Talaaga Otooto o Talavou Matutua
Fuaina o Faamanuiaga i Matakasa
E ui lava i le fetuatuanai faaupufai ma faigata o le tamaoaiga i lona atunuu, e faalagolago Solofo i faamanuiaga e oo mai mai le ola ai i le talalelei.
Ata na pueina: pito i luga na tuuina mai e Solofo Ravelojaona; pito i lalo © iStock/Thinkstock
Ina ua uma ona mafatia lona toalua i le nutimomoia i se maitaga na fafano i lona maitaga muamua, sa lagona e Solofo Ravelojaona e faapea, na taliina a laua tatalo i se tausaga mulimuli ane i le la maitaga lona lua. Sa mafaufau i laua ma lona toalua o Hary Martine i le fanau mai o le la tama teine o se tasi lea o o laua faamanuiaga silisili. Na faamatala e Solofo, “Ona sa ma ole atu i le Atua ma na Ia tuuina mai o ia ia i maua, o lea na ma faaigoaina ai o ia, i se igoa e faauigaina i le [gagana] Malakasi o le ‘tali a le Atua.’”
O Solofo, o se talavou matua mai Matakasa, o loo taofi mau pea i le malamalama e faapea, e tali mai le Atua i tatalo ma faamanuia mai i e faamaoni i le taimi e tatau ai. “O le olaga e faigata,” o le tala lea a Solofo, “ma a le maua e tagata mea latou te mananao ai, e amata ona tuufesili isi, ‘Aisea na tupu ai lenei mea ia te au?’ Latou te ono tuua le Ekalesia pe fesiligia o latou talitonuga i le Atua. Ae a tatou ola i le talalelei ma faitau i tusitusiga paia, e sili atu ona faigofie. Pe a tatou ola moni lava i le talalelei, e mafai ona e iloa lelei ia faamanuiaga.”
O le ola ai i se atunuu e ogaoga luitau, e pei o le malosi o le mativa, le mautu i le faigamalo, o le vaivai o galuega tetele, ma faalavelave faanatura, e manino lava le pogai ua fai mai ai Solofo e faigata le olaga. Ae mo ia, o faamanuiaga e aumaia e le ola ai i le talalelei e sili mamao atu nai lo soo se faigata. “E le mafai ona ou faitaulia faamanuiaga ou te maua, pe a ou ola i le talalelei,” o lana tala lea.
Ona e fai lava si fou o le Ekalesia i Matakasa (o le paranesi muamua sa faatuina i le 1990), fai mai Solofo, o le vaega aupito faigata i le avea ai ma se tagata o le ekalesia o talafeaveai ma manatu sese e uiga i le Ekalesia. Fai mai Solofo, e pei lava o le faaaliga a Liae i le laau o le ola, “atonu e le mafai ona talia atoatoa e tagata le talalelei ona latou te lagona le maasiasi i luma o a latou uo ma fefefe ina nei teena i latou e o latou aiga.” O le mea e ese ai Solofo, na ia fautua mai ai o le, “Ou te lei maasiasi lava. Ou te ola i le talalelei, ma ou te manao i taimi uma e faasoa atu i au uo, e ui o nisi o i latou e le mananao i ai.” E masani ona ia faasoa atu lana molimau faatauvaa, i le tele o taimi o lea na faaigoa ai o ia e tagata latou te faigaluega o le “faifeau.”
I le lotolotoi o fesouaiga o le tamaoaiga ma faaupufai, o loo faalagolago ai Solofo ma Hary Martine i faamanuiaga o a laua feagaiga o le malumalu (sa laua faaipoipo i le Malumalu o Johannesburg Aferika i Saute ina ua taitasi tausaga talu ona maea a laua misiona—o Solofo i Uganda, ao Hary i Matakasa), faapea foi ma lo laua faalagolago i le Alii. “Ua ia te au le talalelei, ma ua tuu atu lava lou ola i aao o le Atua,” o le faamalamalama mai lea a Solofo. E mafai ona ia faalagolago i lana molimau mausali aua ua i ai lona faatuatua i “tali a le Atua.”