Iloaina o Mea Taufaasese a Satani
E alala le tusitala i Iuta, ISA.
Pe a tatou feagai ma mea taufaasese faaleagaga, e mafai ona fesoasoani le Tusi a Mamona ia tatou iloa ai mea e moni ma mea e le moni.
Sa ou tuuina ni tala Amerika se lua i totonu o lau atotupe i le faleoloa ae tau ai lau vaai i se tasi o tala pepa. Sa ou faapea o le lanu meamata sa fai si vaivai nai lo le lanu o isi, o lea na ou iloiloina atili ai. Ona ou matauina lea o le ata o Peresitene George Washington sa lei manino lelei mai. Sa oo lava foi i le pepa sa ese lava le faalogona. O se tupe taufaasese! Sa faafesuiai mai e le faatauoloa i se tala pepa moi ae ave atu le tupe pepa taufaasese i le pule o le faleoloa.
E tele lava ina ou mafaufau i lena tala pepa taufaasese talu mai lena taimi. Sa ou mafaufau po o le a se umi talu ona faaaoga ai ma pe toafia ni tagata na faavaleaina ai i le aluga o tausaga. O le mea moni, ana ou le mataala, semanu e faavalea ai foi ma au. Ae a faatusatusa i le mea moi ma taulai atu i eseesega nai lo o mea e tutusa ai, e mafai ona ou iloa ai sa o se tupe taufaasese.
Ua tumu le Tusi a Mamona i faataitaiga o taufaasese faaleagaga, o e na mulimuli i auala a Satani o le pepelo ma le faavaleaina o isi e maua ai a latou mea. O le suesueina o a latou togafiti ma vai, e amata ai ona tatou iloa a latou measese ma sasi i le ala lava e tasi lea e amata matau ai e mata ua aoaoina le eseesega i le va o le tupe moi ma le tupe taufaasese. O le tele ona tatou faamasani o la tatou vaai ia iloa eseesega, o le lelei saunia foi lea o le a tatou i ai e faailoa le au taufaasese o aso nei ma tetee atu i a latou pepelo.
Aoina Mai o le Malamalama e uiga i Mea Taufaasese a Satani
Ua saili Satani e taitai ese atu i tatou e ala i ana lava ituaiga o taufaaseseega faaleagaga, ma afai tatou te le faaeteete, o le a faavaleaina i tatou. Sa lapatai mai Peresitene Iosefa F. Samita (1838–1918) e faapea: “O Satani o se tagata faataitai atamai, ma ao tuuina atu upumoni faamaoni o le talalelei i le lalolagi i se faateleina faifaipea, ua faapena foi ona ia faasalalau atu tupe taufaasese o aoaoga faavae sese. Ia nofouta i ana tupe pepelo, aua e leai se mea e faatauina mai ai mo oe ae na o le faamoe, le fiafia ma le oti faaleagaga.”1
O le puipuiga sili ona lelei e tetee atu ai i le faavaleaina e taufaasese a Satani, o le faamasani lea i le mea e mafai ai i upumoni o le talalelei. O le loloto lava o lo tatou iloa o le upumoni, o le faigofie foi lea ona iloa o eseesega pe a tuu mai e Satani ia i tatou ana mea taufaasese. A ia tuuina mai la, e manaomia ona tatou vaavaai mo eseesega ae le o mea e tutusa ai, pei lava ona sa ou faia i au tala pepa, aua o iina o le a faaalia ai i taimi uma ia pepelo.
Sa aoao mai e Peresitene Ezra Taft Benson (1899–1994) e faapea: “O le Tusi a Mamona e faailoa ai fili o Keriso. … Na mamanuina e le Atua le Tusi a Mamona, faatasi ai ma lona muai silafia le mafuatiaina ina ia mafai ona tatou iloa ai le mea sese ma iloa ai auala e faafetaiaia ai manatu sese faaleaoaoga, faaupufai, faalelotu, ma faafilosofia o o tatou aso.”2
I le taimi nei o loo tatou tau ai ma Satani. O i tatou, e pei o soo se autau, e tatau ona tatou iloa po o a mea a le fili o fai. Le iloaina o le taimi ma le nofoaga o le a osofaia e le fili, mo se faataitaiga, e mafai ona avea ma faamatalaga taua tele. O le mafuaaga lena ua taua ai le maua mai o faamatalaga faapena o le “aoina mai o le malamalama.” O le iloa o lo tatou fili, o le ia atamai atu nai lo lo tatou fili. O le Tusi a Mamona e mafai ona fesoasoani ia i tatou i le “aoina mai o malamalama” i metotia taufaasese a Satani.
