Faifeau Faamisiona Matutua:——— E Manaomia, Faamanuiaina, ma Alofaina
O le auauna atu o se ulugalii faamisiona e mafai ona sili atu ona fetuutuunai, e le taugata tele, ma e sili atu ona fiafia nai lo le mea e te manatu i ai.
“E mafai ona e sau e fesoasoani?”
O se fesili sa taliina muamua e Gerald ma Lorna Malmrose o Uosigitone, ISA. Sa la fai atu ioe ina ua talosagaina i laua e lo laua epikopo sa i ai muamua, o le sa avea i le taimi lea o se peresitene o le misiona, pe mafai ona la galulue faatasi ma ia i West Indies. Sa laua toe fai atu ioe ina ua valaauina i laua e lo latou peresitene o le siteki e faia se misiona tautua i le laumua o le Ekalesia i le Aai o Sate Leki, Iuta, ISA, e galulue i komepiuta ma le taulimaina o tagata faigaluega.
Ina ua toe valaauina lo laua epikopo sa i ai muamua ma le peresitene o le misiona, o Reid Robison, o le taimi la lenei e avea ma peresitene o le nofoaga autu e aoao ai faifeautalai i Accra, Ghana, sa ia fesili atu pe o le a toe fesoasoani atu le au Malmrose.
“Sa ma iloaina e mafai ona ma faalagolago i le Alii,” o le tala lea a Elder Malmrose. “O lea sa ma filifili ai e toe faalagolago atu ia te Ia.” Sa laua fai atu ioe, faatumu a laua fomu e fautua atu ai, maua mai le la valaauga, ma e lei leva ae i ai loa i Ghana.
Auauna Atu o se Ulugalii
O aafiaga o le au Malmrose ua faaalia ai nisi o mataupu faavae e uiga i ulugalii matutua ua auauna atu i ni misiona lea atonu e le malamalama i ai le lautele [o tagata]:
-
E lua ituaiga o misiona: (1) O le Peresitene o le Ekalesia e valaauina ulugalii matutua e auauna atu a le mai i o latou lava aiga pe o ese mai le aiga. (2) O le peresitene o le siteki e valaauina ulugalii faamisiona tautua i le Ekalesia e faatumu mo se taimi le tumau manaoga i le lotoifale pe faalisone, mai le 8 i le 32 itula i le vaiaso. E masani ona latou nonofo ma auauna i le lotoifale ae o nisi taimi e mafai ona auauna ese mai i aiga.
-
Ua uunaia peresitene o Misiona e sue ulugalii o e e mafai ona faafetauia manaoga i a latou misiona, ma e mafai e ulugalii ona faailoa mai mea latou te mananao i ai. “Matou te le o faapea atu e mafai e ulugalii ona piki ma filifili a latou lava tofiga faamisiona,” o le faamalamalama mai lea a Elder Jeffrey R. Holland o le Korama a Aposetolo e Toasefululua. “O se valaauga o se valaauga lava. … [Ae] matou te talanoa atu ia tatou ulugalii matutua e uiga i tulaga e mananao i ai i a latou auaunaga, ma e tuuina atu manatunatuga uma e tuu i latou e auauna po o fea lava ma po o le a le faiga o a latou auaunaga.”1
-
E soalaupule peresitene o misiona ma ulugalii e uiga i auala e sili ona faaaoga ai o latou tomai ma gatafia. “Ina ia maua le aafiaga aupito anoa i le avea ai ma se ulugalii matutua,” na saunoa ai Peresitene Robison, “e tatau ona outou maua le avanoa e galulue ai i eria tou te faamemelo i ai, ma se mea e i ai sou tomai lea tou te lagona ai e i ai se mea tou te ofoina atu.”
Mo se faataitaiga, na silafia e Peresitene Robison o Elder Malmrose e tautala i le faa-Farani, e aoga aua o le toatele o tagata Aferika e tautatala i le faa-Farani. “Sa ou vaai faalemafaufau ia te ia o auai i femalagaaiga ma galue i visa,” o le tala lea a Peresitene Robison. “Ae ina ua taunuu mai o ia iinei, sa ou lagonaina e le o le mea lena sa fiafia moni i ai o ia. O lea sa ou valaauliaina ai o ia e faaaoga ona tomai i komepiuta. Ua ia sefeina i matou mai le tele ma le tele o itula.” E fesoasoani foi Elder Malmrose i faifeautalai, ae maise lava o faifeautalai e tautatala faa-Farani, e saunia igoa ma fai galuega o le malumalu mo o latou aiga. O Sister Malmrose, o se tagata lagolago faamaonia i fomai, sa tofia e galulue faatasi ma le fomai ma le tausisoifua a le misiona.
