Dali, Sunod Kanako: Pagtudlo sa mga Sukaranan diha sa Panimalay
Bahin 2
Ang mga tagsulat nagpuyo sa Utah, USA.
Pagsunod sa mga ehemplo niining mga miyembro, kamo usab makahatud sa mga baruganan gikan sa kurikulum sa mga kabatan-onan ngadto sa inyong panimalay.
Sumala sa gibalik-balik og tudlo sa mga propeta, “Ang atong kalampusan, sa tinagsa ug isip Simbahan, matino gayud kon unsa kita kamatinud-anon sa pagtutok sa pagsunod sa ebanghelyo diha sa panimalay.”1
Ang pagsunod sa ebanghelyo maoy labing maayong paagi aron makat-on ug makatudlo sa ebanghelyo. Samtang magsunod kita niining mga doktrinal nga mga baruganan, atong madala ang atong mga pamilya ug atong mga kaugalingon nga mas maduol ngadto sa Espiritu. Uban sa tabang sa Espiritu, atong makat-unan ug matudlo kining mga baruganan. Magiyahan kita sa labing epektibo nga pamaagi sa pagkat-on alang sa atong mga panginahanglan ug mga kahimtang ug, uban sa atong mga pamilya, mas mapaduol ngadto sa Manluluwas.
Hulyo: Ang mga Ordinansa ug mga Pakigsaad
Sa ibabaw: paghulagway sa litrato pinaagi ni David Stoker
Ang mga ordinansa sa Priesthood ug sagradong mga pakigsaad—mga saad nga atong gihimo uban sa atong Langitnong Amahan—makahatag og gamhanang mga panalangin sa atong mga kinabuhi. Usa sa paagi nga aron maaninaw ang katuyoan sa mga ordinansa mao ang paghunahuna niini isip dakong panghitabo diha sa dalan paingon sa presensya sa Langitnong Amahan—kinabuhing dayon. Magpabilin kita niana nga dalan pinaagi sa paghupot sa mga pakigsaad nga atong nahimo.
Sama pananglit, usa ka batan-ong babaye mihulagway kon giunsa niya pagpabilin diha sa dalan sa mga pakigsaad: “Makausa aduna koy kauban nga naghangyo nako alang sa tabang. Wala lang ni nako hunahunaa og maayo, gihatagan ko lang siya sa tabang nga iyang gikinahanglan. Apan pagkahuman, ang Espiritu nagpahinumdum nako nga pinaagi sa pagtabang og dala sa iyang mga palas-anon, misunod ako sa mga pakigsaad nga akong gihimo sa dihang nabunyagan ko (tan-awa sa Mosiah 18:8–10). Mapasalamaton ko alang sa mga oportunidad nga gihatag sa Langitnong Amahan ngari nako kada adlaw sa pagpili nga maglakaw sa dalan sa pakigsaad.”
Isip usa ka pamilya, tingali imong maila ang mga ordinansa nga gikinahanglan gihapon nga madawat sa matag sakop ug dayon timbang-timbangon kon unsa ka kamaayo sa paghupot sa pakigsaad nga imong gihimo. Sama pananglit, sa unsang paagi nga ang inyong mga pagpangandam sa pagdawat sa senimanang ordinansa sa sakrament nagpakita sa inyong mga pasalig sa inyong mga pakigsaad? Ang Espiritu Santo makatudlo kaninyo kon unsaon sa paghimo og mga kalamboan.
Agosto: Kaminyoon ug Pamilya
Ang Kaminyoon ug pamilya mao ang sentro sa atong kalipay ug sa plano sa Langitnong Amahan alang sa atong kaluwasan. Ang pamilya mao ang sukaranang yunit karon ug sa kahangturan.
Pagtudlo sa inyong mga anak mahitungod sa kaminyoon ug pamilya mahimong sama ka sayon sa pagpakigbahin sa usa ka personal nga kasinatian. Usa ka young adult mipakigbahin kon sa unsang paagi nga nakabaton siya og pagpasalamat sa iyang pagpa-seal sa templo:
“Nakahinumdom ko nga naglingkod nga nag-inusara sulod sa bakante nga celestial nga lawak sa templo. Mahinangupon ko kaayo, wala masayud kon ma-sealed ba ko sa templo nianang adlawa tungod sa wala nagkasinabtanay mahitungod sa mga recommend nga gikinahanglan sa akong minyoan.
“Misugod ko sa pag-ampo nga matinguhaon nga itugot sa Ginoo nga kami ma-sealed sa Iyang templo nianang adlawa. Sa akong paghimo, may misantop sa akong hunahuna: Bisan og nag-inusara ka sa celestial nga lawak, ang celestial nga gingharian mao ang celestial tungod kay ikaw dili mag-inusara. Ikauban nimo ang imong mahangturon nga pamilya uban sa imong langitnong pamilya. Mao kanang rason nga ikaw gi-seal.
