Ang Hingpit nga Kalipay sa Buhat sa Family History
Ni Elder Quentin L. Cook
Sa Korum sa Napulog Duha ka mga Apostoles
Gikan sa usa ka pakigpulong, “Our Father’s Plan Is about Families,” [Ang Plano sa Atong Amahan Mao ang mahitungod sa mga Pamilya] nga gihatag didto komperensya sa RootsTech 2015 Family History sa Siyudad sa Salt Lake, Utah, niadtong Pebrero 14, 2015. Bisitaha ang RootsTech.org aron makat-on og dugang mahitungod sa komperensya sa 2016 RootsTech.
Ang giklaro diha sa saad ni Elijah nga ang matag-usa kanato adunay obligasyon ngadto sa mga henerasyon nga nag-una kanato ug ngadto sa henerasyon nga mosunod kanato.
Ayaw gayud kalimti nga ang family history—ug ang mga ordinansa sa templo nahimo pinaagi niini—maoy usa ka mahinungdanon nga bahin sa buhat sa kaluwasan ug kanang pag-apil niining sagrado nga buhat alang sa patay nagpanalangin sa mga kinabuhi sa mga buhi. Kini magpalig-on sa atong pagtuo ug sa pasalig sa ebanghelyo, magtabang kanato sa pagbuntog sa tintasyon, makasuod sa atong mga pamilya, ug magpalig-on sa atong mga ward ug stake.
Gusto nakong hatagan og gibug-aton ang “pagpangita, pagdala ug ang pagtudlo” sa buhat sa family history. Pinaagi sa pagpangita, nagpasabut atong gamiton ang FamilySearch website o ang Akong Pamilya: Stories That Bring Us Together booklet1 sa pagpangita sa usa o mas daghan pa nga pangalan sa inyong mga katigulangan o sa ilang mga kaliwatan. Dayon dal-a kini nga mga ngalan ngadto sa templo, o ipagpakigbahin kini ngadto sa uban aron sila makadala kanila. (Kon mahimo, moadto sa templo isip usa ka pamilya.) Sa katapusan, tudloi ang inyong pamilya ug dayon tudloi ang uban sa pagbuhat sa ingon.
Paghulagway pinaagi ni Brad Teare; paghulagway sa litrato pinaagi ni Welden C. Andersen, Alexander Borges, ug Les Nilsson
Ang plano sa Atong Amahan mao ang mahitungod sa mga pamilya, nagsimbolo sa usa ka dako nga kahoy. Aron ang usa ka kahoy nga mabuhi ug motubo, nagkinahanglan kini sa mga gamot ug mga sanga. Kita usab kinahanglan nga makonektar ngadto sa atong mga kagikan—atong mga ginikanan, apohan, ug uban pang mga katigulangan—ingon usab ang atong mga sanga—ang atong mga anak, apo, ug uban pang mga kaliwat. Pipila ka makapatandog nga mga kasulatan migamit sa susama nga sugilanon sa usa ka kahoy nga may mga gamot ug sanga nagrepresentar sa pamilya (tan-awa sa Isaias 11:1; Jacob 5).
Ang Misyon ni Elijah
Ang propeta nga si Malaquias, sa katapusang basahon sa Daang Tugon, nanagna sa usa ka panahon nga si Elijah ang propeta mobalik dinhi sa yuta “sa dili pa moabut ang dako ug makalilisang nga adlaw sa Ginoo … [aron] iyang pabalikon ang kasingkasing sa mga amahan ngadto sa mga bata, ug ang kasingkasing sa mga bata ngadto sa ilang mga amahan, tingali unya [Siya] moabut ug samaran ko ang yuta pinaagi sa usa ka panghimaraut” (Malaquias 4:5–6).
Sa dihang si anghel Moroni mipakita sa 17 anyos nga si Joseph Smith niadtong 1823, siya mikutlo niining sama nga mga bersikulo gikan sa Malaquias apan gihimo kini nga lahi. Si Moroni miingon niana nga gabii sa Septyembre:
“Tan-awa, Ako mopadayag nganha kaninyo sa Pagkapari, pinaagi sa kamot ni Elijah ang propeta, sa dili pa moabut ang mahinungdanon ug makalilisang nga adlaw sa Ginoo.
“… Ug siya motanom diha sa mga kasingkasing sa anak sa mga saad nga gihimo ngadto sa mga amahan, ug ang mga kasingkasing sa mga anak mobati ngadto sa ilang mga amahan. Kon dili pa ingon niini, ang tibuok kalibutan pagalaglagon sa hingpit sa iyang pag-abut.” (Joseph Smith—Kasaysayan 1:38–39.)