Ua Ia Saunia le Ala
E pei o le au Malmrose, ua iloa e isi ulugalii, a latou faalagolago i le Alii, o le a Ia saunia le ala. O le mea lena na tupu ia Alvin ma Corazon Rieta o Kawit, Cavite, i le atu Filipaina.
“E lua tausaga ao lei faia le ma faaiuga e auauna atu, sa amata ai ona ma faatulagaina ni fuafuaga mautu mo le pisinisi a le matou aiga,” o le faamatala mai lea a Elder Rieta. “Na uma ona faauu le ma atalii ma le afafine mai le kolisi ma e mafai ona sui ia i maua, ae sa ma mafaufau po o ai o le a foia faafitauli o le pisinisi ma o le a foi se tali mai a o matou paaga i a matou fuafuaga.”
Sa popole foi Sister Rieta i le tuua ai o lona tina ua matua. “Sa ou fefe ina nei maliu o ia ao ma toesea ai,” na ia fai mai ai. “Sa ou lagonaina foi le le talafeagai ma le luitau o le aoaoina atu o le talalelei.”
Sa latou soalaupule faatasi ma lo laua epikopo ma se ulugalii na auauna atu talu ai nei i Davao. “Sa tuuina atu uma a latou molimau malolosi e faapea, o le a taiala e le Alii ia ulugalii taitoatasi ia iloa le ala e taulima ai a latou fuafuaga i le fale, o latou aiga, ma tupe mo a latou misiona,” o le tala lea a Sister Rieta.
Fai mai Elder Rieta, “A o matou sailia le taitaiga, sa faapea ona talanoaina ai o matou atugaluga—sa sologa manuia a matou pisinisi e ui lava i luitau, sa faailoa mai e a matou paaga le olioli ma le lagolago, ma sa atili felatai ai lo matou aiga i le tausiga o lo matou tina mai. Sa amata ona matou malamalama o le a fesoasoani moni le Alii ia i matou.”
O loo galulue nei le au Rieta e lagolago i tagata o le ekalesia ma le autaitai i le Misiona a Filipaina Cagayan de Oro.
Mea e Tele e Mafai Ona Faia
O nisi o ulugalii e mafaufau i tulaga faatapulaa faaletino, ae e le faapena Keith ma Jennilyn Mauerman o Iuta, ISA. O tausaga ua mavae, ina ua mavae le fa masina talu ona la faaipoipo i le Malumalu o Los Angeles Kalefonia, sa faapea ona valaauina ai Keith ma auina atu i le taua. I le avea ai ma se taitai o fitafita e fepuna mai i fafo o vaalele, sa savali ai o ia i luma o isi fitafita ae na faapea ona pa ai se maina na tatao i le eleele. Sa faapea ona mumutu uma ai ona vae. Ina ua taunuu mai o ia i le aiga, sa faanatinati atu Jennilyn i ona tafatafa.
“Sa ou iloaina e le tatau ona ou popole,” o le tala lea a Keith, “aua ua uma ona ma faaipoipo mo le faavavau. Sa lagolagoina au e lou toalua i lenei taimi atoa. O le a ia lagolagoina au i aso uma.”
Ina ua litaea Sister Mauerman, na laua filifili loa e auauna atu i se misiona. Ae mata o le a i ai se faafitauli ia Elder Mauerman ona e mumutu uma ona vae? “E i ai lava i taimi uma mea e le mafai ona ou faia,” o lana tala lea, “ae e ese le tele o mea e mafai ona ou faia, sa ma iloa o le a i ai se avanoa mo i maua.”
A o faatumuina a laua fomu e fautuaina atu ai, sa ia faailogaina ai se pusa e tau atu ai sa auauna o ia i le militeli. E lei umi ae la maua se valaau mai le Sootaga Militeli o le Ekalesia. “Sa i ai sau kata e faailoa ai au, lea o le a mafai ai ona ma ulufale i nofoaga autu o le militeli, o lea na latou talosagaina ai le ma faatagaga e fautua atu i maua mo se misiona i sootaga i le militeli.”
