Ang Tanan Makat-on gikan sa usa ka Propeta

Henry Serion Sr., Hawaii, USA

Paghulagway pinaagi ni Allen Garns

Sa dihang 17 pa ko, nagtrabaho ko sa usa ka hotel sa Kailua-Kona, Hawaii, USA. Nagtrabaho isip bellhop, nakita nako ang daghang inila nga mga tawo isip mga guest sa hotel, lakip ni John Wayne, Dorothy L’Amour, ug Esther Williams.

Usa ka gabii, sa nangabut na ang kadaghanan nga mga guest, mipahulay ko sa atubangan sa hotel sa dihang ang itom nga limousine mihunong sa may kurbada ug pito ka tawo ang migawas, nagsul-ob og itom nga mga karsones, puti nga mga polo ug kurbata. Laing tawo nga nagsul-ob og itom nga amerikana miuban kanila. Human maparking sa drayber ang ilang sakyanan, silang tanan miadto sa kan-anan aron manihapon. Sa akong hunahuna mora sila og mga FBI agent sa akong pagsulod og balik aron mopadayon sa akong mga trabaho nga motubag sa mga tawag gikan sa mga kwarto sa hotel.

Paglabay sa hapit usa ka oras, didto ko sa gawas sa hotel nanigarilyo samtang ang grupo nga akong nakita sa sayo pa nagpadulong sa ilang limo, nga naghulat sa may kurbada. Mipaingon sila ngadto sa sakyanan ug miabli sa luyo nga pultahan aron makasakay ang tawo nga nagsul-ob og itom nga amerikana. Apan imbis mosakay sa sakyanan, ang tawo nga nagsul-ob og itom nga amerikana mihunong, milingi ngari nako nga nagsandig sa bilding, ug mipaingon ngari nako.

Taas ug niwangon siya, nga nag-antyohos ug dunay gamay nga puting bungot. Iyang gitunol ang iyang kamot nako aron makiglamo ug giagbay ang pikas kamot. Nasurprisa ko nga ang maong inila nga tawo miduol ug nakigsulti nako, usa ka batan-ong lalaki nga wala gani niya mailhi.

Dili na nako mahinumduman ang tanang mga pulong nga iyang gisulti nako kay sa iyang gisulti nga “kanang mga butanga dili makaayo kanimo,” nagpasabut sa akong sigarilyo. Ang iyang kabuotan ug batasan nakahatag nako og impresyon.

Paglabay kapin sa usa ka tuig gitudloan ko sa mga misyonaryo ug nabunyagan.

Samtang nagtan-aw sa mga litrato sa mga lider sa Simbahan, nakit-an nako ang litrato ni Presidente George Albert Smith (1870–1951) ug nakaila dayon niya nga mao ang buotan ug inila nga tawo nga akong nahimamat didto sa hotel. Mas nadani pa ko nga ang Presidente sa Simbahan mobuhat sa ingon nga butang ngadto sa usa ka tawo sama nako, usa ka batan-on nga dili gani miyembro sa Simbahan ug dili kaayo importante.

Pagkabantugan niya nga tawo nga nagpakita sa mao nga gugma ug pagpakabana sa usa ka batan-ong lalaki nga nagtrabaho sa wala mailhi nga posisyon ug wala makahibalo sa ebanghelyo o sa gugma sa atong Langitnong Amahan alang kanato.

Saysenta y singko ka tuig ang milabay, nakasabut na ko pag-ayo niana nga pagpakabana ug gugma, ug naningkamot ko nga makakita niadtong naglibot nako sama sa pagkakita nako ni Presidente Smith.