O Peso mo le Tama Faalelagi
E alala le tusitala i Karolaina i Matu, ISA.
“Tausi poloaiga. O i ai le malu ma le filemu” (Tusipese a Tamaiti, 68).
Na lamu e Ana lana fasi totila mulimuli. Sa vaivai ma manaia tele. E ese le fiafia o Ana i totila a lona tinamatua. O le vaega sili lea ona manaia o le ti i le taeao.
Sa vaavaai atu Ana ao fufulu e lona tinamatua o Apuela ia ipu.
Sa pei lava o isi taeao. Ae e tasi le mea sa le tutusa ai.
O Apuela sa masani ona savali atu i le maketi e faatau mai ni meaai. Ae sa lei alu ananei. O nei, sa leai se tupe e faatau ai se meaai.
“Po o le a le mea o le a ma aai ai taeao?” O le manatunatu lea o Ana.
Ona manatua lea e Ana. Sa na iloaina le mea sa i ai se tupe! O anapo sa ia vaai atu ai o tuu e Apuela ni nai peso i se fasi ie paepae.
“Apuela, na galo ia te oe? O loo i ai lau tupe e faatau mai ai le meaai.”
“O le a le tupe?” O le fesili lea a Apuela.
Sa tamoe Ana e aumai le tupe. Sa ia luluina le tamai ato o siliva. Kiligi! Kiligi!
Sa ataata Apuela. “Ana, o le ta sefuluai lena. O Lana tupe lena.”
“Ae o le a se ta meaai o taeao?” Sa fesili ai Ana.
“Aua le popole,” o le tala lea a Apuela. “Ou te faatuatua o le a fesoasoani mai le Tama Faalelagi ia i taua.”
O le taeao na sosoo ai sa avatu ai e Apuela le totila sana mulimuli ia Ana. Ona ia saofai lea i lalo i lona nofoa. Sa ia suiina ni fugalaau lanumumu i luga o se ofu ma faamatala ni tala e uiga i le taimi ao laitiiti o ia. Sa lei foliga popole o ia.
Ona faalogoina lea e Ana se tuitui. Sa tamoe atu o ia e tatala le faitotoa.
“Uncle Pedro!”
“Sa ou maua se lagona e tatau ona ou asiasi mai ia oulua ia,” o le tala lea a Uncle Pedro. Sa ia tuu ni taga se tolu i luga o le laulau. O le tasi sa i ai ni falaoamata sana mo totila. O le isi sa i ai aano o manufasi. O le isi sa i ai fualaau faisua fou mai le maketi.
“Oi, talofa e, isi au tama,” o le tala lea a Apuela. “O le a ou faia mo oe lau supo aano manufasi e sili ona lelei!”
“O lau soup o le supo sili lea ona manaia i le lalolagi,” na fai mai ai Uncle Pedro.
Na ata Ana ma patipati ona lima.
Ona toe taofi lea. E tasi le mea sa ia fia iloaina. “Apuela, na e iloa o le a sau nei Uncle Pedro? Pe o le mafuaaga lena sa e lei popole ai?”
“E leai,” na fai mai ai Apuela. “Pe a ou totogia lau sefuluai, ou te faatuatua o le a faamanuia au e le Tama Faalelagi. Ma sa Ia faamanuia mai!”
Na fusi e Ana ia Apuela. Sa ia lagonaina na pei o ia o le teineitiiti ua sili ona fiafia i Mekisiko. Sa i ai lo laua faatuatua ma Apuela i le Tama Faalelagi. O lenei la ua tau le mafai ona ia faatali e ai i le supo manaia a Apuela!