy rason sa kahinam sa mga misyonaryo, apan dili pamilyar nako ang ngalan sa sister nga bunyagan. Apan ang mga elder miinsister nga motambong ko sa bunyag kay may surprisa nga naghulat nako. Wala na siya mosulti pa og dugang.

Sa adlaw sa bunyag, misayo ko sa simbahan aron mahibaloan kon unsa ang surprisa. Apan wala ko kaila sa batan-ong sister—si Alice—nga bunyaganan, ug wala siyay gipakita nga nakaila siya nako.

Human ang matam-is, puno sa Espiritu nga bunyag, gigunitan ni Alice ang Basahon ni Mormon samtang siya mipamatuod sa katinuod niini ug mipahayag og pasalamat sa mga pagtulun-an niini, ilabi na sa pagsaksi niini sa Manluluwas. Sa iyang pagpamatuod, iyang gisugilon kon sa unsang paagi ang libro miabut kaniya. Nagtrabaho siya sa usa ka kiosk sa usa ka lokal nga shopping mall. Usa ka adlaw usa ka babaye ang miagi ug mihatag sa basahon ngadto sa iyang boss. Ang boss dili interesado ug gibutang ra kini sa estante.

Sa wala madugay, dihang nahuman na ang negosyo sa kiosk, ang boss miingon ni Alice nga ilabay ang basahon. Apan nakuryuso si Alice, gitan-aw og kadiyot ang basahon, ug nangutana kon pwedeng iyahon na lang ni.

Gidala ni Alice pagpauli ang Basahon ni Mormon, gibasa kini sulod sa pipila ka semana, ug nakombinser sa katinuod niini. Apan wala siya masayud unsay buhaton. Pipila ka bulan ang milabay nakakita siya og laing trabaho, diin siya nagtrabaho kauban sa usa ka Santos sa Ulahing mga Adlaw. Iya siyang gipangutana bahin sa Basahon ni Mormon ug sa Simbahan, ug siya ug ang iyang asawa midapit niya sa pakighimamat sa mga misyonaryo.

Dayon kini nga sister miingon nga ganahan siyang mobasa sa pagpamatuod nga gisulat diha sa atubangan sa iyang Basahon ni Mormon. Ang pagpamatuod gikan nako. Gisulat ko kini sa wala pa nako ihatag sa boss ni Alice didto sa kiosk.

Ang mga elder napuno sa pagmaya og pahiyom. Usa kini sa pinakatam-is nga surprisa nga akong nasinati sukad sa akong kinabuhi! Human sa bunyag, ang akong bag-ong sister sa ebanghelyo nagdali-dali aron mogakos nako.

Nalipay kaayo ko nga misaksi sa bunyag ni Alice ug maminaw sa iyang mapaubsanong pagpamatuod, nga naangkon gumikan sa pagbasa sa Basahon ni Mormon ug pag-ampo sigun sa tambag ni Moroni: “Kon kamo mangutana sa kinasingkasing, uban sa tinuod nga katuyoan, may hugot nga pagtuo diha kang Kristo, siya mopakita sa kamatuoran niini nganha kaninyo” (Moroni 10:4).

Puno gihapon ko sa dakong pasalamat nga nahimo kong usa ka gamayng bahin sa pagtabang og usa ka anak sa Dios nga makadawat sa panalangin sa ebanghelyo ni Jesukristo.