O Faaupuga Faaviivii e Taufaasese
E silia ma le afa o mea taufaasese i le Tusi a Mamona ua faaaoga ai faaupuga faaviivii ma se uiga tausaafia e ausia ai a latou sini. Mo se faataitaiga, o Selema, “sa ia te ia se malamalama atoatoa o le gagana a le nuu; o le mea lea sa mafai ai ona ia faaaoga o le taufaasee tele, ma le mana tele o le tautala, e tusa ma le mana o le tiapolo” (Iakopo 7:4). Sa tautatala faitaulaga amioleaga a le Tupu o Noa “i upu lē aoga ma taufaasese” (Mosaea 11:7), o lea na mafua ai ona faia e tagata le ifo i tupua ma isi amioleaga. Na maua foi e Korioa ni taunuuga faapena i ona vaitaimi, “taitai ese atu ai loto o le toatele” (Alema 30:18). Sa faaaoga uma e Amalekia ma Katianetona lo laua masani i upu faaviivii e faatutuina ai ni autau o tagata amioleaga na mulimuli ia i laua (tagai i le Alema 46:10; Helamana 2:4).
E le faafuasei lenei mea. O upu faaviivii e papau, le faamaoni, ō‘ō, ma faatele. Na lapatai mai Nifae e uiga ia i latou o e “o le a latou aoao atu i lenei ala mataupu faavae sese ma lē aoga ma valea, ma o le a faafefeteina i o latou loto, ma o le a latou saili loloto e nanā mai le Alii a latou taupulepulega; ma o a latou galuega o le a faia i le pouliuli” (2 Nifae 28:9).
E masani ona faaaoga upu faaviivii e olegia ai; e masani lava ona i ai se faamoemoega faalilolilo po o se fuafuaga o loo natia. O upu faaviivii e faatatau uma lava i le auala na fai atu ai se faaupuga, nai lo o le faaupuga moni na fai atu, ma e manaia tele i le tuinanauvale ma le faamaualuga o le tagata o le lalolagi i totonu [o se tagata]. Ae peitai, ua tau mai e perofeta a le Alii ia upumoni faigofie ae taua e manaomia ona tatou faalogo i ai.
O upu faaviivii o le gagana lea e tautala ai Satani. Na faamalamalama mai e Peresitene James E. Faust (1920–2007), Fesoasoani Lua i le Au Peresitene Sili, e faapea: “O le leo o [Satani] e masani ona logo lelei ma faigofie ona taliaina ana savali. O se leo moomia, faaoleole ma le malie. E le malo pe pavale. E leai se tasi e fia faalogo i le leo o Satani pe ana malomaloā pe saua.”3
Pe a faailoa mai e le lalolagi ia i tatou se manatu, filosofia, po o se taofi lea e foliga mai e faateleina ai o tatou lagona o le tuinanauvale po o le faamaualuga, po o se mea ua lelei tele ma ua faigata ona talitonu i ai, e tatau ona avea lena mea ma se lapataiga ia i tatou i le taimi lava lena. Ia taulima na manatu o ni mea taufaasese. Ia faatusatusa agai i upumoni na aoao mai e perofeta a le Alii. Vaavaai mo eseesega, ae le o mea e tutusa ai, ma o le a oo ina iloa lelei lava o ni manatu taufaasese.
O Neoa—o se Taufaasese Lauiloa
Sa tele ina faaaoga e Neoa metotia a Satani o upu faaviivii. Sei o tatou iloilo o ia e fai ma tulaga e aoao ai e uiga i se taufaasese faaleagaga. O Neoa, o ana aoaoga faavae na foliga mai na aofia ai le manatu e uiga i se togiola, sa o se faifeau lauiloa ma tausaafia i sa Nifae. Sa maua e Neoa ni tagata e toatele na mulimuli ia te ia e ala i le aoao atu e faapea, “ua faaolaina tagata uma i le aso mulimuli” ma “maua [e tagata uma] le ola e faavavau” (Alema 1:4).
