Fesili & Tali
“E ulagia au i le aoga ona o le avea ma se AAG. Ua ou iloa e tatau ona ou tu atu mo ou talitonuga, ae e ese le faigata! E faapefea ona lava lou lototele?”
E sao oe, e te manaomia le lototele e faafetauia ai lenei tulaga. Manatua foi, na poloai mai Iesu Keriso, “Tutulai ia ma susulu atu, ina ia avea lo outou malamalama ma tagavai mo atunuu” (MF&F 115:5). Ae o le i ai o le lototele e faasusulu atu ai lou malamalama, e mafai pe le mafai foi ona faauigaina i le tautala atu e faasaga ia i latou o e tauemu ia te oe.
I soo se tasi o ia tulaga, e mafai ona e faatagaina mea faafeagai e musuia oe ia sili atu ona lelei. A o e galue malosi e faamalosia lau molimau, e mafai ona e atiina ae le ituaiga o lototele filemu, lea o le a fesoasoani e te tautala atu ai, pe na o le faaauau pea ona faia le mea sao, e tusa lava pe tauemu mai isi.
O le ulagia e mafai ai ona faaoso le le fiafia, ae ia manatua e mafai ona e tatalo ina ia faatumulia i le alofa mama ina ia mafai ona lagona e isi le alofa o Keriso e ala atu ia te oe (tagai i le Moronae 7:48). Talu ai e tulaga ese ia tulaga uma, ia saili le taitaiga a le Agaga ia iloa ai le ala e tali atu ai i se auala faaKeriso i mea taitasi.
E faalagolago lava i le tulaga, atonu e sili ona lelei le talanoa faalilolilo ma i latou o e na ulagia oe, ia pe tau lava o le le ano i taufaifaiga faalealofa ao faaauau pea ona e ola i ou talitonuga. Afai e le fiafia isi i mea e tatau ona e fai atu ai, o ou faataitaiga o le agalelei, lotofaamagalo, ma le faamaoni atonu o feau sili na ona lelei e mafai ona e auina atu.
Faaali Atu le Lototele Moni
O i latou e ulagia oe, atonu e le tuua ona ua e toa e fai atu ia i latou e taofi, ae atonu latou te tuua pe a e faaaogaina lou lototele e ala i le ola ai i le ituaiga tagata ua avea ai oe—o se Au Paia o Aso e Gata Ai. E toetoe lava o le taimi lena, o le a susulu mai ai le faamaoniga o lou Tama Faalelagi i ou luga, ma faamoemoe e matala ai o latou mata i le talalelei toefuataiina i o latou olaga.
Bright U., 17 tausaga, Setete o Imo, Nigeria
Ia Maua le Malosi i Aoaoga Faavae Autu
O le tatalo ma le anapogi e taua aua o le a fesoasoani ina ia mafai ona e fetaiai ma tausuaga ma luitau i le aoga, e pei ona sa feagai Iesu Keriso ma le tele o tauemuga ao i ai o Ia iinei i le lalolagi. O le a fesoasoani e te atiina ae ai le alofa faateleina ma le onosai i tagata.
Walter C., 15 tausaga, Jaén, Peru
Ia Taialaina e ala i le Tatalo
Sa umi se taimi sa nao au ai le tagata o le Ekalesia i lau aoga. Na foliga mai na malamalama au uo mamae ia te au, ae o isi uo i le aoga sa taufaalilili ia te au. I se tasi aso sa ou tatalo ma lagona ai le tatau ona ou talanoa i se tasi o i latou o e na uunaia isi e taufaalili ia te au. Sa ou faamalamalama atu faapea, ou te lei lagonaina le ita ia te ia, ae sa ou fai atu ia te ia e aumai ia te au le faaaloalo na te manao foi e maua. Ina ua uma ona faalogo i le ma talanoaga, sa faapea ona puipuia au i taimi uma e se tasi o ou faiaoga pe a ia vaaia se mea o tupu. Ou te iloa o le a faatasi le Alii ia te oe ao e talanoa atu i nei tagata.
Shanela S., 14 tausaga, Pangasinan, Filipaina
Atinae Lau Molimau
Muamua, ia maua se molimau moni o upumoni e te manao e faasoa atu i isi. Ona alofa lea i tagata e ula [ia te oe] ma aua nei faia ni finauga, aua o finauga e le lagolagoina e le Atua (tagai i le 3 Nifae 11:29). O le mea aupito sili ona taua, ia taumafai ia faatasi e le aunoa le Agaga ia te oe. O le a fesoasoani le Agaga ia te oe ia e maua le alofa faateleina ma le lototele faateleina, ma o le a Ia faamamanaina au upu.
Julia F., 19 tausaga, o Hesse, Siamani
Alofa I E Ita Mai Ia Te Oe
Sa ou oo foi i ni tulaga faapena. Afai e ia te oe le faatuatua ma faamaualalo oe lava, o le a faamanuiaina oe i le malosi ma le faatuatua e te manaomia e “alolofa atu i e ua ita mai ia te outou, ia outou faamanuia atu i e ua fetuu mai ia te outou, … ia outou tatalo [mo i latou]” (Mataio 5:44). Ou te fautuaina outou e suesue i tusitusiga paia mo ni tali i le auala e malolosi ai. Ia tatalo pe a e lagona le tuua na o oe i lou faatuatua. Fai mai le Roma 8:31, “O lenei, se a sa tatou upu i nei mea? Afai ua au ma i tatou le Atua, o ai se faasaga tau mai ia i tatou?” Ua i ai le Atua i lou itu! E mafaia soo se mea.
Reagan T., 15 tausaga, Iuta, ISA
Aua le Fefe
Talanoa soo e uiga i lau tapuaiga po o le fai ma le fuafuaina o mea e taua ai. Sa ou oo i se tulaga faapena ma sa ou tusia le, “Ou te Fiafia O Au o Se AAG” i luga o lau ato faafafa. O le faia o lena mea, sa ou tatalaina ai le faitotoa i ni nai avanoa faafaifeautalai ma faaali atu i tagata sa ou le fefe e tau atu ia i latou o au o se AAG. Soo se mea e te faia, aua nei faatagaina i latou e faapopoleina oe. Tatalo mo i latou ma mo oe lava. O le a le umi ae e iloa, afai e te taulai atu i le laveaiina o agaga o isi, o le a e le fefe e faailoa atu ia i latou le moni o le talalelei a lo tatou Tama.
Savanna P., 14 tausaga, Texas, ISA