Kabatan-onan
Usa ka Pundasyon sa Akong Pagpamatuod
Ang tagsulat nagpuyo sa Idaho, USA.
Sa dihang nag-edad pa ko og 16, usa ka higala miabut sa among panimalay kuyog sa mga misyonaryo. Sulod sa usa ka bulan sa unang panaghisgutan, ang tanan nakong pangutana nahatagan og katin-awan. Akong nabati ang Espiritu Santo nga mipamatuod sa katinuod sa mga mensahe mahitungod saPagpahiuli. Walay bisan unsang butang nga akong nabati nga sama niadto, ug nasayud ko nga kining tanan tinuod.
Bisan pa niana, nakasinati ko og mas daghang pagsalikway ug oposisyon kay sa kaniadto. Mibati ko nga nag-inusara, gikapoy ug naglibug. Kon ako nagbuhat sa hustong butang, nganong nakasugat man ko og daghan kaayong kalisdanan? Dili nako masabtan kon sa unsa nga paagi nga ang akong mga pagsulay alang sa akong kaayohan. Ang mga misyonaryo mitudlo nako nga pagpuasa ug pag-ampo, bisan og anaa pa sa klase sa ting-eskwela. Sa dihang dili na madala ang mga panghitabo akong ibubo tibuok kong kasingkasing sa pag-ampo ug diha diha dayon mabati ang paghupay sa Espiritu.
Sa semana sa akong bunyag puno sa mga pagsulay. Ang akong boss mihulga nga paphaon ko sa trabaho kon dili ko mopalta sa akong bunyag aron mopuli sa usa ka tawo sa trabaho, milandig ko sa ospital tungod sa bato sa pantog, ug ang akong mga ginikanan mipapahawa kanako sa among panimalay. Uban sa daghan kaayong mga kakulian, ang bugtong butang nga akong mahimo mao lang ang pagdangup ngadto sa Ginoo.
Matag usa niadto nga mga pagsulay nahimong kaayohan alang nako. Nakatabang kini nako nga makat-on mahitungod sa mga doktrina sa ebanghelyo, nga nakahatag nako og pundasyon alang sa akong pagpamatuod.