O Se Avanoa Lona Lua

Kaylee Baldwin, Arisona, ISA

O le taimi muamua sa ou feiloai ai ia te ia, sa ou uuina lau vaiolini.

Sa ia soso latalata mai ia te au a o ou savali atu i le potuai, ma na tau le pusa o lau vaiolini i lou vae.

“Vaiolini,” sa fai mai ai a o latalata mai o ia.

“Ioe,” na ou fai atu ai.

Ou te lei matuai talanoa lava i se tagata sa i ai ni manaoga faapitoa ma sa ou le iloa se isi tala e fai atu. Sa taumulimuli mai ia te au i lau laulau ma saofai i ou autafa, ma faasino atu i le pusa o lau vaiolini.

“Vaiolini,” na ia toe fai mai ai.

Sa ou tatalaina le pusa o lau [vaiolini], ma sa matuai fiafia o ia. Sa ia soona iniina ia uaua. Sa tatavale lou fatu ina ua ou vaai faalemafaufau i le motu o se uaua mai lau vaiolini, ma faapea ona ou tapunia faaeteete ai le pusa. Sa ia opoina au ao lei aluese atu.

Sa ou vaai soo ia te ia i le mavae ai o lenei [feiloaiga].

Soo se taimi lava sa vaai mai ai ia te au, na te opoina au ma sogi mai i luga o lou ulu.

Mo le taimi na totoe o le aoga maualuga, sa ou taumafai ai i taimi uma e alo mai ia te ia pe a ou vaai atu o sau. Pe a ona maua au ma faasoo au i ana fusi ma ni sogi susū, ou te onosaia lava mo ni nai sekone i se ataata fai faamalosi ona ou savali vave ese lea e aunoa ma le fai atua o se upu.

“Oi, leai,” sa ou memumemu ai ina ua ou vaaia o ia i lau konaseti mulimuli i le aufaili a le aoga maualuga. Ina ua uma le konaseti, sa savalivali malie mai o ia i le mea sa matou tutu ai ma au uo i fafo o le fale faafiafia.

Sa meimei i tua au uo ao sau o ia ia te au ma se ataata, ma faaloloa mai ona lima mo se opo.

“Viliamu!”

Sa ou faliu ma iloa atu se tamaitai o tamoemoe agai mai ia i matou.

“Faamalie atu,” sa ia fai mai ai, ma lave mai lona lima i le lima [o Viliamu]. “E fiafia tele Viliamu i le vaiolini. Sa aioi mai e aumai o ia i le konaseti i le po nei. Ta o, lau pele.”

Ana le oo mai i lena taimi, ou te lei iloaina lava lona igoa. Sa ou feiloai ia Viliamu i le lua tausaga na tea atu, ae sa ou faaaluina le tele o le taimi e alo ai mai ia te ia, na faapea ona ou le faia ai se taumafaiga e faamasani lelei ai ia te ia. A o ou vaai atu i le o ese atu o Viliamu ma lona tina, sa faapea ona faatumulia au i le maasiasi.

O tausaga mulimuli ane, ina ua uma ona ou faaipoipo, sa ou fanauina ai se tamaitiiti aulelei e le atoatoa le malosi o lona mafaufau o le sa ma faaigoaina ia Spencer. E masani ona tau ou mafaufauga ia Viliamu ao ou vaavaai atu i lau tama tama, ma ou manatunatu pe mata o le a i ai ni aafiaga faapea o Spencer. Pe mata o le a alo tagata mai ia te ia ona e kisi soo pe fufusi tele ana opo? Pe mata o le a lē nofonofo lelei lana tupulaga ona o ona tulaga faatapulaaina?

Ina ua fa masina le matua o Spencer, sa ou aveina o ia i le falemai o le matou lotoifale mo se siaki faatulagaina. Ao ou aveeseina o ia mai le taavale, sa ou iloa atu ni tagata se toalua o o ese mai le falemai. I lou le talitonu, sa ou iloaina o Viliamu ma lona tina.

“Viliamu!” Na ou valaau atu ai ina ua ma latalata atu i ai, ma le tata leotele o lou fatu.

“Talofa!” Sa savali lemu agai mai o ia i le paka o taavale, ma se ataata tele na susulu ai ona foliga. Sa faaloloa mai ona lima ma uu atu ou lima i se faatalofa naunautai.

“O a mai oe?” Sa ou fesili atu ai ia te ia.

“Vaiolini,” na ia fai mai ai, ma sa susulu mai le fiafia i ona foliga.

Vaiolini. Sa ia manatuaina foi au. “Ioe,” sa ou tali atu ai i se ata tagi, “Ou te taina le vaiolini.”

A o matou talanoa, sa siiae lou loto i le tatalo mo le alofa mutimutivale o se Tama oi le Lagi alofa o le Na Ia silafia lou moomoo ia ou toe feiloai ia Viliamu. Ou te faafetai ona na silasila mai le Atua ia te au—o se tina talavou tauivi sa lofituina i faafitauli o le soifua maloloina o lau tama tama, ma popole mo lona lumanai—ma tuuina mai ia te au se aafiaga na faamanatu mai ai ia te au ua Ia silafia i tatou.