Tagatavaai i luga o le Olo
Tagatavaai
O tagatavaai sa o ni leoleo sa faatulagaina i luga o se puipui po o totonu o se olo, ina ia mafai ona vaavaai solo mo, ma lapatai mai e uiga i ni mea matautia e agai mai mai se mea mamao. Sa faafaigaluegaina i latou e puipuia aai faapea foi ma tovine, fanua, po o laufanua e faatataa ai lafumanu.
Ituaiga o Olo
O olo i puipui o aai na masani ona fausia i faitotoa, po o i tulimanu (tagai i le 2 Nofoaiga A Tupu 26:9). O olo i le faitotoa ma le tulimanu sa tuuina atu ai ni tulaga maualuluga lea e iloa atu ai mea matautia e agai mai ma tau faasaga atu ai i osofaiga a le fili (tagai i le 2 Nofoaiga Tupu 26:15).
O olo e malupuipuia sa masani o ni fausaga e tutu lava na o latou e fausia i luga o ni tulaga maualuluga po o isi nofoaga na fuafuaina. O nisi taimi sa lava lo latou tetele e avea ma se sulufaiga mulimuli mo le faitau aofai o se aai atoa pe afai sa osofaia i latou (tagai i le Faamasino 9:46–52).
O olo i tovine, fanua, po o laufanua e faatataa ai lafumanu sa o ni fausaga laiti e fesoasoani e puipui ia laautoto ma lafu mai tagata gaoi ma meaola (tagai i le 2 Nofoaiga Tupu 26:10; Isaia 5:2; 27:3). E masani lava, o le fogafale pito i lalo sa o se potu na teu ai meafaigaluega.
Tagatavaai i luga o le olo:
E i ai se tulaga maualuga e vaai mai ai. I le avea ai ma auauna ua valaauina ma faamaoniaina e le Atua, o perofeta ua vavaeina mai le lalolagi, faalatalata atili atu ia te Ia, ma faatagaina e vaai i mea mai se vaaiga sili atu ona faalelagi.
Iloa mea e le mafai ona iloa e isi tagata uma. “Ae o se tagatavāai e mafai ona iloa e ia mea ua mavae, ma mea foi o le a oo mai, ma o le a ala mai ia te i latou ona faaali mai o mea uma lava, po o, lona uiga, o le a faaali mai ai mealilo, ma o le a faamalamalama mai ai mea ua natia, ma o mea ua lē iloa o le a faailoa mai e i latou, ma o le a faailoa mai foi e i latou mea semanu e lē mafai ona faailoa mai” (Mosaea 8:17).
E mataala. Ua i ai i perofeta se tiutetauave paia e lapataia i tatou i mea matautia o loo agai mai, ma o le a latou faaauau pea ona faia lea mea e tusa lava po o a manatu o tagata lautele po o mea e lilifa i ai tagata.
E lapatai mai i mea a o lei taitai oo mai. “O se perofeta e tausalaina agasala ma valoia ona taunuuga. O ia o se folafola o le amiotonu. I nisi taimi, e mafai ona musuia ai perofeta e valoia le lumanai mo le manuia o tagata” (Taiala i Tusitusiga Paia, “Perofeta,” lds.org/scriptures/gs).
Ofo atu le saogalemu ma le puipuiga. O le mulimuli i lapataiga a perofeta, e mafai ai ona tatou maua le saogalemu ma aloese ai mai mala e ono oo mai ia i tatou, taitoatasi pe aoao, pe afai tatou te le usitai.