Elder Ronald A. Rasband: Taitai Talenia, Taitai Faamaoni
Ata pue mai faaaloaloga a le aiga o Rasband, vagana ai ua faamatalaina
E lei masalomia lava e Ron Rasband o le a ia auauna atu faamisiona. Na pau le fesili a le 19 tausaga sa i ai a o tatalaina lona valaauga o le misiona o fea o le a ia auauna atu ai.
“Na faamisiona lo’u tama i Siamani. Na faamisiona lo’u uso matua i Siamani. Na faamisiona lo’u uso faaletulafono i le lumanai i Siamani,” o lana tala lea. “Sa ou faapea o le a ou alu i Siamani.”
Ae sa i ai isi fuafuaga a le Alii. Nai lo lena, na valaauina Ron i le Misiona a Setete i Sasae, na faamautu i le Aai o Niu Ioka, ISA. O le le fiafia, na ave ai lona valaauga i lona potu, tootuli i autafa o lona moega, fai se tatalo, ma soona susue lava ana tusitusiga paia, ma amata ona faitau:
“Faauta, ma tagai ua ia te au ni tagata e toatele i le nofoaga lenei, i itulagi faataamilo ai; ma o le a tatalaina se faitotoa aoga i itulagi faataamilo i le laueleele lenei i sasae.
“O lea, na tuu atu ai e Au o le Alii oulua ia oulua o mai i le nofoaga lenei; ona ua faapea ona tatau ai ia te au mo le faaolataga o agaga” (MF&F 100:3–4; faaopoopo le faamamafa).
O le taimi lava lena, na faamautu atu ai e le Agaga Paia ia Ron o lona valaauga i le Misiona a Setete i Sasae sa le o se mea sese.
“Sa ou aluese mai le faanoanoa i le mauaina o lou uunaiga faatusitusiga paia muamua mai le tele e faapea o le nofoaga lea e finagalo le Alii ou te alu i ai,” o lana tala lea. “Sa avea lena ma se aafiaga faaleagaga e sili ona taua mo au.”
O lana misiona i Setete i Sasae sa avea ma vaega muamua o le tele o valaauga o le Ekalesia o le a aveina o ia i nofoaga na lei mafaufauina lava e alu i ai. Ma o valaauga taitasi—o se faiaoga, epikopo, fautua maualuga, peresitene o le misiona, Fitugafulu, Peresitene Sinia o Fitugafulu, ma Aposetolo a le Alii o Iesu Keriso—ua taliaina ai e Elder Ronald A. Rasband le finagalo o le Alii, ma faaauau pea ona faalagolago i Lona Agaga a o ia auauna atu i fanau a le Atua.
Na fanau mai i ni Matua Lelei
I lana lauga muamua o se Aposetolo a Iesu Keriso, na faaalia ai e Elder Rasband le agaga faafetai loloto mo ona tuaa. “Sa ou fanau mai i ni matua lelei i le talalelei,” na ia fai mai ai, “ma faapea foi i laua i ni matua lelei e oo atu i tua i le ono o augatupulaga.”1
O lona tina, o Verda Anderson Rasband, o se taitai alofa o le sa faafaileleina le fiafia o le tama talavou o Ron i tusitusiga paia. O lona tama, o Rulon Hawkins Rasband, o se perisitua faamaoni o le sa faataitaia ia uiga mama o le galue malosi.
Na soifua mai i le aso 6 o Fepuari, 1951, i le Aai o Sate Leki, Iuta, ISA, o Ronald A. (Anderson) Rasband sa na o le pau lea o le tama o le mafutaga a ona matua. Na faaipoipo ma tatalaina le la faaipoipoga, ma sa ola ae Ron i lalo o le tausiga faaopoopo a ona uso matutua e toalua ma se tuafafine matua.
“O ia o se tuufaatasiga a o matou matua, o lea sa matou alolofa uma ai ia te ia,” o le tala lea a lona tuafafine, o Nancy Schindler. “E lei faatagaina e Ron Tina ma Tama e tu le tasi i autafa o le isi pe nonofo faatasi e aunoa ma ia i le ogatotounu o i laua.”
O Ron sa avea lava ma se tama lelei, peitai sa ia tautino mai sa i ai sona itu ulavale.
