Faafetai mo Lau Auaunaga

Taofia le igoa

O oe o se faataitaiga tonu lava o na tamaitai o e, talu mai aso o Navu, na auauna atu i le tasi ma le isi e ala i faiaoga asiasi agaalofa ma musuia.

Ou te le iloa lou suafa, po o le a lou matua, po o se isi lava mea e uiga ia te oe. Pau lava le mea ou te iloa o oe o le faiaoga asiasi o Ioana, ma ou te talisapaia ma lou loto atoa lau auaunaga maelega.

Ou te iloa e le faigofie le asiasi atu i se uso ua le toaga mai e pei o Ioana (ua suia le igoa), lau tama teine faaletulafono, aemaise lava pe afai e tau le sagisagi fiafia atu o ia. Ou te masalo sa le manao foi e te sau i le taimi muamua. Ae na faamatala mai e Ioana ia te au, ua avea oe ma se uo moni ia te ia, e te afe atu e vaai po o a mai o ia ma talia o ia i le tulaga e pei ona i ai.

I le 19 tausaga talu ona faaipoipo Ioana i lou atalii, o le taimi muamua lenei ua ia taua ai le i ai o se faiaoga asiasi. Talu ai nei sa ia faamatala mai ai lou asiasi soo atu ia te ia ma lou magafagafa ma agalelei i taimi uma. Fai mai o ia, sa e fesoasoani atu i ni nai taimi ao mai ma sa e ofo atu foi e ave le afafine a lau tama i Tamaitai Talavou.

Mo le 10 tausaga ua mavae, sa nonofo ai o ia, lau tama tama, ma lo laua aiga i le faitau selau o maila le mamao mai ia i matou. Sa ou tatalo ia faapea ona alolofa ma tausia i latou e isi e pei ona ou faia ai, ma sa ou aioi atu ma loimata i le Tama Faalelagi ina ia aapa atu isi ia i latou e pei o le a ou faia ai pe afai e nonofo latalata mai. Mai faamatalaga a Ioana, o oe o le tali i au tatalo.

E tusa lava pe le usitai Ioana ma lau tama tama i le Upu o le Poto ma le o atu i le lotu, ae o i latou lava o ni tagata lelei ma e alolofa i le la fanau. Mo se mafuaaga e le iloa, sa le punitia ai lau vaai i le asu o le sikaleti a Ioana. Sa e le faauigaina o ia e ala i le, pe na alu atu i le lotu. Sa e faamasani ia te ia ma iloa ai o ia o se tina agaalofa e manao i lana tama teine ia alu i le lotu ma maua se molimau. Ma ina ua faia se taotoga o Ioana, sa e aumaia taumafataga o le afiafi e aunoa ma le mafaufau pe o ia lava na mafua ai ona oo nisi o faafitauli i lona soifua maloloina.

Ou te matuai faafetai ona o oe o se faataitaiga i le afafine o lou atalii. E mafai ona ia vaai atu ia te oe o se tasi e alofa i tagata uma, ma faia mea uma e te mafaia e faaali atu ai le popole alofa. Sa ia faamatala mai ia te au, i se tasi aso, sa lei i ai sau taavale, sa outou savavali mai ai ma lau fanau laiti i le silia ma le maila i lona fale, e aumai ni kuki.

Sa e fai atu ia te ia, “Sa ou mafaufau mai lava ia te oulua ma lou tina ma sa [ou] manao e fai se mea manaia mo oulua—ona pau lava.”

Maimau pe ana mafai ona ou tau atu ia te oe lou matuai talisapaia o lou tuuto i lou valaauga o se faiaoga asiasi. O oe o se faataitaiga tonu lava o na tamaitai o e, talu mai aso o Navu, na auauna atu i le tasi ma le isi e ala i faiaoga asiasi agaalofa ma musuia. Ua e faaalia lena auaunaga ma le alofa e ala i lou asiasi atu ma le faapelepele i lau tama teine faaletulafono e le toaga i le lotu.

Faafetai.