Taimi o Faifeautalai Matutua
O se tasi o auala sili ona lelei mo se ulugalii matutua ina ia faia se manatuaga maoae o le auauna atu faatasi i se misiona.
Pe a galo e a tatou uo e 60 pe 70 tausaga le matua galo ia se mea, e masani lava ona tatou tausua e faatatau i le galo o manatuaga o se “taimi o le matua.” Ae ou te manao e talanoaina se isi ituaiga o taimi o [tagata] matutua—o se taimi maoae o le manatua lea o le a tumau e faavavau. O le taimi lea pe a iloa e se ulugalii matutua faamisiona o loo la faia le mea e finagalo i ai le Alii la te faia. I ia taimi e manatua ai latou te iloaina e faapea:
-
O loo i ai ia i latou se olaga atoa o aafiaga e faasoa atu, ma taleni, o tomai, o malamalamaaga faaletalalelei e mafai ona latou faaaogaina e faamanuia ai isi.
-
O a latou faataitaiga o se faamanuiaga i a latou fanau ma fanau a fanau.
-
A o auauna atu i latou ua latou faia ni faauoga tumau.
-
Ua faateleina le malosi o a latou faaipoipoga i aso uma.
-
O le auauna Atu i Lona suafa e suamalie.
Taimi i le Atiaeina
Au uo ulugalii matutua e, o taimi faapena e tatau ona atiaeina mo le toatele o outou. Mafaufau i le tala na faamatalaina e Elder Jeffrey R. Holland o le Korama a Aposetolo e Toasefululua e uiga i se ulugalii matutua na auauna atu i Chile sa mafai ona faia. Na maliu ai le matua o se tasi o alii faifeautalai talavou. Sa mamao lava le Peresitene o le misiona sa lei mafai ai ona vave oo atu i le faifeautalai.
“Ae sa i ai se ulugalii [matutua] agalelei sa auauna atu i le eria,” o le tala lea a Elder Holland. “Sa la omai ma nonofo faatasi ma lena faifeautalai ma tausia i le alofa ma faamafanafana ia te ia seia oo ina mafai e le peresitene o le misiona ona fesootai patino mai i le alii faifeautalai. Sa matou maua ni faifeautalai talavou maoae i la matou misiona, ae e leai se faifeautalai nofofua talavou na mafai ona faia le mea na mafai ona faia e lena ulugalii.”1
O o latou tomai i lena taimi sa na o se faailoa atu o le agalelei i se taimi na manaomia ai. Latou te le’i popole e uiga i le tautala i soo se gagana e ese mai i le gagana o le alofa faa-Keriso. Latou te le’i popole e uiga i le misia o se aso fanau a fanau o fanau po o se faamanuiaga o se pepe, e ui ina taua na mea na tutupu. Sa latou popole e uiga i le mea e mafai ona faaaoga ai i latou e le Alii e faamanuia le olaga o se tasi o Ana fanau. Ma ona sa latou naunau, sa mafai ona Ia tuu atu ia te i latou e fai ma sui o Ia.
E Seasea Ona Talafeagai le Auaunaga
O le mea moni, e leai se faifeau faamisiona matua e iloaina e talafeagai le tuua o le aiga. E faapena foi Iosefa Samita, Polika Iaga, Ioane Teila, po o Uilifoti Uitilafi. Sa i ai foi a latou fanau ma fanau a fanau, ma sa latou alolofa i o latou aiga e pei o i tatou. Ae sa latou alolofa foi i le Alii ma mananao e auauna atu ia te Ia. I se aso o le a mafai ona tatou feiloai i nei tagata faamaoni o e na fesoasoani e faavae lenei tisipenisione. Pe a tatou faia, o le a tatou olioli tatou te lei aloese mai le auauna atu pe a tatau ona tatou auauna atu.
O nisi atonu latou te mananao e auauna atu a o nofonofo pea i le fale. Ina ua aafia Aase Schumacher Nelson i le pepe o le tino (e leai se sootaga) ma iu ai ina i ai i se nofoafaataavalevale, sa fefe o le a le faataunuu lona manao i lona olaga atoa e alu i se misiona ma lana tane o Don. Ona talanoa atu lea o se tuaoi ia i laua e uiga i lana misiona auaunaga i le Ekalesia i le faleteuoloa a se epikopo. I le faamalosiauina, sa la talanoa i se supavaisa i le fale, faamaea le la fomu e fautuaina atu ai, ma sa valaauina e auauna atu mo aso e lua i le vaiaso i se faleteuoloa sa lataane i lo la aiga.
“E faigofie le malolo ma mafaufau, ‘Oi, e le toe manaomia au,’” o le tala lea a Aase Nelson. “Ae o lenei ou te lagona ua manaomia au. Ma sa avea lea ma se molimau ia te au.”
E Mautinoa Lava e Manaomia Oe
Afai e faaosoosoina oe e mafaufau e le manaomia oe, sei ou faamautinoa atu ia te outou o loo manaomia outou. E leai se peresitene o le misiona i le Ekalesia o le a le fiafia i le maua o ni ulugalii faaopoopo e auauna atu i lana misiona. E faamalolosia e tagata matutua toeaina ma tuafafine laiti. Latou te tuuina atu le lagolago e fesoasoani ai i isi ia sili atu le auaunaga i o latou lava tiutetauave. Ma e mafai ona e vaai faalemafaufau i le uiga i se taitai o le na faatoa avea ma se tagata o le ekalesia mo ni nai tausaga le faigofie o le mauaina o le lagolago mai tagata o le Ekalesia ua lava le tomai? O ulugalii matutua e masani lava ona avea o se tali moni i tatalo a epikopo ma peresitene o paranesi.
Matou te uunaia peresitene o misiona e saili atu i ulugalii e taulima ai manaoga i a latou misiona. E tatau i Epikopo ona saili atu i ulugalii e mafai ona auauna atu. O loo lisiina i le LDS.org itulau ma itulau o avanoa mo ulugalii matutua. Ae o le mea aupito sili, atonu e o ifo ulugalii i o latou tulivae ma ole atu i le Tama Faalelagi pe sao le taimi mo i latou e auauna atu ai faatasi i se misiona. Mai agavaa uma, o se manao e auauna atu atonu e sili ona taua (tagai i le MF&F 4:3).
A o ou viia galuega a faifeautalai faamisiona matutua, ua ou iloa e toatele e mananao e auauna atu ae e le mafai ona faia lena mea. E manaomia le tapulaa lea ua tuuina mai e ala i le tausaga po o le soifua maloloina le lelei e tatau ona iloilo, a o faia i manaoga taua o tagata o le aiga. A mumu le manao i totonu ae o loo i ai na tapulaa, e mafai e isi ona avea ma ou lima ma vae, ma e mafai ona e saunia tupe e manaomia.
Ulugalii matutua, e tusa lava po o ai outou po o fea o tou i ai, faamolemole ia tatalo e uiga i lenei avanoa e fatufatuai ai taimi maoae faatasi o faifeautalai matutua faamisiona. O le a fesoasoani le Tama Faalelagi ia tou iloa le mea e mafai ona outou faia.