Upat ka higayon nga si anghel Moroni mibalik-balik sa mga pulong ni Malaquias ngadto sa batang lalaki nga si Joseph.
Hunahunaa kon ang tanan natong nasayran mahitungod niining talagsaon nga propeta nga si Elijah maoy nahibaloan ni Joseph Smith gikan sa Biblia. Gikan niana nga basahon sa kasulatan atong nahibaloan nga si Elijah nagpuyo sa usa ka panahon sa kagubot, hapit 900 ka tuig sa wala pa ang pagkatawo ni Kristo. Ang duha ka dautan nga sila si Ahab ug Jezebel mihari sa Israel diha sa kadautan isip hari ug mga reyna, midasig sa mga ulipon sa pagsimba sa mini nga dios nga Baal ug mibuno sa mga propeta sa Ginoo, lakip sa uban.
Si Elijah usa ka talagsaon nga propeta. Mga Kristiyano ug mga Judeo sa tibuok kalibutan midawat sa asoy sa Daang Tugon bahin ni Elijah.
Narekord sa mga kasulatan kon sa unsang paagi nga ang kinabuhi ni Elijah milagrong napreserbar ug giunsa niya sa pagluwas ang usa ka balo gikan sa kagutom ug mipabangon sa iyang anak nga namatay (tan-awa sa 1 Mga Hari 17). Si Elijah mihulagway kon sa unsang paagi nga “ang usa ka hinay nga hinagawhaw nga tingog” mipasalig pag-usab kaniya nga siya wala nag-inusara sa iyang debosyon ngadto sa Ginoo (tan-awa sa 1 Mga Hari 19:4–14). Sa katapusan, si Elijah nahimaya ug gidala ngadto sa langit nga wala makatilaw og kamatayon (tan-awa sa 2 Mga Hari 2:7–12).
Detalye gikan sa Ang Transpigurasyon, ni Carl Heinrich Bloch
Pinaagi lamang sa modernong pagpadayag nga ang hingpit nga tahas ni Elijah gipadayag. Siya ang katapusang propeta nga naghupot sa gahum sa pagbugkos sa Melchizedek Priesthood sa wala pa ang panahon ni Jesukristo. Uban ni Moises, siya mipakita ngadto sa Manluluwas ug nilang Pedro, Santiago, ug Juan didto sa Bukid sa Transpigurasyon sa tunga-tungang panahon (tan-awa sa Mateo 17:1–4; Marcos 9:2–5). Isip usa ka mahinungdanon nga elemento sa Pagpahiuli, si Elijah mipakita kang Joseph Smith ug Oliver Cowdery niadtong 1836 didto sa Templo sa Kirtland. Didto, iya usab nga gipahiuli ang mga yawe sa gahum sa pagbugkos, niining higayona alang sa pagbugkos sa mga pamilya niini nga dispensasyon agi og katumanan sa panagna ni Malaquias (tan-awa sa D&P 110:13–16). Tungod kay si Elijah gipadala niini nga dispensasyon, ang kahingpitan sa kaluwasan anaa na alang sa mga buhi ug sa mga patay.
Ang misyon ni Elijah makatabang pinaagi sa usahay gitawag og ang espiritu ni Elijah, nga, sama sa gitudlo ni Presidente sa Russell M. Nelson, Presidente sa Korum sa Napulog Duha Ka mga Apostoles, mao ang “pagpakita sa Espiritu Santo nga nagsaksi sa balaanong kinaiya sa pamilya.”2 Mao nga kasagaran atong gitawag ang mga pagpakita sa Espiritu Santo nga may kalabutan sa buhat sa family history ug templo ang espiritu ni Elijah.
Kadtong mga nangamatay nga nauna kanato, atong mabasa sa Doktrina ug mga Pakigsaad nga “kita kon wala sila dili mahimo nga hingpit; ni sila kon wala kita” (D&P 128:18). Unsa man ang buot ipasabut niini? Atong makita-an ang tubag diha sa kasulatan:
“Ug karon, akong hinigugma nga mga igsoon nga mga lalaki ug babaye, mopasalig ako kaninyo nga kini mao ang mga baruganan kalabut sa mga patay ug sa mga buhi nga dili kahatagan og gamay lamang nga pagtagad, ingon kalabut sa atong kaluwasan. Kay ang ilang kaluwasan gikinahanglan ug mahinungdanon sa atong kaluwasan, sama sa gisulti ni Pablo mahitungod sa mga amahan—nga sila kon wala kita dili mahingpit—ni kita kon wala ang atong mga patay mahingpit” (D&P 128:15; emphasis gidugang).