“Na sili atu nai loo ni nai taimi, na o ou faiaoga [Peraimeri] i lou tina, le peresitene o le Peraimeri a le siteki, ma fai i ai, ‘O Ronnie Rasband o se tamaitiiti laitiiti faigata,’” o lana tala lea. “Ae latou te lei fiu ia te au. Sa latou faaali mai ia te au le alofa tele ma valaaulia au e foi atu i le vasega.”2
O le olaga faatamaitiiti o Ron sa faaogatotonu i le Ekalesia—fonotaga a le uarota, pati a le uarota, taumafataga i le afiafi a le uarota, ma autaaalo a le uarota. A le pisi o ia i le falelotu o le Uarota Muamua a Cottonwood, o loo ia faigaluega i ni galuega e le masani ai, faia ni gaoioiga a le Sikauti, ma le faaaluina o taimi ma uo. I le fale, e taulai atu le taimi o le aiga i tusitusiga paia, taaloga, ma feau.
“Na aoao au e lo’u tama e uiga i le galue e ala i lana faataitaiga,” o lana tala lea. “Na aoao au e lo’u tina e uiga i le galue i le tuu o au e fai.”
Na aveina e le tama o Ron se loli e tilivaina falaoa, e ala i luga i aso uma i le 4 i le vaveao ma toe foi mai i le fale i le leva o le po i po taitasi. Sa nofo lona tina i le fale e tausi le fanau, ma faaopoopo i tupe maua a le aiga i le gaosia ma le faatauina atu o pepe leise meataalo.
O le tomai faanatura a Ron e taitai, faamatuu atu, ma faataunuu mea—lea o le a aoga lelei mo ia i ona tiutetauave faalegaluega ma faale-ekalesia—na faamaonia le aoga mai na muai taimi.
“Sa tofia Ron e moaina le vao,” na manatua e lona tuafafine. Ae o Ron, e pei o Tom Sawyer a Mark Twain, sa i ai se auala o le faatosinaina o ana uo e fesoasoani.
“Ou te vaai atu i fafo, ma o loo i ai iina lana uo mamae, o loo moaina le vao mo ia,” o le tala lea a Nancy. “O le vaiaso na sosoo ai o le isi o ana uo o loo moaina. Sa na o lona nofo i luma o le poletito ma talie ma talasua faatasi ma i latou a o latou faia ana feau.”
Sa tauivi matua o Ron i tulaga tautupe, ae sa i ai i le aiga le talalelei. “E le’i tele lava ni a matou tupe,” o le tala lea a Ron, “ae e le’i aafia ai lava lo’u fiafia.”
Uo ma Taitai Faatuatuaina
O le tuputupu ae, sa faamanuiaina Ron i ni uo lelei ma ni taitai perisitua faatuatuaina, e aofia ai lona peresitene o le siteki ao laitiiti mo le 14 tausaga—o James E. Faust (1920–2007), o le na auauna mulimuli ane i le Korama a Aposetolo e Toasefululua ma i le Au Peresitene Sili. Na fiafia le aiga o Ron i se sootaga vavalalata ma Peresitene Faust ma lona aiga. “Sa ia faatatau lava ia te au o se tasi o ana fanau tama Cottonwood aua sa ia fesoasoani e faafaileleina au,” o lana tala lea.
Sa lei i ai se taimi o Ron mo taaloga a le aoga aua o le taimi lava sa ia oo ai i le aoga maualuga sa i ai lava sana galuega, ae sa ia faaavanoa lava le taimi mo ni faigauo faamaoni lea sa i ai pea i le olaga atoa.
“Na ou faamemelo lava ia Ron i taimi uma mo lona ituaiga tagata, ae sa lei atoatoa o ia,” o le tala lea o le uo o le olaga faatamaitiiti o Kraig McCleary. Faatasi ai ma se ataata, sa ia faaopoopo mai, “sa ou fai atu ia te ia afai e te oo i le lagi, o le a ou oo atu foi iina aua na tutusa lava mea sa ta faia ao tuputupu ae.”
Na alu ese atu Ron mo lana misiona i le amataga o le 1970, ae sa mafaufau Kraig e tolopoina le galuega faafaifeautalai seia mavae lena vaitau o le tautoulu o le tutuli manu. O le taimi lena sa valaau mai ai Ron mai lana misiona.
“Ou te le iloa pe faapefea ona ia maua se faatagaga e valaau mai ai, ae sa ia aoaiina au i le le fiafia e uiga i le alu sa’o atu i la’u misiona,” o le tala lea a Brother McCleary. “O le mea moni, ou te lei tolopoina.”
Sa taua e Ron lana misiona o se aafiaga “matagofie”. “Sa faamanuiaina au e le Alii i le tele o aafiaga faavavega, siitia ai le faatuatua,” o lana tala lea. “O la’u misiona, sa tele se aafiaga mo lo’u olaga faaleagaga.”