“Sa wala madugay kwarenta minutos ug pipila ka tawag sa telepono, ang akong bana ug ako na-sealed. Napuno ko sa pagpasalamat ug kahupay. Ang ordinansa nahimong mas makahuluganon ngari nako tungod kay makatukod na kami og usa ka celestial nga kinabuhi uban sa Dios diin dili na gayud kami mag-inusara.”
Unsa nga mga kasinatian ang gitudlo kanimo mahitungod sa tahas sa kaminyoon ug pamilya diha sa plano sa Langitnong Amahan? Ang Espiritu Santo makatabang nimo nga mahinumdom ug mopakigbahin og angay nga mga kasinatian. Bisan unsa man ang imong sitwasyon sa pamilya, ang Espiritu Santo makatudlo nimo kon unsaon sa paggamit ang mga baruganan sa kaminyoon ug pamilya sa imong kinabuhi.
Septyembre: Kasugoan
Ang mga kasugoan mao ang mga balaod ug mga gikinahanglan nga gihatag sa mahigugmaong Langitnong Amahan aron mapanalanginan ang atong mga kinabuhi.
Usa ka gamhanang paagi aron matun-an kini mao ang pinaagi sa pagsiksik sa mga kasulatan aron makat-on mahitungod sa mga panalangin nga moabut gikan sa pagkamasulundon, sama sa gihimo niining young adult:
“Kon akong tun-an ang mahitungod sa kasugoan, ganahan kong mobasa sa tanan nga mga kasulatan nga akong makaplagan mahitungod niini ug ilista ang mga panalangin nga gisaad sa Langitnong Amahan alang sa akong pagkamasulundon. Ang pagkat-on og mas daghan mahitungod sa mga gisaad nga mga panalangin nakapalig-on sa akong pagpamatuod nga ang Langitnong Amahan nahigugma kanako ug gusto nga mopanalangin nako.”
Aron makat-on o makatudlo mahitungod sa mga kasugoan, mahimo ninyong basahon uban sa inyong mga anak ang leksyon 4 sa kapitulo 3 sa Isangyaw ang Akong Ebanghelyo, tun-i ang kauban nga mga kasulatan, ug paghimo og imong kaugalingong lista sa mga gisaad nga mga panalangin. Mahimo nimong gamiton kini nga pamaagi aron makat-on mahitungod sa mga panalangin nga may kalabutan sa bisan unsa nga mga baruganan sa ebanghelyo.
Oktubre: Mahimong Mas Sama kang Kristo
Detalye gikan sa Woman Healed, pinaagi ni J. Kirk Richards
Sa panahon sa pagpangalagad ni Kristo, mimando siya Kanato, “Busa kamo kinahanglan nga magmahingpit, ingon nga hingpit ang inyong Amahan nga langitnon” (Mateo 5:48). Maningkamot kita paingon sa pagkahingpit sa higayon nga yano natong gianam-anam ang pagpalambo sa daghang mga kinaiya ni Kristo ug maningkamot sa pag-uswag nianang dapita uban sa Iyang tabang. Usa ka batan-ong lalaki misugod sa pagpalambo og kakugi.
“Gusto ko nga mopalambo og mas daghang hiyas sama kang Kristo, busa nagtuon ko sa mga kasulatan ug sa Isangyaw ang Akong Ebanghelyo. Sa kapitulo 6 sa Isangyaw ang Akong Ebanghelyo, akong nakit-an ang gisugyot nga sumbanan alang sa pagpalambo sa mga hiyas nga sama kang Kristo ug mihukom sa pagsunod niini uban sa kalidad nga pagkugi. Una akong gisulat ang akong kaugalingon nga paghulagway sa kakugi ug ang mga pangutana nako mahitungod niini. Dayon akong ganiron ang gisugyot sa mga kasulatan bahin sa kakugi ug irekord ang akong mga impresyon ug mga tubag nga akong makit-an samtang akong gibasa. Pagkahuman mag-set ko og usa ka tumong nga mahimong mas magkugi sa akong mga buluhaton sa eskwelahan ug nabantayan nako akong kaugalingon nga mas ganahan ug makanunayon samtang ako nag-ampo sa matag gabii alang sa kakugi.”
Samtang maningkamot ka sa pagpalambo ug pagtudlo sa imong mga anak kon unsaon pagpalambo sa mga hiyas nga sama kang Kristo, ang mga kapanguhaan sa Simbahan makatabang nimo nga masayud asa magsugod. Ang mga kasulatan kanunayng nagsangkap sa ehemplo ni Kristo, ug mga kapanguhaan sama sa Isangyaw ang Akong Ebanghelyo nagtanyag og mga sumbanan nga makatabang kanato nga makasugod og mga gawi sa pagtuon ug pag-set og mga tumong. Kon magamit og dungan, ang mga kasulatan ug uban nga mga kapanguhaan makatabang kanato sa paggamit unsay atong makat-unan aron kita mahimong mas sama kang Kristo.
