Afafine o lo Tatou Tama Faavavau

Ia suesue ma le agaga tatalo lenei savali ma saili ia iloa mea e faasoa atu. E faapefea ona faateleina e le “O Le Aiga: O Se Folafolaga i le Lalolagi” lou faatuatua i le Atua, ma faamanuia ai i latou e te puipuia e ala i faiaoga asiasi? Mo nisi faamatalaga, alu i le reliefsociety.lds.org.

Ata

elderly woman

Ua aoao mai e tusitusiga paia ia i tatou e faapea, o “tatou o ni fanau a le Atua” (Galuega 17:29). Na taua e le Atua ia Ema Samita, le ava a le Perofeta o Iosefa Samita, o “lo’u afafine” (MF&F 25:1). Ua aoao mai le folafolaga i le aiga o i tatou taitoatasi “o se afafine agaga faapelepele … a ni matua faalelagi.”¹

“I le malo [i le muai olaga], sa tatou aoao ai e uiga i lo tatou faasinomaga o tamaitai e faavavau,” na fai mai ai Carole M. Stephens, fesoasoani muamua i le au peresitene aoao o le Aualofa.

“O la tatou malaga faaletino i le lalolagi sa le’i suia ai na upumoni.”²

Ua silafia e lou Tama o i le Lagi lou igoa ma silafia ou tulaga,” o le saunoaga lea a Elder Jeffrey R. Holland o le Korama a Aposetolo e Toasefululua. “Na te faafofogaina au tatalo. Na te silafia ou faamoemoega ma au miti, e aofia ai ou popolega ma atugaluga.”³

“E taitasi i tatou ma auai ma o loo manaomia i le aiga o le Atua,” na saunoa mai ai Sister Stephens. “E eseese uma aiga faalelalolagi. Ma a o tatou faia le mea silisili e mafai ona tatou faia e fatuai ai ni aiga masani malolosi, o le avea ai ma tagata o le aiga o le Atua e le faalagolago i soo se ituaiga o tulaga—tulaga faalefaaipoipoga, tulaga faamatua, tulaga faaletupe, tulaga faaleagafesootai, po o ituaiga o tulaga tatou te tuuina i luga o ala o faasalalauga faaleagafesootai.”⁴

Mau Faaopoopo

Ieremia 1:5; Roma 8:16; Mataupu Faavae ma Feagaiga 76:23–24

Mai lo Tatou Talafaasolopito

I lana tala o le Uluai Faaaliga,⁵ ua faamaonia ai e le Perofeta o Iosefa Samita le tele o upumoni—e aofia ai le, e silafia e lo tatou Tama Faalelagi o tatou igoa.

Sa tauivi le taulealea o Iosefa e fia iloa po o le fea ekalesia e auai ma maua ai le taitaiga i le Iakopo 1:5. Na tonu ia Iosefa o le a ia fesili atu i le Atua.

I se tasi taeao o le tautotogo i le 1820, sa alu atu o ia i le togavao e tatalo ai, ae na vave lava ona osofia e se mana pogisa. Sa ia tusia e uiga i lenei mea:

“I lea lava taimi o le atuatuvale tele, na ou vaaia ai se malamalama faaniutu i luga ae tonu lava o lou ulu, ua sili atu le pupula i le la, ua alu ifo malie lava seia oo mai i ou luga.

“Sa lei pine lava ona oo mai ae ou faalogoina ua laveaiina au mai le fili na taofia au. Ina ua oo mai le malamalama i ou luga, sa ou vaaia ni Tagata e toalua, o lo laua pupula ma le mamalu e lē mafaamatalaina, o tutu mai i ou luga ae i le ea. Sa fetalai mai le tasi o i laua ia te au, ma fofoga mai ia te au i lou igoa ma fetalai mai, ao tusi ane i le tasi—O Lou Atalii Pele lenei. Faalogo ia te Ia!” (Iosefa Samita—Talafaasolopito 1:16–17).