“Ang ilang kaluwasan gikinahanglan ug mahinungdanon sa atong kaluwasan” nagpasabut nga ang kaluwasan sa tibuok tawhanong pamilya nagsalig sa usag usa ug sumpay-sumpay—sama sa mga gamot ug sanga sa usa ka dako nga kahoy.
Magpahigyon og Tigum alang sa Paghisgut sa Family Tree
Ang mga pasalig sa pamilya ug mga pagdahum kinahanglan maoy una sa lista sa mga prayoridad. Kini mopanalipod sa atong balaanon nga kapadulngan. Aron makasugod ang mga pamilya sa ilang buhat sa family history, ako mohagit kanila sa pagpahigayon sa akong gitawag og “Magpahigyon og Tigum alang sa Paghisgut sa Family Tree.” Kinahanglang pabalik-balik kini nga paningkamot. Ang tanan mahimong magdala og unsay anaa na nga mga family history, mga istorya, ug mga litrato, lakip ang inampingan nga mga kabtangan sa mga apohan ug ginikanan. Ang My Family nga booklet mahimong gamiton sa pagrecord sa impormasyon sa pamilya, mga istorya, ug mga litrato nga ma-upload ngadto sa Family Tree diha sa FamilySearch.org.
Hinoon, kini dili mahimong kausa lang nga paningkamot. Nagkinahanglan kini og kakugi sa tibuok kinabuhi. Alang niadtong nangita og mas mabungahon nga mga paagi sa pagsunod sa adlawng Igpapahulay isip pamilya, ang pagpadali niining sagrado nga buhat mao ang epektibong paagi sa pagbuhat sa ingon.
Ang sentro sa family history mao ang panimalay. Kinahanglan natong tabangan ang atong kabatan-onan nga molambo ang gugma alang niini nga buhat. Daghan sa atong kabatan-onan mipabalik na sa ilang mga kasingkasing ngadto sa ilang mga amahan. Ang atong kabatan-onan naghinamhinam makat-on kabahin sa kinabuhi sa mga sakop sa pamilya—asa sila gikan ug unsa ang kahimtang sa ilang pagpuyo. Ang pipila nalingaw kaayo mahitungod sa buhat nga wala na sila makabantay sa oras nga milabay ug masagmuyo kon sila mohunong.
Ang kabatan-onan ganahan og mga istorya ug mga litrato, ug karon masayon nalang ang ilang pag-access sa mga teknolohiya aron sa pagpreserbar niadto nga mga panumduman sa Family Tree sa FamilySearch.org. Ilang makaplagan ang ilang mga sakop sa pamilya kinsa nagkinahanglan sa mga ordinansa sa templo pinaagi sa bag-ong gipagawas nga “record-hinting” experience FamilySearch.org.3
Kini nga mga record hint mahitungod sa mga sakop sa pamilya nahimo pinaagi sa mga paningkamot sa mga miyembro sa indexing sa Simbahan sa tibuok kalibutan. Kini nga mga rekord—ug adunay mga minilyon niini—nga makatabang sa inyong pagpangita og dugang pa nga mga katigulangan kinsa tingali dili na konektado sa inyong pamilya ug kinsa nanginahanglan og mga ordinansa nga ipahigayon alang nila diha sa mga templo. Ang ubang mga rekord gikan sa tibuok kalibutan nga dunay hinting technology diha sa mga website naglakip sa Ancestry.com, Findmypast.com ug MyHeritage.com, diin ang tanang mga miyembro sa Simbahan maka-access nga libre.
Bisan tuod ang sentro sa family history mao ang panimalay, ang Simbahan mopadayon sa pagsankap og mga sentro sa family history diin mag-uban silang makakaplag sa ilang mga katigulangan ug makaaccess sa Internet kon kini wala pa sa panimalay.
Tanang takus nga mga miyembro sa Simbahan nga nag-edad og 12 ug pataas makakuha og recommend sa templo sa may kinutuban nga gamit sa pagpahigayon og mga bunyag alang sa mga patay human sa usa ka interbyu uban sa usa o duha ka eklesiastikanhong mga lider. Kini naglakip sa tanang bag-ong mga kinabig.
