O Leo o Le Au Paia o Aso e Gata Ai
Alu e Fesoasoani i Ai
Thomas Robbins, Kalefonia, ISA
Sa ou tu i le laina i se pamu kesi. I luma atu o au, sa talosaga atu ai se tina ma ni tamaiti laiti se toalua mo se kesi e $3 ma ni ipu aisa kulimi vanila se lua.
O le vaai muamua lava na mafai ona ou iloa ai e le tele ni a latou mea o le olaga nei sa i ai. O tamaiti sa leai ni seevae ma ofuina ni lavalava tuai ma masaesae.
Sa ou faalogoina le tuuina atu e le fafine o ni siliva na pei e le mafaitaulia i luga o le fata e totogi ai lana pili.
Ina ua uma ona totogi lau kesi, sa ou savali i fafo ma tilotilo atu i le taavale a le tina. O se ituaiga taavale tuai lea atonu e le umi ona alu ae uma le kesi na utu.
Sa ou lagona sina faanoanoa alofa mo lenei tina e toalua le fanau, ae na ou faaolaina lau pasika ma amata loa au fuafuaga o le aso.
E lei atoa se minute talu ona ou tietie atu i le alatele e fesootai ai aai ma taulaga, ae oo mai loa se leo ia te au: “Alu e fesoasoani i ai.” E faalua ona sau le uunaiga.
Sa lulu lou ulu, ma faapea ai ua alu. Ae o le a lau tala o le a fai atu ia te ia?
Sa manino le oo mai faatolu o le leo: “Alu e fesoasoani i ai!”
Sa ou toe liliu ma alu atu i le pamu kesi, ma taumafai e mafaufau po o le a lau tala e fai atu ia te ia pe afai sa i ai lava iina.
Ina ua ou taunuu atu, sa ou vaaia le matalatala o faitotoa o lana taavale. Sa i ai o ia i le nofoa o le avetaavale, ae o lana fanau laiti e toalua sa aai fiafia a laua aisa kulima i le nofoa pito i tua.
Sa ou faia se tatalo puupuu, e ole atu ai i le Tama Faalelagi po o le a lau tala e tatau ona fai atu. Sa fai mai le leo lava lea e tasi ia te au, “Faailoa i ai oe ma fesili i ai pe na te manaomia se fesoasoani.” Sa ou oo atu i lana taavale ma faailoa atu lou igoa. Sa ou tau atu ia te ia sa musuia au e fesili atu pe na te manaomia se fesoasoani.
Sa amata ona tagi ma fai mai, “Na faatoa uma lava lau tatalo ia Iesu, e auina mai se tasi e fesoasoani ia te au.”
Sa tali mai le Tama Faalelagi i lana tatalo. Sa ou totogia e utu faatumu lana taavale i le kesi ma tuu atu ia te ia le numera telefoni a se tasi o le matou korama o le au toeaina sa sue ni ana tagata faigaluega i lena taimi. Ou te le iloa le mea na tupu mulimuli ane i lenei tina talavou, ae ou te faafetai ona sa ou mulimuli i le uunaiga e fesoasoani atu ia te ia.