Na faaaluina e Ron se vaega o lana misiona i atumotu o Bermuda. O lana peresitene o le misiona, o Harold Nephi Wilkinson, e auina atu na o “faifeautalai e usiusitai atoatoa” iina aua e na o ni nai taimi lava na te asiasi atu ai ia i latou.
“Sa tuua lava na o i matou, ae sa lei popole le peresitene ia i matou,” na manatua e Ron. “Sa matou faataunuuina le galuega.”
O Le “Tamaitai e Moemiti i ai” o Delta Phi
Ina ua maea lana misiona i le 1972, na maua e Ron se galuega, lesitala i le Iunivesite o Iuta i lena tautoulu, ma auai i le Delta Phi Kappa, o se kalapu a le kolisi mo faifeautalai ua maea misiona. I gaoioiga faafiafia a le kalapu, sa iloagofie ai ona ia vaaia se tamaitai talavou lalelei e igoa ia Melanie Twitchell. O Melanie o se tasi o “tamaitai e moemiti i ai,” na filifilia a le Delta Phi o le sa fesoasoani i gaoioiga auauna atu a le kalapu.
E pei o Ron, sa sau Melanie mai se aiga malosi o le Au Paia o Aso e Gata Ai. O lona tama, o se taitai militeli, ma e le faatagaina e lona tina le fesiitai soo o le aiga e avea ma alofaga mo le le auai i le lotu.
Sa faagaeetia Melanie i le agalelei, faaaloalo, ma le malamalama o Ron i le talalelei. “Sa ou fai ifo ia te au lava, ‘O ia o se tagata ofoofogia ma e le afaina pe ou te le tafao faamasani lava ma ia. Sa na o lou manao lava e avea ma ana uo mamae.’”
A o tuputupu ae le la mafutaga, sa faamautu atu e le Agaga ona lagona e uiga ia Ron ma lona tautinoga i le Alii. E lei umi ae oo atu le la faigauo i se mea na taua e Melanie o se “mafutaga e pei o mafutaga i totonu o tusi.”
Fai mai Elder Rasband o ia o se soa moni lava mo ia. “O Melanie sa tutusa lava o ia ma au i le tuuto atu i le talalelei ma le talatuu. Sa avea i maua ma uo mamae, ma o le taimi lena sa ou fai atu ai ia te ia ma te faaipoipo.”
Sa la faaipoipo i le aso 4 Setema, 1973 i le Malumalu o Sate Leki. Talu mai lena taimi, na ia fai mai, na fesoasoani lana “soa lē manatu faapito e faavavau e mamanuina au e pei o le omea i totonu o se soo ua sili ona faaleleia a Iesu Keriso. O lona alofa ma le lagolago, faapea le ma fanau e toa 5, o latou taitoalua ma fanau a fanau e 24, ua lagolagoina ai a’u.”3
“Tatou O”
A o auauna atu o se peresitene o le korama a toeaina o lana uarota a tamaiti aoga ua faaipoipo, na masani Ron ia Jon Huntsman le matua, o le faufautua a fautua maualuga a le uarota. Sa vave faagaeetia Jon i le auala na faagaoioia ai e Ron le korama.
“Na i ai ni ona tomai faaletaitai ma faafaalapotopotoga maoae,” o le tala lea a Elder Huntsman, o le sa auauna atu o se Fitugafulu Eria mai le 1996 i le 2011. “Sa ou faapea o se mea uiga ese i se alii talavou o loo i ai pea i le kolisi ona mafai ona faafoeina se korama i sea ituaiga auala.”
Mo le tele o masina, sa vaavaai ai Jon ia Ron o faaliliuina manatu i faatinoga ao ia faamaeaina ona tiute faaperisitua. Ina ua i ai se avanoa sinia tau maketi i le kamupani a Jon—lea o le a avea ma Faalapotopotoga Vailaau a Huntsman—sa faia lana faaiuga o loo ia Ron ni tomai sa ia manaomia ma sa ofaina atu ia te ia le galuega. Sa amata le galuega i le vaiaso na sosoo ai i Ohaio, ISA.
“Sa ou ta’u atu ia Melanie, ‘Ou te le aluese mai le aoga ma siitia atu,’” o le tala lea a Ron. “Na ou galue i lo’u olaga atoa e faauu mai le kolisi, ma ua ou latalata lava i lau sini.”
Sa faamanatu atu e Melanie ia Ron o le mauaina o se galuega lelei o le mafuaaga lea o lona i ai i le aoga.
