Tautino Atu e Togi le Solo
E alala le tusitala i Niu Ioka, ISA.
Sa lei aluau i luma ou tomai ta piano, e ui lava i le tele o tausaga o faataitaiga. Na fai mai ou matua faatoa mafai ona togi lau solo i le tuutuuga e tasi: E tatau ona ou aoaoina ni viiga se 50.
Sa ou matele atu i totonu o lou fale, ma le maligi o ou loimata i le maea ai o se isi lesona le lelei i le piano. O lou tausaga lona fa lea i le piano, ae sa na o le “Emo, Emo, le Fetu Laitiiti” sa tau mafai ona ou taina. Na taumafai lou faiaoga ina ia maua se mea lelei e tau mai e uiga i lau tata leagafaia, ae sa na ona atili ai o ou lagona le fiafia. Na totogi e o’u matua tupe mo ni lesona ta piano ou te lei manao ai ma sa leai se faamoemoe e aoga.
Sa ou manao i ou matua e faataga au e togi le solo. “Faamolemole,” sa ou augani atu ai. “O le a ou faia soo se mea. E mafai faapefea ona ou tauanauina oulua?”
Ina ua uma ona la talanoa e uiga i ai, sa laua faapea mai, “Afai e te aoaoina ni viiga se 50, o le a ma tuu atu oe e togi le solo.”
O le taimi lava lena na amata ai au faataitaiga. Sa matuai ou manao lava e togi lau solo, o lea sa ou naunau ai e faaalu se taimi faaopoopo i le piano. O le viiga muamua, “Ia Viia Oe Le Atua” (Viiga, nu. 10), na toeitiiti atoa le masina na maua lelei ai le taina. Sa ou pulunaunau lava e togi le solo, o lea sa faaauau ai au faataitaiga.
Sa faapea ona tupu se mea malie, sa faapea ona faigofie atu le taina o viiga. Sa ou lagona le fiafia tele i le vaiaso atoa. Sa oo ina ou hamuina viiga i le aluga o le aso ma pese leotele i le sauniga faamanatuga.
Mulimuli ane, sa ou le toe faitauina pe ua fia viiga na ou iloa ta. Ao faasolo ina faateleina lou tomai i le piano, sa ou iloa ai e mafai ona ou aoaoina e toetoe lava i le lelei atoatoa se viiga i le itiiti ifo ma le 30 minute.
Ina ua iu ina ou faaopoopoina atoa ia viiga, sa ou aoaoina le silia ma le 50 o viiga. Ma sa leai se mea o le a ou togiia ai le solo i le taina o le piano. Sa oo ina sili atu ona ou toa ma talitonu i ou gafatia e ta ai [le piano] ma lagona le mana o viiga i lou olaga.
O viiga e pei lava o tusitusiga paia; latou te tau mai upumoni. Pe a ou taina viiga, ou te lagona le pei o loo ou faatofuina au lava i tusitusiga paia. O le aoaoina o le taina o viiga na avea ma tamua i le fausiaina o lau molimau ma le aoaoina o upumoni. Ou te suesue i upu o viiga eseese ina ia fesoasoani ia te au i le aluga o lou aso. O le taina o le piano ua faamalosia ai lau molimau ma ua tatalaina ai faitotoa mo au i soo se mea lava ou te alu i ai.