E mafai ona tatou iloa le mafuaaga o le a matuai manaia ai le savali a Neoa? Sa ia aoao atu e uiga i se Atua e le popole lava ma tuufau [i tagata]—o se Atua o le, ona o Lona alofa i tagata uma, o le a faaolaina ai tagata uma, e le afaina lava pe a. O lea ia fai lava le mea tou te mananao i ai, aua e lelei uma lava. O se filosofia faatosina sa taliaina tele e tagata i aso o Neoa (tagai i le Alema 1:5) e pei foi ona talia e le toatele o tagata i aso nei. O se pepa malaga fua i le lagi, o se mea lea e manino lava le mananao i ai o tagata.
O le a la le faafitauli i le savali a Neoa? Sei o tatou toe tagai i vaega autu o ana mafuaaga:
-
Na foafoaina e le Atua tagata uma—moni.
-
E alofa le Atua i tagata uma—moni.
-
E tatau ona tatou fefefe i le Atua—moni.
-
E tatau ona tatou olioli i le manatu o le faaolataga—moni.
E oo mai i le taimi lenei, o loo tele mea e tutusa ai i le va o mea na aoao atu e Neoa ma upumoni o le talalelei. Ae ia manatua—e pei lava o tupe taufaasese, e tatau ona tatou vaavaai mo eseesega, ae le o mea e tutusa ai. Sei o tatou tagai la i le manatu mulimuli a Neoa:
-
O le a tuuina mai e le Atua i tagata uma le ola e faavavau—sese!
O le eseesega taua lea e tau mai ai o Neoa o se taufaasese faaleagaga. O le faaolataga mai le oti faaletino e faamaonia mo tagata uma, ae o le faaolataga mai le oti faaleagaga e faalagolago i lo tatou naunau e salamo. Afai tatou te salamo, ona mafai lea ona tatou maua le ola e faavavau (tagai i le Iakopo 6:11). Ae e leai se tietie fua.
Na Iloa e Kitiona ma Alema le Taufaasese
Sa aliali ae le mea leaga a Neoa i le aso na la feiloai ai ma Kitiona, o se faiaoga amiotonu i le Ekalesia a le Atua. Sa tetee malosi atu Kitiona i le Tupu o Noa i tausaga na muamua atu ma sa faapea ona masani ai i taufaasese faaleagaga (tagai i le Mosaea 19:4–8). “Sa amata [e Neoa] ona ia finau malosi ma ia, ina ia mafai ona ia taitai ese tagata o le ekalesia; peitai sa tutetee malosi atu lenei tagata ia te ia, ma aoai o ia i le afioga a le Atua” (Alema 1:7). Na iloa e Kitiona o Neoa o se taufaasese. O le taimi lava na faaalia ai le moni e uiga ia Neoa, sa ia faaaogaina loa le isi metotia a Satani—o le fasioti tagata. Ae sa lei le aoga le oti o Kitiona. Na aumai e tagata ia Neoa taufaasese i luma o Alema ina ia faamasinoina.
Sa iloa e Alema e le gata sa tausalaina Neoa i le faitaulaga pepelo ma le fasioti tagata, ae faapea foi, afai e le taofia le faafaitaulaga pepelo i tagata “o le a avea ma mea e mautinoa ai le faaumatiaina atoa o i latou” (Alema 1:12). O lea na faasalaina ai Neoa i le oti, ma mafatia ai “i se oti maasiasi lava” (Alema 1:15).
O Kitiona ma Alema o ni faataitaiga mo i tatou. A i ai le Agaga faatasi ma i tatou, o le a tatou vaai ma faalogo “i mea e pei ona i ai moni lava” (Iakopo 4:13). O le a tatou iloa fuafuaga ma faiga taufaasese a Satani “ma se malamalama atoatoa, e pei o le malamalama o le ao mai le pouliuli o le po” (Moronae 7:15).
E atamai lo tatou fili “taufaasese”, ae e pei o Kitiona ma Alema, e mafai ona sili atu lo tatou atamamai. E pei ona sa amata ona faasolosolo malie ona ou iloa le eseesega i le va o au tai tala pepa, e mafai foi ona faamasani malie o tatou mata faapea foi ma o tatou mafaufau ma agaga ia iloa le eseesega i le va o mea moni ma pepelo. A o tatou faia faapea, o le a tatou iloa le au taufaasese ma tetee atu i a latou pepelo.