“O le a se mea o loo e popole i ai?” na ia fesili ai. “Ou te iloa tapena ma siitia atu. Sa ou faia i lo’u olaga atoa. O le a ou tuu atu ia te oe e valaau atu i lou tina i po uma. Ta o.”
Sa mautu le talitonuga o Jon ia Ron. I lalo o le vaaiga a Jon, sa vave lava ona alualu i luma Ron i le kamupani tuputupu ae, sa avea ma peresitene ma pule sili i le 1986. Sa mamao mea sa ia malaga ai mo le kamupani—i totonu lava o le atunuu ma faavaomalo. E ui i le pisi o ona taimi faatulagaina, sa taumafai lava Ron ia i ai i le fale i faaiuga o vaiaso. Ma pe a ia malaga, e na te alu ma ave i nisi taimi tagata o lona aiga.
“Pe a i ai o ia i le fale, e na te faia ia lagona e le fanau lo latou faapitoa ma le alofagia,” o le tala lea a Melanie. Na te auai i a latou gaoioiga ma taaloga i soo se taimi e mafai ai. O Jenessa MacPherson, o se tasi o afafine e toafa a le ulugalii, na fai mai o tiute faale-ekalesia a lona tama i Aso Sa e masani ona taofia mai o ia mai le nonofo faatasi ma le aiga i le taimi o sauniga Lotu.
“Matou te tau po o ai e nofo i ona autafa i le lotu aua o se mea e seasea ona tupu le i ai o ia iina,” o lana tala lea. “Ou te manatua le tuuina o lo’u lima i lona lima ma mafaufau ia te au lava ia, ‘Ana mafai ona ou aoao ia pei o ia, o le a ou i ai i le ala sao ma o le a avea atili faapei o le Faaola.’ O ia lava o lo’u toa manumanu.”
E manatua e le atalii a le ulugalii, o Christian, ia ni manatua faamama’i o le “taimi o le tama ma le atalii.” E lei tumau ni faigauo ma uo ona o le fesiitai soo o le aiga, na ia fai mai ai, “ae sa avea lava lo’u tama ma a’u uo sili i taimi uma”—e ui o se tasi e fia tauva.
Pe o le togiina o se pasiketipolo faatasi ai ma Christian, taaalo i se taaloga togi le laupapa faatasi ai ma ona afafine, po o le fagogota ma aiga ma uo, e fiafia lava Ron e manumalo ai.
“A o matou tuputupu ae, e na te le tuuina se tasi e manumalo,” o le tala lea a Christian. “E tatau ona matou galulue i ai, ae na faaleleia atili ai i matou. Ma na faaauau pea lea aga masani ma fanau pele a ana fanau.”
I le tele o tausaga, na mafai e le aiga o Ron ona iloaina le ala na faalautele ai e le galue i tofiga faaletaitai a le Ekalesia lona gafatia e faaalia le alofa ma le agaalofa, faaalia lagona o le Agaga, ma uunaia isi e faia le mea sili latou te mafaia. Ina ua mavae le fanau mai o le atalii o le fanau a Ron ma Melanie o Paxton, na faalagolago tele le aiga o Ron i le malosi ma le lagolago faaleagaga a Ron.
O Paxton, na fanau mai ma se faaletonu, sa mafatia i le tele o faafitauli o le soifua maloloina lea sa tofotofoina ai le aiga faaletino, faalelagona, ma le faaleagaga. Na taua e Elder Rasband le malaga lea na sosoo ai ma le fanau mai o Paxton “o se tofotofoga faigata mo le aoaoina o lesona faapitoa e faatatau i le faavavau.”4
I le taimi o le olaga puupuu e tolu tausaga o Paxton i le lalolagi—ina ua tele ni fesili ma laiti ni tali—sa tu Elder Rasband e avea ma se poutu faaleagaga, o le taitaia o lona aiga i le faaaogaina o le mana o le Togiola a Iesu Keriso.
Faatasi ai ma le faasilasilaga o lona valaauga fou, e lei tetei le toatele o tagata o le aiga ma uo. “O i latou o e sili ona silafia o ia,” o le tala lea a Christian, “na maualuga le siiina o o latou lima ina ua lagolagoina o ia o se Aposetolo.”
“O Le a Ou Alu e Auauna Atu”
I le 1996, i le 45 o tausaga, sa i ai Ron i le ogatotonu o se galuega faamanuiaina i le taimi na oo mai ai le valaauga e auauna atu o se peresitene o le misiona i le Misiona a Niu Ioka Niu Ioka i Matu. E pei o le au Aposetolo anamua, sa ia “tuua loa lea o [lana] upega” (Mataio 4:20).
