Aua le Fanaina!

Taofia le igoa

Sa ma saofafai ma Papu i totonu o le ma taavale leoleo, e faatalitali mo se faailoga o se minoi i le auala. Na amata i le lua itula na muamua atu le ma suesuega faalilolilo ina ua ma vaaia le taavale sa taua mai i le leitio a leoleo e nofouta i ai.

“O loo faaaoga e le au faomea ni laaumalosi,” o le tala lea a le faailo. “E toalua alii, e faaauupegaina uma. E lei leva atu ona vaaia i laua i se taavale lanumoli. Fai mai molimau e sauā tele le aualii ma ua sauni e faapapa ia fana.”

Sa tutupu i le eria se faasologa o faomea faaauupegaina, ae e ui lava i a matou taumafaiga sili ona lelei, na faafia ona sosola le au faomea. Sa vave ona sola ese ma lou mafaufau ia nei manatu, ina ua ou vaai atu i ni tagata se toalua o omai i fafo o se fale i le auala pogisa ma tulioso i totonu o le taavale lanumoli. Sa faapea ona la agai mai i le mea sa ma i ai.

Sa ou faapea atu, “Talosaga mo se vaega faaleoleo.” “Ua o atu i laua o loo masalomia i le itu i matu mai lo ma tulaga.”

Sa oso ae i luma o le taavale ia leoleo nana e toalua sa ofu savili i se taavale e le faailogaina, ao ma mulimuli atu ma Papu. Ina ua oo atu a matou taavale e tolu i luga o se alalaupapa, sa faafuasei ona tu faalava le taavale a le ma au faaleoleo i luga o le alalaupapa i luma o le taavale lanumoli ae ma paka atu ai i tua, e poloka ai le au masalomia. O le taimi lava lena, sa tu ai le taavale ae tau fai faapupuna ia tagata e toalua.

“Feosofi mai i fafo o le taavale ma tuu lua lima i luga o lua ulu!” O lau faatonu atu lea ina ua ou alu i fafo ma lau taavale. Sa leai se tasi na tali mai.

O le uumauina ai o le laaumalosi ma sauni ai e fana, sa ou toe poloai atu ai “Feosofi mai i fafo o le taavale ma tuu lua lima i luga o lua ulu. Fai nei loa!”

Na faafuasei ona ea ae le avetaavale ma faasaga mai ia te au. Sa ou iloa atu se meafaitino siliva na iila mai i ona lima.

O au aoaoga faaleoleo ma le faautauta sa faatonu mai e tatau ona eu le amoti e laveai ai lou ola. Ae e ui i le vevesi o lea taimi, sa ou faalogoina ai se leo. Sa toafilemu ae sa faatonu mai ma le malosi: “Aua le Fanaina!”

Sa ou manatu o le a fanaina au i lea taimi, ae sa ou faatalitali mo se tasi i totonu o le taavale e faapa muamua lana fana. Nai lo lena, sa tuu i luga e le avetaavale ona lima, ma sii i luga ae o lona ulu le mea na foliga i se fana, ma faapalasi ona lima i luga o ona vae.

“Faamalō!” Sa ou fai atu ao ou nanati atu i le taavale. “Aua nei minoi!”

Sa pei lena taimi o se ata i le televise—seia oo ina ou iloaina o le au solitulafono saua sa i totonu o le taavale, o le mea moni o ni teine talavou matatau se toalua. O le mea lea na ou manatu o se fana, sa na o le talauga o le fusipau o le nofoa.

E lei leva ae matou iloaina, sa nono atu e teineiti le la taavale i a laua uo tama. La te lei iloa pe na faapei ia alii.

“Sa ou faapea ua e oti, Cal!” Na fai mai ai Papu mulimuli ane. “Sa toeitiiti lava a ou faapaina le fana. Ou te le iloa pe aisea na ou le faia ai.”

O le tala foi lena a leoleo nana e toalua ia sa i ai i le taavale e lei faailogaina, e ui sa nao au lava na lagonaina le leo. Ou te iloa e na o le mana o le lagi na mafai ona laveaiina na teineiti e toalua mai le oti, ma alii leoleo e toafa mai le faia o se measese matautia. O lenei aafiaga na ou maua ai se malamalamaaga mautinoa e faapea, e mafai ma o le a faasalavei mai lo tatou Tama Faalelagi mo lo tatou lelei.