Faateia, Faanoanoa, & Fuafuaga a le Atua
E alala le tusitala i Alepania.
I le taimi o le aafiaga aupito faataumaoia o lou olaga, sa ou lagonaina ai sa i ai le Tama Faalelagi ia te au i le taimi atoa o lau malaga.
Ata na tusia e David Curtis
Sa o se taeao po i le 2008 ina ua fafagu au e lou tina ou te alu i le aoga. Sa matuai ou fiafia lava i lena taeao, ae sa ou le iloa o le a suia i se aso sili ona leaga o lou olaga po o le taimi mulimuli lea o le a ma faatasi ai ma ia. Sa lei maea au vasega uma i lena aso, ona sa piki au e se uo a lo matou aiga ma tau mai ia te au na fasioti e lou tina o ia lava. Sa na o le 12 ou tausaga.
Sa ou mafaufau, “E mafai faapefea ona ou ola e aunoa ma lou tina?” O ia o lau uo sili.
Sa ou tagi mo ni masina. Sa ou le fiafia e alu i le aoga ona sa ese le faiga o au e isi tamaiti ma sa popole alofa ia te au. Sa matuai ou le iloaina lava le mea sa tatau ona ou faia; na pau le mea na ou iloa na tatau ona ou malosi mo isi tagata uma.
I se tasi aso, pe a ma le lima po o le ono masina talu ona mavae le maliu o lou tina, sa ou i ai nao au i lou potu i talaane o le faamalama, [sa ou] tagi, ma taumafai ia malamalama po o le a le mafuaaga na ou i ai iinei. Na faafuasei lava ona ou faalogoina se leo i lou mafaufau: “O oe o lou afafine; o le a ou le tuu atu oe e puapuagatia.” Sa ou iloaina o le Atua. Ae na faateia au aua sa ou le toe talitonu ia te Ia, ae maise lava ona sa ou manatu o le Atua na aveeseina lou tina mai ia te au. E ui lava ina sa ou le iloa le uiga o Lana fetalaiga, ae na ou lagonaina le saogalemu.
E tolu tausaga mulimuli ane, sa ou alu ai i Roma, Italia, e asiasi i le tamaloa o lou aiga. Sa ia faamatala soo mai e uiga i se lotu sa alu i ai. I se tasi Aso Sa, sa alu ai ma ave au. O le a ou manatua pea le savali agai atu i faitotoa o le falesa mo le uluai taimi ma le lagonaina o le alofa o le Tama Faalelagi ina ua ou alu atu i totonu. Sa pei lava o le aiga.
Sa amata ona ou alu i le lotu i Aso Sa taitasi uma, ma i gaoioiga uma lava i le aluga o le vaiaso. Sa ou fiafia e faatasi ma le autalavou o le Ekalesia. Sa latou faafiafiaina atili au. Sa latou manatu ma talitonu i mea lava e tasi sa ou talitonu i ai. Ona oo lea, ina ua mavae le tolu masina, na uma ou aso malolo o le taumafanafana ma na tatau ona ou toe foi atu i Alepania.
Ina ua ou toe foi atu i le fale, sa ou tau atu i lou tama e uiga i lagona na ou mauaina, ma lou fiafia na lagonaina i le aluga o lena taimi atoa. Sa lei fiafia i ai o ia. Sa ia fai mai, o le a ia le faatagaina au e faaauau pea ona alu i le lotu pe aoao atili e uiga i ai. O lea o le a tatau ai ona ou onosai mo le isi tolu tausaga e sosoo ai seia atoa lou 18 tausaga. Ona mafai lea ona ou filifili mo au lava ia ma papatisoina.
I le taimi lenei, sa faamanuiaina au i le toatele o tagata o e faamatala mai ia te au mea na latou aoaoina i Aso Sa taitasi i le lotu. O se tasi o na tagata o Sitefani. Sa nofo o ia i Italia i le taimi na auai ai le tamaloa o lou aiga i le Ekalesia, ae na toe foi atu o ia i lona aiga i le Iunaite Setete. Sa manatu le tamaloa o lou aiga o le a lelei mo i maua ona tusi atu i le tasi ma le isi, o lea na ou faaopoopoina ai o ia o se uo i luga o le Apiofoliga [Facebook].
E ui ma te lei feiloai lava faafesagai, ae o le a ou faafetai pea ia te ia mo le fesoasoani i le atiina ae o lou faatuatua ma aoao atili e uiga i le talalelei a Iesu Keriso. Na toetoe o Aso Sa uma e tusi mai ai o ia ia te au ma tau mai mea uma sa ia aoaoina i le lotu, ona ia taliina lea o au fesili. Sa avea o ia ma se uo maoae ia te au.
Mulimuli ane, ina ua mavae tausaga o le onosai, sa papatisoina loa au i le na o le lua o aso talu ona uma lou aso fanau lona 18. Ma e le toe umi ae ou faasoa atu i lou tina le fiafia lea sa ou lagonaina i lena aso, aua o le a papatisoina au mo ia. Ou te iloa o le a mitamita o ia i le olaga ua ou filifilia.
Ou te lagona le faamanuiaina o au e le Tama Faalelagi aua sa i ai o Ia faatasi ma au i le taimi atoa o lau malaga i le tele o auala. Sa tau lava o lou faatalitali ma le onosai ona sa i ai Sana fuafuaga mo au. O Ia o lē na tuuina mai ia te au le malosi e taulima ai luitau uma sa feagai ma au. Sa i ai o Ia iina i taimi uma, e fesoasoani mai ia ou fiafia atili.