Ang pag-angkon og usa ka pinirmahan nga recommend nga inyong ikapakita sa bisan asa nga templo mao ang hingpit nga kalipay. Ang reccomend nagdala usab og sagrado nga mga panalipod. Isip Presidente sa Korum sa Napulog Duha ka mga Apostoles, si Presidente Boyd K. Packer (1924–2015) miingon:
“Walay buhat nga mas labaw pa nga panalipod ngadto niini nga Simbahan kay sa buhat sa templo ug sa pagsiksik sa family history nga nagsuporta niini. Walay buhat nga mas labaw pa ka makalimpyo sa espirituhanong paagi. Walay buhat nga atong gihimo nga mas naghatag kanato og dugang gahum Walay buluhaton nga nagkinahanglan og labaw ka taas nga sumbanan sa pagkamatarung.
“Ang atong mga gipangtrabaho diha sa templo motabon kanato og usa ka taming ug usa ka panalipod, sa indibidwal nga paagi ug isip usa ka katawhan.”4
Ang atong Obligasyon ngadto sa Atong mga Katigulangan
Ang family history usa ka relasyon sa pamilya, apan dili tanan nga mga sakop sa pamilya nag-atubang sa sama nga sitwasyon. Daghan sa atong mga katigulangan namatay nga wala maminyo o makabaton og mga anak. Ang uban nagkabulag, ug naminyo og pipila ka mga higayon. Adunay daghan nga mga bata kinsa adunay kakulangan o kinsa namatay nga batan-on. Ang tanan adunay usa ka istorya.
Matag kalag, buhi o patay, kinsa mao ang manubag sa iyang mga binuhatan nagkinahanglan og mga panalangin sa sagrado nga mga ordinansa, ug kita makatabang sa mga sakop atong pamilya nga makadawat niini. Dili igsapayan kon kamo dili minyo, kon ang inyong bana o asawa dili kaayo aktibo, o kon kamo mismo dili kaayo aktibo o gani usa ka miyembro sa Simbahan, kamo usab makatabang sa kaluwasan sa mga kalag. Mahimong wala nay laing mas importante, makatagbaw o mahimayaong buhat.
Paghulagway pinaagi ni Robert T. Barrett
Ang pangulo niini nga buhat mao ang atong Ginoo ug Manluluwas, Si Jesukristo. Human sa Iyang kamatayon, Siya miabli sa pultahan sa bilanggoan nga mibihag sa mga patay:
“Siya mihan-ay sa iyang pundok ug mitudlo ug mga sinugo, sinul-uban uban sa gahum ug pagtugot, ug gitugyan kanila ang paglakaw ngadto ug pagdala sa kahayag sa ebanghelyo ngadto kanila nga anaa diha sa kangitngit, bisan ngadto sa tanan nga mga espiritu sa mga tawo. …
“Ug pinili nga mga sinugo miadto ngadto sa pagpahayag sa adlaw nga ikahimuot sa Ginoo ug gipadayag ang kalingkawasan sa mga binilanggo kinsa ginapos, bisan ngadto kinsa maghinulsol sa ilang mga sala ug modawat sa ebanghelyo.” (D&P 138:30–31).
Ang atong mensahe yano, apan kini lawom. Wala kini magkinahanglan makahingangha nga mga pinulongan o lisud nga mga doktrina. Kini mao ang pagbaton og usa ka masulub-on nga kasingkasing ug mahinulsulon nga espiritu ug usa ka pasalig sa pagsunod sa atong Manluluwas.
Isip usa ka Apostol ni Ginoong Jesukristo, ako mosaad nga kon inyong ipalapas ang inyong panlantaw sa panahon ug sa pagka-mortal ug motabang niadtong kinsa dili makatabang sa ilang mga kaugalingon, kamo mapanalanginan uban sa dugang nga kasuod ug hingpit nga kalipay sa inyong pamilya ug uban sa balaang proteksyon nga ihatag niadtong kinsa matinud-anon sa Iyang pagserbisyo.
Ang giklaro sa saad ni Elijah nga ang matag-usa kanato adunay obligasyon ngadto sa mga henerasyon nga nag-una kanato ug ngadto sa henerasyon nga mosunod kanato. Hinaut kamo mga ginikanan, kabatan-onan ug mga kabataan makakaplag og hingpit nga kalipay ug mabulahan sa matag aspeto sa inyong kinabuhi samtang kamo nagtuman sa mga obligasyon nga gipadala gikan sa langit sa pag-apil sa sagrado nga buhat alang sa mga patay.