Faaliliuga o Tusitusiga Paia: I le Gagana A O TATOU Loto
E tele aafiaga o loo faaalia ai le aao o le Alii i le galuega o le faaliliuga o Ana tusitusiga paia.
Ata na pueina o itulau o le Tusi a Mamona i le faa-Sapani, faa-Potukale, ma le faa-Siamani na saunia e Laura Seitz, Deseret News
O lenei aafiaga ua masani ai i latou o e o loo aafia ai i le faaliliuga o tusitusiga paia mai le faa-Peretania i isi gagana. E tupu faafia lava:
Sa oo atu se tagata talavou Aremania o loo uuina se kopi o le Tusi a Mamona na lei leva ona faaliliuina i lana gagana, i se tasi o le vaega sa fesoasoani i le faaliliuga: “Faafetai lava,” sa ia fai atu ai. “Ua ou faitau i le Tusi a Mamona i le faaPeretania. Ua ou faitau i le Tusi a Mamona i le faaRusia. Ua ou faitauina i le faaIukureini. Ae, faatoa oo mai i le taimi na ou faitauina ai i le faaAremania, sa ou le malamalama lelei i ai. Ina ua ou faitau i ai i le faaAremania, sa iu ina fetaui lelei lava. Sa pei lava o le sau i le aiga.”
Sau i le Aiga
Afai o le talalelei a Iesu Keriso o le tatou aiga faaleagaga, e sao lelei lava la le lagona o le lagolelei ma le masani ai. I le aiga tatou te malolo ai. Tatou te tausia ai i tatou lava. Tatou te talanoa faatasi ma i latou tatou te alolofa i ai, i le gagana na aoaoina ai i tatou i tulivae o lo tatou tina. O le gagana lenei a o tatou loto, ma talu ai o le loto o le mea lea e tatau ona oo atu i ai le talalelei, o lea e taua tele ai le faitauina o tusitusiga paia i le gagana a o tatou loto.
Ua faailoa mai e le Mataupu Faavae ma Feagaiga e moni lenei mea. O iina ua faaali mai ai e le Alii e faapea, e ala mai i ki o le perisitua o loo umia e le Au Peresitene Sili, “o le a faaali mai ai le aao o le Alii i le mana, i le faatalitonuina o atunuu … e uiga i le talalelei o lo latou olataga.
“Aua o le a oo mai, i lena aso, o le a faalogo ai tagata taitoatasi i le atoatoaga o le talalelei i lana lava tautala, ma i lana lava gagana, e ala mai ia te i latou ua faauuina i lenei mana, e ala i le taitaiga a le Faamafanafana, e liligi ifo i luga o i latou mo le faaaliga o Iesu Keriso” (MF&F 90:10–11).
Na faamatala e Jim Jewell, o le sa galue i le vaega o le faaliliuga o tusitusiga paia i le laumua o le Ekalesia, se tala i le patino e mafai ona lagonaina ai tusitusiga paia pe faaliliuina i le gagana o le loto:
“I le faaliliuga o le Tusi a Mamona i le faa-Sesoto [Sesotho], o le gagana tautala i le malo o Aferika o Lesoto [Lesotho], sa matou manaomia ai le maua o se tagata e fesoasoani ia i matou e iloilo le galuega a le au faaliliu. Sa faailoa mai e le supavaisa o le galuega faatino, o Larry Foley, se tagata o le Ekalesia mai Lesoto o se tagata sa faauu mai i le Iunivesite o le Setete o Iuta. I Lesoto, o aoga e faia i le gagana Peretania, o lenei la tamaitai ma lana fanau sa aooga i le faaPeretania mai lava i le vasega muamua e oo i luga, ae sa latou talanoa lava i le fale i le faaSesoto.
“Sa malie o ia e galue i le faaliliuga. O lana iloiloga o mataupu na matou auina atu ia te ia sa aoga moni lava. Sa masani ona matou auina atu ni fesili maoti e faatatau i le vaogagana ma le faatulagaga o le gagana, ma sa ia tuuina mai ni manatu faaalia aoga. Ae peitai, sa matou matauina sa ia valivaliina i le lanusamasama le tele o fuaiupu sa le faatatau i a matou fesili. Ina ua matou fesiligia o ia e uiga i fuaiupu sa valivaliina, sa ia fai mai: ‘Oi, o fuaiupu na sa matuai ootia ai lou loto, ia sa ou le malamalama atoatoa i ai i le faa-Peretania. Sa ou valivaliina ina ia mafai ona ou faasoa atu i lau fanau.’”