Sa valaauina le au Mauerman e auauna atu i se nofoaga autu o le militeli i Karolaina i Matu, ISA. Na faamatalaina e Elder Mauerman: “Fai mai le faailo o loo i le faitotoa ‘Fort Bragg, Aiga o le Au Fepuna mai Vaalele.’ Ina ua faafeiloai i maua e leoleo o le nofoaga autu faatasi ma le mau tauave a le au fepuna mai vaalele, o le ‘Ia Tau Lava i Lalo!’ o le taimi muamua lea na ou faalogo i ai i le tele o tausaga. Sa pei lava o le aiga, e ui ou te lei oo muamua i Fort Bragg. Sa ou iloaina o le valaauga o le ma misiona, sa matuai fetaui lelei lava ma e silafia e le Alii au.”
“Sa ma aoaoina atu lesona e uiga i le faalagolago o le tagata ia te ia lava, ma le malosi ma e uiga i le faamalolosia o faaipoipoga,” o le tala lea a Sister Mauerman. “I le amataga ma te lei mananao e faasoa atu le ma tala, ae na ma iloa ai o le faasoaina atu e faia ai se eseesega tele. Na tilotilo mai fitafita ma o latou taitoalua ia i maua ma faapea mai, ‘Afai e mafai ona oulua faia, matou te mafaia foi.’”
Sa maua e le au Mauerman se aafiaga lelei i Karolaina i Matu, o lea na talosagaina ai i laua e toe auauna atu. O le taimi nei la te malaga ai mo le tusa ma le 40 maila (64 km) mai lo latou aiga i Orem agai i le Aai o Sate Leki e faalua i le vaiaso e auauna atu i le ofisa o le Sootaga Militeli o le Ekalesia. La te aoaoina foi ulugalii matutua i le nofoaga autu e aoao ai faifeautalai i Provo, lea la te iloa ai, e toetoe o vaega uma e aofia ai se tagata o le ua avea ma faalavefau ina ia mafai ona auauna atu.
Gagana a le Lalolagi Atoa
O le valaauina i le Misiona a Pasila Cuiabá, sa faapea ona popole ai Randy ma Lou Ellen Romrell o Iuta. E ui lava ina sa auauna atu Elder Romrell i Pasila o se faifeautalai talavou, ae ua faapea ona galo ai lana faa-Potukale. Ma sa le iloa e Sister Romrell faaPotukale. Ae peitai, o le suesue ma taumafaiga, na fesoasoani e toe faafoi mai ai tomai o Elder Romrell i le faa-Potukale ae tuputupu ae ai ia Sister Romrell. Sa faapena foi se ukulele.
“Ou te lei fuafua lava e aumai,” o le tala lea a Sister Romrell, “ae na musuia Elder Romrell e aumai, ma e ofoofogia le vaaia o mea ua ia faia. A o matou aoao atu i tagata sailiili ma galulue i le toe faatoaagaina mai ma faaaumea, e manaia tele le faaaoga e faapepese ai tagata i viiga. Matou te aoaoina le gagana, ae aumai e viiga se agaga malosi faatasi ma i latou.”
E ui o loo atiina ae pea ona tomai faa-Potukale, ae ua lelei ai lava lana pese i musika. “O musika e aumaia faatasi ai tagata,” o lana tala lea. “E tusa lava pe ou te le malamalama i mea uma latou te fai mai ai i le taimi o se asiasiga, a matou pepese, matou te fesootai.” Sa valaaulia i laua e talanoa atu i aoga e uiga i le aso fiafia a Amerika o le Aso Faafetai, sa usuina ai e le au Romrell ia viiga o le faafetai—sa taina i le ukulele. Ma e faaaoga foi e Sister Romrell se mea fai faili ua sili atu ona masani ai, o le piano, e ta ai viiga i le lotu.
Ma le faa-Potukale? “E tusa lava pe le lelei lau tautala, ae o le aoaoina o ni nai upu e fesoasoani lea,” o lana tala lea. “E tele lava se aafiaga o le tau lava ina fai atu talofa ma le faafeiloaia o tagata. Tuu atu ia latou iloa o loo e aoao [i le gagana]. Ia faafaigofie ma faalagolago i le Agaga.” Ma o le mea moni, o le Agaga o le isi lea gagana e mafai ona faasoa atu e tagata uma.