“O le taliaina o le valaauga sa na o se sekone na alu ai,” o le tala lea a Elder Rasband. Sa ia fai atu i le Alii, “Afai e te finagalo ou te alu e auauna atu, o le a ou alu e auauna atu.”
Sa alu Ron ma ave se lesona na ia aoaoina ma lona aafiaga faalegaluega: “E sili atu le taua o tagata nai lo se isi lava mea.”5 Faatasi ai ma lena malamalama ma ona tomai faaletaitai ua faaleleia, ua ia sauni e amata se auaunaga faamisiona i le malo o le Alii.
Na manatu Ron ma Melanie o le galuega faafaifeautalai i le Aai o Niu Ioka e faigata ma fiafia. Sa vave ona faamatuu atu e Ron tiutetauave i faifeautalai—uunaiaina o lo latou faamaoni, ma aoao atu, fausiaina, ma siitia i latou i le faagasologa.
I le 2000, i se taimi puupuu e valu masina talu ona maea le misiona a Ron ma Melanie, sa valaauina ai Ron e avea ma Fitugafulu, lea na faamanuia ai e lana sauniuniga, tomai, ma le tele o taleni le Ekalesia. I le avea ai ma se tasi o Fitugafulu, sa ia auauna atu o se fesoasoani i le au Peresitene o le Eria i Europa Tutotonu, fesoasoani i le vaaiga o le galuega i atunuu e 39. E ui ina sa ia tuua le kolisi i le silia ma le 40 tausaga talu ai, ae sa ia tumau ai pea o se tagata aoga faamaoni, faafeiloaia faiaoga mai le Usoga matutua ao ia vaaia ia Eria o Amerika Matu i Sisifo, Matusisifo, ma Eria e tolu o Iuta; sa auauna atu o se Faatonu Sili o le Matagaluega o Malumalu; ma sa auauna atu i le Au Peresitene o Fitugafulu, galulue vavalalata ma le Toasefululua.
Talu ai nei, na matauina e Elder Rasband, “O se faamamaluga tele ma se faamanuiaga mo au le avea ma se aupito itiiti i totonu o le Toasefululua ma aoao mai ia i latou i soo se auala, ma i soo se tulaga.”6
“O Mea Ua Latou Silafia, Ua Ou Iloa”
Tauagavale pito i luga: ata na pueina e Wendy Keeler; taumatau: Faifeau Talai a le Mamona, o Uluai Faifeautalai i Tenimaka, saunia e Arnold Friberg (e faavae i se ata vali na saunia e Christen Dalsgaard, 1856); Fagua e Dan Jones ia Uelese, saunia e Clark Kelley Price
E lua ni ata o loo teuteuina ai le puipui o le ofisa o Elder Rasband. O le tasi o ni faifeautalai Mamona o loo aoaoina atu se aiga i Tenimaka i le vaitau o le 1850. O le lona lua o le uluai faifeautalai o Dan Jones o loo tala’i ao tu i luga o se vaieli i le Motu o Peretania. O ata (i luga taumatau) o loo faamanatu atu ia Elder Rasband ia ona lava tuaa.
“O nei paionia anamua na tuuina atu a latou mea uma i le talalelei a Iesu Keriso ma tuua se talatuu mo a latou fanau e mulimuli ai,” na ia molimau mai ai.7 O le mea na tuleia tuaa a Elder Rasband i luma i le lotolotoi o faigata ma sauaga o le mea aupito sili ona faaagavaa ai o ia mo lona valaauga fou: o se malamalama ma se molimau mautinoa i le Alii ma Lana galuega.
“E tele naua mea ou te aoao ai i lo’u valaauga fou,” na ia fai mai ai. “Ou te lagona le lotomaualalo tele e uiga i lena mea. Ae o loo i ai se vaega e tasi o lo’u valaauga e mafai ona ou faia. E mafai ona ou molimau atu ‘i le suafa o Keriso i le lalolagi atoa’ (MF&F 107:23). O loo soifua o Ia!”8
I le avea ai ma se tasi e tupuga mai paionia, na ia faaopoopo mai: “O mea sa latou lagonaina, ua ou lagonaina. O mea na latou silafia, ua ou iloaina.”9
Ma o mea latou te faamoemoe i ai ia latou fanau, ua faataitaia i le olaga, aoaoga, ma le auaunaga a Elder Ronald A. Rasband, o le o loo mulimuli i a latou faataitaiga ma faamamaluina a latou measina a o ia agai atu i luma o se tasi o molimau faapitoa a le Alii.