Nobyembre: Espirituhanon ug Temporal nga Kaugalingong Paningkamot
Ang pagpalambo sa kaugalingong paningkamot nagpasabut sa paggamit sa atong kabubut-on sa pag-amuma sa atong kaugalingon ug sa atong mga pamilya ug pagbuhat sa labing maayo aron makit-an ang kasulbaran sa atong kaugalingong mga problema. Ang pagkahimong mas self-reliant naghatag kanato og dugang nga kapasidad sa pagserbisyo diha sa atong mga panimalay, ug sa atong mga kumunidad. Usa sa labing maayong mga paagi sa pagtudlo niining mga konsepto mao ang pinaagi sa ehemplo, sama sa gihulagway niini nga miyembro:
“Sa akong mahinumduman, mobangon og sayo ang akong mama matag adlaw aron sa pagtuon sa mga kasulatan. Nakita nako kon sa unsang paagi nga napalambo niya ang usa ka espirituhanon nga kusog nga milig-on niya sa mga lisud nga panahon. Nag-agad siya sa iyang kaugalingong relasyon uban sa Langitnong Amahan nga mahimo niyang kaabag. Lakip sa iyang espirituhanon nga kusog, nakadayeg ko sa iyang abilidad sa pag-amuma alang sa among pamilya. Ako siyang nakita nga nag-budget, gisakripisyo ang kaugalingon niyang mga gusto, nagtinguha og edukasyon, ug mipakita og dakong kamapainubsanon sa paagi nga nagtugot niya nga makab-on ang mga panginahanglan nga pinansyal sa pamilya ug makauli gihapon sa panimalay uban sa iyang mga anak human og eskwela. Nagustohan nako ang matang sa kalig-on nga diha kaniya, ug mapasalamaton kaayo ko sa iyang ehemplo nga nagtudlo nako unsaon nga makuha kini.”
Sa unsang paagi nga ikaw mahimong usa ka mas maayong ehemplo sa pagdaginot ngadto sa imong mga anak? Kon wala pa kay daghang nahibaloang piho nga mga aspeto sa kaugalingong paningkamot, mahimo nimong dapiton ang imong mga anak sa pagkat-on uban nimo, ug kana maoy mahimong usa ka dakong ehemplo mismo.
Disyembre: Pagtukod sa Gingharian sa Dios sa Ulahing mga Adlaw
“Kinsay nahibalo kong ikaw wala pa mahiabut sa gingharian sa maingon niini nga panahona?” (Ester 4:14). Mao kini ang matang sa pangutana nga imong ikapangutana sa imong kaugalingon ug sa imong mga anak samtang ikaw nagdiskobre unsay imong katungdanan sa pagtukod sa gingharian sa Dios.
Kini nga miyembro nakat-on sa pagsalig sa Ginoo aron sa pagtabang niya sa pagtukod sa gingharian: “Nahinumduman nako ang akong mga ginikanan nga nagtudlo nako sukad sa pagkabata nga kami kanunayng modawat sa among mga calling tungod kay hinatag kini sa Ginoo. Samtang diha pa sa kolehiyo nahatagan ko og call isip presidente sa Relief Society. Nabug-atan ko, apan wala mosantop sa akong hunahuna ang pagbalibad. Busa gisugdan nako ang tuig uban sa 100 ka mga babaye nga atimanon, gamayng kasinatian, ug hugot nga pagtuo sa Ginoo makahimo og kalainan. Human sa usa ka tuig na-release ko. Samtang naghunahuna ko og balik sa mga higayon sa pagpadayag sa dihang nasayran nako sa eksakto kon unsa nga leksyon nga ihatag o komentaryo nga ipakigbahin, o ang daghang panahon kon adunay tawo nga maghimo og pagkaon tungod kay busy kaayo ko para magluto, o ang daghang sulat sa pag-awhag nga akong nadawat, nasayud ko sa kasigurohan nga ang Ginoo mipadako sa akong mga paningkamot sa pagtukod sa gingharian.”
Samtang ikaw ug ang imong mga anak naghunahuna og mga paagi sa pagtukod sa gingharian sa Dios, hinumdumi ang pagdalit kanila og mga makapadasig nga mga oportunidad sa pagserbisyo. Mahimo nimong ikonsiderar ang paghisgut sa mga paagi sa pagpangalagad ngadto sa uban sa mga calling nga imong gihuptan. Unsa pay ubang mga paagi nga makatabang ka nga mapadayon ang buhat? Bisan asa ka magserbisyo, ang imong mga paningkamot bililhon. Sumala sa gisulti ni Presidente Dieter F. Uchtdorf, Ikaduhang Magtatambag sa Unang Kapangulohan, “Sila magdug-ol og barug ug mangusog diha sa ilang gibarugan.”2