Toafilemu i Lou Loto

Saunia e Carol F. McConkie

Fesoasoani Muamua i le Au Peresitene Aoao o Tamaitai Talavou

Ina ua valu ou tausaga, sa ou vaai ai i le perofeta o Peresitene David O. McKay (1873–1970). Sa susu mai o ia e faapaia se falelotu fou o le Ekalesia i Palamaira, Niu Ioka, ISA. “Na o lou aiga i le faapaiaga. E toatele isi tagata na o mai ai foi. Sa matou fiafia uma lava e vaai i le perofeta!

Sa fai si ou laitiiti, o lea sa faigata ai ona ou tau autilotilo solo i tagata uma. Ae na mafai lava ona ou lagonaina le alofa o Peresitene McKay. Mo na o se minute lava, na ou vaaia ai lona lauulu sinasina ma ona foliga agalelei. Sa ou faapea, “O foliga nei e foliga ai se perofeta a le Atua.” Sa ou faitau e uiga i perofeta i tusitusiga paia, ae o le taimi muamua lenei ua ou vaaitino ai i se perofeta po o soo se Pulega Aoao. Sa ou iloaina ai o perofeta o ni tagata moi. Ma e alolofa ia i tatou! O le a ou manatua pea le alofa ma le toafilemu na ou lagonaina i lena aso.

Ina ua 11 ou tausaga, sa ou maua ai se isi aafiaga sa fesoasoani ou te lagonaina ai le toafilemu i lou loto. Sa latalata mai le konafesi a le siteki, ma sa maua sou avanoa e pese ai i le aufaipese a le siteki. Sa matuai ou fiafia lava! Ou te ofuina se ofutino paepae manaia, ma sa ou lagonaina le faapitoa. O le pese na matou usuina sa i ai upu mai i le Ioane 14:27, “Ou te tuuina atu ia te outou le manuia, o lou manuia ou te avatu ai ia te outou: ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau.”

Na matuai ootia lou loto i na upu, ma e oo mai lava i le taimi nei o loo ou manatuaina pea. Ina ua ou usuina na upu, sa ou iloaina ua moni. Sa ou lagonaina le tau mai e le Agaga Paia ia te au, o le mulimuli ia Iesu Keriso e fesoasoani tatou te lagona ai le toafilemu. Talu mai lena taimi, soo se taimi lava e oo mai ai ni ou luitau, ou te manatua lava lenei mau ma e aumai ai ia te au le toafilemu. O le upumoni sa ou aoaoina ao ou laitiiti ua faamanuiaina ai lou olaga atoa.