Auaunaga i le Aiga
O Paul ma Mar Jean Lewis mai Iuta ua uma ona auauna atu faatasi i ni misiona se tolu (Malumalu o Palemaira Niu Ioka; Malumalu o Hong Kong Saina; ma Kalaotia, Serepia, ma le Silovenia i le seminare ma inisitituti). Sa sauni i laua e toe auauna atu i se isi [misiona] ae fesili atu loa le peresitene o le siteki ia i laua, “Pe e te lua mananao e auauna iinei lava i la tatou siteki, e lagolago i le misiona o loo tatou nonofo ai?”
“Ma te fou mai iinei, ma sa o se avanoa manaia tele,” o le tala lea a Sister Lewis. “Matou te galulue faatasi ma alii ma tamaitai faifeautalai talavou, maua se fegalegaleaiga vavalalata ma le peresitene o le misiona, o atu i fonotaga a itu ma sone, ma galulue ma taitai misiona a uarota.” La te asiasi atu foi i tagata sailiili ma i latou o e ua le toaaga mai.
Fai mai Sister Lewis, “Ua matou feiloai i ni tagata lelei lea na semanu matou te le iloaina lava, e aofia ai nisi o e ua se ese mai le ala. O le vaaia ua latou toe foi mai, maua sauniga, ma o atu i le malumalu o se faamanuiaga matagofie.”
“E toatele ulugalii, pe a latou mafaufau e uiga i le auauna atu i se misiona, e popole po o le a le mea o le a fai i o latou fale ma a latou taavale po o mea o le a latou misi ai i o latou aiga,” na fai mai ai Elder Lewis. “Sa mafai lava ona ma nonofo i lo ma fale ma ave la maua lava taavale. Ua faamalosiauina i maua e o i gaoioiga faaleaiga, pau lava le mea ia le faalavelave ai i tiutetauave faafaifeautalai. Sa ma i ai lava foi iinei mo le fanauga o le tama a le ma tama.”
Faamanuiaga o le Aiga
I le isi itu, o Jill ma Kent Sorensen, e o mai i le siteki lava e tasi, fai mai, o se tasi o auala sili ona lelei e faamalosia ai lo laua aiga o le auauna ese mai le aiga. Fai mai Sister Sorensen, “O se tasi o alofaga autu e tuuina atu e ulugalii e le o ai, o fanau a fanau, fanau ua faaipoipoina e i ai luitau, fanau teine o le a fanauina ni pepe, matua matutua—ma isi tulaga faapena. O le aiga o se mea e ave i ai le faamuamua, ma e te misia na mea i aso uma. Ae o le o i se misiona e auina atu ai se savali mamana o le galuega faafaifeautalai e taua tele.”
Ma le isi, na taua e Elder Sorensen, “ua tele auala e fesootai ai i le taimi lenei aua ua mafai ona e siakia i latou i taimi uma.”
O le malaga faafaifeautalai a le au Sorensen sa amataina i le tolu tausaga ua mavae, ina ua talosagaina i laua e le epikopo e tali faeasaite faalemasina mo ulugalii o loo mafaufau e auauna atu faamisiona. Fai mai Sister Sorensen, “Ina ua mavae ona talanoa soo e faatatau i ai, ua tatau lava ona ma o foi i maua ia!” Sa la mauaina se valaauga e auauna atu i le Atu Kuki, lea sa auauna atu ai matua matutua o Jill i le 50 tausaga talu ai.
O le taimi nei, faatasi ai ma isi tiute, ua talosagaina ai i laua e aoao vasega o le Tusi Paia i aoga.
“Matou te talanoa e uiga ia Keriso o le papa,” o le tala lea a Elder Sorensen. “Ma te tuu atu i tamaiti aoga se tamai maa ma uunaia i latou e tumau pea le mausali i le papa o Keriso. O le taimi nei, soo se mea lava ma te o i ai, e fai mai tagata, ‘Papa mausali!’ pe a latou vaai ia i maua.”
O Mai e Fesoasoani
Afai o loo e mafaufau i se misiona faafaifeautalai po o se misiona tautua a le Ekalesia, o le a fesili atu nei ulugalii uma ia te oe le fesili lava e tasi na fesili ai Peresitene Robison ia Gerald ma Lorna Malmrose: “E mafai ona lua o mai e fesoasoani mai?” Ma o le a latou tau atu ia te oe, po o le a lava le auala e te auai ai, e mautinoa lava le folafolaga lenei: E manaomia oe, e mafai ona e saofaga, ma o le a faamanuiaina ma alofaina oe.