O Se Faataitaiga mo le Faaliliuga o Tusitusiga Paia
O le faaliliuga o le Tusi Paia e i ai se talaaga umi ma le matagofie, e amata mai i le faaliliuga o vaega o le Feagaiga Tuai mai le Eperu i le faa-Eleni. Mulimuli ane, na faaliliuina ai le Tusi Paia mai le faa-Eleni i le faa-Latina, ma mai le faa-Latina , faa-Eperu, ma faa-Eleni i se anoanoai o isi gagana.1 O se taunuuga la, e le faaliliuina ai e Le Ekalesia a Iesu Keriso o le Au Paia o Aso e Gata Ai le Tusi Paia i ni gagana eseese ae faaaoga lomiga ua uma ona taliaina ua moni e le au Kerisiano e tautatala i na gagana.2
O le mea lea, o le tele o le galuega faaliliu o tusitusiga paia e faia e le Ekalesia, o le Tusi a Mamona (o le [tusitusiga paia] muamua ua faaliliuina), o le Mataupu Faavae ma Feagaiga, ma le Penina Tau Tele. O le gagana ua faaliliuina mai ai nei tusi o le faa-Peretania, o le gagana na faaalia mai ai i latou e le Perofeta o Iosefa Samita, o le gagana a lona loto. O le faagasologa e faaaogaina e faaliliu ai tusitusiga paia i gagana e le faa-Peretania, e tatau ona masani i ai tagata aooga o le talafaasolopito o le Ekalesia. E tai pei lava o le faagasologa e tasi lea sa faaaoga e le Perofeta e faaliliu ai le Tusi a Mamona i le faa-Peretania.
O Iosefa Samita sa o se tamaitiiti faifaatoaga faatauvaa, sa lei tele sona aotauina. Ae sa ia te ia ni uiga auaumama ma le gafatia na manaomia e le Alii mo le galuega lea sa manaomia ona fai. E moni lava, sa saunia Iosefa ma lona aiga ma faatulaga e faia lenei lava galuega.3
Sa tuuina atu foi ia Iosefa le fesoasoani—i le lagi ma le olaga nei—i le faaliliuga o faamaumauga o sa Nifae. Sa asiasi mai le agelu o Moronae ia Iosefa i tausaga taitasi mo tausaga e fa ao lei faatagaina o ia e aumai faamaumauga. Tatou te le iloa mea uma na aoaoina ai e Moronae le Perofeta, ae o ana asiasiga e foliga mai sa saunia ai o ia faaleagaga ma faalemafaufau mo le galuega i luma atu.4
Na muai saunia foi e le Alii ia “faaliliu upu” o se auala e faaliliu ai se gagana ua leiloa. Na faamatalaina o ni maa manino e lua na fusia i ni augutu uamea, o nei [maa] ma se meafaigaluega faapena na taua o se maa vaai, sa fesoasoani i le perofeta e faaliliu ai le faamaumauga sa Nifae i le faa-Peretania. Sa lei faamatalaina auiliili mai e le Perofeta le faagasologa; sa na ona ia molimau mai e faapea, sa ia faaliliuina le Tusi a Mamona e ala “i le meaalofa ma le mana o le Atua.”5
E faaopoopo atu i le fesoasoani faalelagi sa tuuina mai ia te ia, sa maua foi e Iosefa le fesoasoani faaletino i le tulaga o tusiupu o e na gaosia kopi tusitusia lea na iu ina faatulaga e isi le taina, lolomiina, totogiina, ma le tufatufaina atu i le lalolagi.
E pei o tapenapenaga ma le fesoasoani na maua e Iosefa i lana galuega faaliliu, o i latou ua faasafuaina atu i ai le galuega o le faaliliuga o tusitusiga paia i aso nei ua sauniaina e le Alii ma tuuina i ai le fesoasoani i la latou galuega—i le faalelagi ma le olaga nei.
O Se Galuega Faafaaaliga
Sa faatumuina le faagasologa faigata i se malosiaga faaleagaga lea atonu e sili ona faamatalaina “o le faaaliga e ala i aufono.” O tagata e toalua pe toatolu o e ua filifilia e avea ma faaliliutusi e au faatasi ma isi i le faiga o le galuega. E i ai a latou supavaisa i le laumua o le Ekalesia, tagata i le lotoifale e iloiloina [faaliliuga], o se vaogagana e faatatau atu i ai,6 taiala o le faaliliuga, polokalama komepiuta, ma le lagolago faale-ekalesia lea e tau atu lava i le Au Peresitene Sili. (Tagai i le siata o loo avatu ai.) A tuu mai e le Au Peresitene Sili le faamaoniga faaiu o se faaliliuga, ona faatulaga loa lea o le taina o le galuega, lolomiina, ma tufatufa atu. Ona sa saunia foi i se mamanu faafuainumera, e faapea foi ona tuuina ai i luga o le LDS.org ma i le polokalama Gospel Library.
O lenei taumafaiga tuufaatasi e tele ma musuia. E aofia ai le gauai tuuto i le tulaga o anotusi ma le tulaga o mamanu faaletino o loo momoli atu ai. O faaliliuga e iloiloina i le tele o tulaga, ae maise lava i se tulaga faale-ekalesia lea e sailia ai le faamaoniga a le Alii. Seiiloga lava e tuuina mai lena faamaoniga ona agai loa lea i luma le faaliliuga. E ui e lei faafaaaliga tonu i le ala na faaliliuina ai e le Perofeta o Iosefa Samita le Tusi a Mamona, ae o le faagasologa sa manino lava le taialaina e le Alii—e ala i Ana meaalofa ma e ala i Lona mana.
