O Le Molimaua Ethan
E alala le tusitala i Iuta, ISA.
Sa foliga mai sa tofu tagata uma ma se molimau ae vagana ai Ethan.
“Faalogo, faalogo. O le a musumusu mai le Agaga Paia. Faalogo, faalogo i le leo malu itiiti” (Children’s Songbook, 106).
Sa saofai Ethan i le taimi o le fetufaaiga ma tilotilo atu i luga i lana uo mamae, o Samu, ao faasoa lana molimau. Sa saofai lana uo o Sara i luga o le tulaga, e faatalitali i lona taimi. Sa talanoa Samu e uiga i se galuega faatino na ia faia. Sa ia fai mai e i ai sana molimau e uiga i le auauna atu. Sa tuuina mai e Sara lana molimau e uiga i aiga. Sa alu atu foi le faiaoga o Ethan ma faasoa atu lana molimau. Sa ia talanoa e uiga i le galuega faalemalumalu. Na molimau uma mai i latou e moni le Ekalesia. Sa foliga mai sa tofu tagata uma ma se molimau ae vagana ai Ethan.
“O le a se mea e i ai sau molimau e uiga i ai?” O le tau mafaufau lea a Ethan.
Sa toe mafaufau o ia i tua i nai tausaga i le taimi na latou papatiso ai ma ana uo. Sa lauga ai lona faiaoga Peraimeri, o Sister Calder e uiga i le Agaga Paia.
“O le Agaga Paia e mafai ona tuuina atu ia te oe se lagona mu i lou loto. E mafai ona fesoasoani o Ia ina ia e iloa le mea moni,” sa ia fai mai ai. “Ma o le auala lena e te maua ai se molimau e uiga i mea ua e talitonu i ai.”
Sa taumafai Ethan e fai le mea sao ina ia mafai ona ia lagonaina le Agaga Paia. Sa ia faitau i tusitusiga paia ma tatalo. Ae na te lei mauaina lava lena lagona mu lea na talanoa mai ai tagata. Pe o le uiga ea la, e lei i ai sana molimau?
Sa mau lenei fesili i le ulu o Ethan i le aso atoa na sosoo ai. Sa mafaufau pea i ai ao la tietie laupapa faasee faiuili ma Samu ina ua tuua le aoga. Sa manatunatu o ia pe faapefea ona ia fesili atu ia Samu e uiga i ai.
“E, Samu,” na iu lava ina fesili atu ai Ethan, “sa e fefe i le taimi na tuuina mai ai lau molimau ananafi?”
Sa oso ese Samu mai lana laupapa ae savali i luga o le mutia. “E leai,” sa ia fai mai ai, ma saofai i lalo. “Sa ou faasoaina atu lau molimau i le lotu a le matou aiga i le po na muamua atu.”
Sa saofai atu ai foi ma Ethan ma tuu lana laupapa faasee faiuili i luga o ona vae. “Ae na faapefea ona e iloa na i ai sau molimau?”
“Ia, sa ou tatalo ma maua ni lagona lelei e uiga i ai.”
Sa luelue lemu le ulu o Ethan ma vili se uili i lona lima. I se isi itu sa manao o ia na te maua se lagona faapena.
I lena po, ina ua pogisa ma filemu le fale, sa tootuli ai Ethan i aufata o lona moega e tatalo.
“Le Tama Faalelagi,” na ia fai atu ai, “faamolemole fesoasoani mai ia te au ia maua sau molimau. Fesoasoani mai ia ou iloa e moni le Ekalesia. O Iosefa Samita o se perofeta. Ma e moni le Tusi a Mamona.”
I le ogatotonu o lana tatalo, na taofi ai le tatalo a Ethan. Sa mafaufau o ia mo se minute. Ona ia fesili ifo lea ia te ia lava, “Ia, ua ou iloa ea la se mea?”
Ona oo mai ai lea o se lagona malie, ma filemu i ona luga. Sa le o se lagona mu malosi. Ae na iloa e Ethan, o le Agaga Paia lena.
Na oo mai se manatu i le mafaufau o Ethan: “Ou te iloa ua ou iloa.” Ma ao mafaufau i ai o ia, sa ia iloaina ai, sa ia lagonaina muamua lenei lagona toafilemu.
Soo se taimi lava na ia faitauina ai le Tusi a Mamona, sa lelei ma sao le faalogona. O lenei ua ia iloa o lena lagona o le Agaga Paia ua molimau mai ia te ia. Ina ua alu o ia i le lotu ma sa lelei ma sao le faalogona iina, o le Agaga Paia foi lena. Sa ia mauaina lava se molimau!
Sa lei manaomia ona ia iloaina mea uma i le taimi lenei. Ae na ia iloa e moni le Agaga Paia ma e mafai ona fesoasoani ia te ia e fausia pea lana molimau.
Sa amata ona toe tatalo Ethan. Ae o le taimi lenei, e fai atu ai faafetai lava.