E le faapea ai la o le faaliliuga ua atoatoa i le taimi muamua na maea ai. E masani lava, o le aluga o taimi ma iloiloga faaopoopo a i latou e suesuea tusitusiga paia e fautua mai ai ni faaleleiga atili i le kalama ma le vaogagana pe maua ai foi ni mea sese i le faatulagaga o le taina po o sipelaga. E seasea lava faia ni suiga i le faamaninoga o aoaoga faavae. Pe a faia nei mea, e faia i lalo o le taitaiga a le Au Peresitene Sili.
E Tuuina Mai e le Alii
E lagolago e le Alii lenei galuega o le faaliliuga i isi foi auala. E masani ona lipotia mai e le au faaliliu i le laumua o le Ekalesia e faapea, a tulai mai se tulaga e manaomia, e tuuina mai e le Alii.
O se tasi o le tele o faataitaiga, na manaomia ai se tagata faaliliutusi mo le faaliliuga ma le pueina o mea e faaaoga a le Ekalesia i le faa-Mam (e faaleoina “mum,” o se gagana e tupuga mai i le gagana Mayan, e tautalagia i Kuatemala). Sa i ai i uluai faifeautalai na valaauina i Kuatemala se faifeautalai o lona tamamatua sa tautala faa-Mam. Sa ola ae le faifeautalai i se taulaga ma sa na o le faa-Sipaniolo sa tautala ai. Ae o po uma lava e sau ai lona tamamatua ia te ia i miti ma aoao o ia i le gagana Mam. Sa avea lenei alii faifeautalai talavou ma faaliliutusi autu o le faa-Mam i le Ekalesia.
E masani lava, o le galuega faaliliu e faia i le osigataulaga tele faaletagata lava ia. E faalagolago i tulaga tautupe, o nisi o faaliliutusi e foai atu a latou auaunaga ae o isi e totogi ina ia i ai ni o latou taimi e tuuto atu i le faaliliuga.
O le alii na avea ma se tasi o faaliliutusi faa-Urutu sa liliu mai i le Ekalesia i Pakisitana a o galue ai o se faiaoga. O se taunuuga o lona liliu mai, sa aveesea ai lana galuega; aveesea ai lona fale, lea sa tuuina atu i ai e le aoga lea sa faiaoga ai; ma sa aveesea foi le aoga mo lana fanau. Sa oo atu se supavaisa faaliliutusi a le Ekalesia ia te ia e uiga i le avea o se faaliliutusi ma ofoina atu se taui talafeagai mo ia. Ina ua mavae ona galue o se faaliliutusi mo ni nai masina, sa oo atu le alii i le supavaisa ma talosaga atu ma le faaeteete tele pe mafai ona faatau mai e le supavaisa se peniutu mo ia. O le peniutu sa ia faaaogaina ua uma le vaitusi. Ma o le taimi lea na faatoa iloa ai e le supavaisa ma foia se sasi a le ofisa na iu ai ina maua e le faaliliutusi le itiiti atu o le mea na tatau ona totogi ai o ia.
Ae e pei foi ona faamanuiaina e le Alii ia Iosefa Samita i auala na mafai ai ona faamaea lana galuega, ua faamanuia ai e le Alii Ana faaliliutusi. Mo se faataitaiga, o le faaliliutusi o tusitusiga paia faa-Lativia sa o se loia, o le sa aoga faaloia i Rusia, lea sa liliu mai ai i le talalelei toefuataiina. I Lativia, sa faatuina ai lana pisinisi. Sa avea foi o ia o se peresitene o le paranesi. Sa matuai pisi lava o ia, ae sa manaomia o ia e le Ekalesia ma lona tomai i le faa-Peretania.
Na ia talosagaina se taimi e tatalo ai e uiga i le talosaga aua o le taliaina o le a faapea ona, e pei ona ia tau atu i le sui o le Ekalesia, “le lava ai ni meaai a lana fanau.” Ina ua uma ona tatalo, sa ia filifili e talia ae sa ole atu i le Alii e faamanuia o ia i auala e faia ai se galuega faigata, faasaulala faaleagaga, ma alu ai le taimi.
Sa amata ona vave alu i lona ofisa loia e tasi le itula e vave ai i aso uma ma faaaoga lena itula e faaliliu ai le Tusi a Mamona. Sa ia faamaeaina lelei lava ao lei atoa le lima tausaga lea e masani ona alu i le faagasologa. O le mea moni, o se tasi lenei o faaliliuga aupito sili ona vave talu mai le faaliliuina e Iosefa o le Tusi a Mamona i le pe tusa ma le 60 aso.
E anoanoai nisi aafiaga e mafai ona faamatalaina e faaalia ai le aao o le Alii i le galuega o le faaliliuga o Ana tusitusiga paia. O [aafiaga] uma e tautino manino mai ai o Lana galuega lenei ma e taua tele i Lona finagalo. Ua Ia saunia tagata e faia Lana galuega. Ua saunia meafaigaluega latou te manaomia e faatelevave ai le galuega. Ma Na te musuia ma faamanuia i latou i le gasologa o le galuega.
O le taunuuga o se lalolagi ua faatamaoaigaina i le afioga a le Atua, ua tuuina mai i Ana fanau i le gagana o le loto.