Ang Pinakalisud nga Bahin sa Pagkahimong usa ka Misyonaryo

Ni Wendy Ulrich, PhD.

Ang tagsulat nagpuyo sa Utah, USA.

Usahay ang labing dako nga hagit sa misyonaryo nga buhat dili mao ang misyonaryo nga buhat.

Usa ka misyonaryo kausa misulti nako, “Kon ang mga tawo moingon nga ang pagmisyon lisud, nagtuo ko nga kana nagpasabut nga ako mahimong tugnawon o mag-atubang og lisud nga kahimtang sa pagpuyo o manlimbasug sa pinulongan. Apan alang kanako ang pinakalisud nga bahin mao ang unsay naa sa sulod sa akong ulo—sama sa pagbati nga nawad-an sa kadasig o nasagmuyo sa mga kauban o dili ganahan nga makig-istorya sa mga estranghero—ang pag-atubang lang sa tanan nga mga kalampusan ug kapakyasan, sa pagsalikway, sa pag-usab.”

Aron mangandam alang sa misyon, makahimo kamo ug kinahanglang mobasa sa Isangyaw ang Akong Ebanghelyo, magtuon sa mga kasulatan, ug magkat-on unsaon sa pagluto ug paglaba. Apan kinahanglan usab ninyo nga makakuha og praktikal nga kasinatian karon sa emosyonal, sosyal, ug uban pang mga kahanas nga inyong gikinahanglan isip misyonaryo. Ania ang usa ka lista sa pipila niini nga mga kahanas. Mahimo nimong tsekan ang usa o duha niini aron sugdan na sa pagpraktis karon.

Ang mga Kahanas nga Mahimong Mapainubsanon nga dili Mobati nga Napakaulawan

Usa ka sister nga misyonaryo sa Alabama, USA, miingon nako, “tingali naghunahuna ko nga inig-set apart nila nako, makakuha ko og mga superpower. Mao nga mora ko og nakurat sa dihang akong nasayran sa pag-abot nako sa akong misyon nga ako mao lang gihapon. Duna gihapon ko sa samang mga kahuyang, mga kahadlok, ug mga pagkadili sarang. Ug wala gayud kadto nangawala. Kinahanglang makat-on ko unsaon sa pag-atubang sa pagkadili sarang sa paghimo sa buhat sa Ginoo.”

Kon kamo miabut sa misyon nga nakasinati na og daghang kalampusan o diyutay pa, kon kamo mapainubsanon, matudloan, ug andam nga mopadayon sa pagpaningkamot ug pagtrabaho, ang Ginoo makatrabaho uban ninyo. Apan ang inyong misyonaryo nga mga kahanas molambo lamang samtang kamo magbansay, mangutana, mangayo og tabang, ug magpadayon sa pagpaningkamot. Kon kamo nakumbinsir nga ang mga tawo natural lang gyud nga maayo (o natural lang gyud nga ngil-ad) sa misyonaryo nga buhat, mga pinulongan, pagpamatuod, o mga relasyon, kamo maglisud gayud.

Usa ka misyonaryo sa makausa miingon kanako, “Kinahanglang makat-unan nako nga kini buhat sa Ginoo, dili ako. Ug OK ra kon mobati ko nga dili sarang niini tungod kay ako dili sarang. Dili gayud ako mahimong sarang sa pagbuhat sa unsay ang Dios lamang ang makabuhat. Daghan ang akong mabuhat aron molambo, apan dili kinahanglan nga ako ra ang maghunahuna niining tanan. Ako makasalig Kaniya.”

Sulayi ang paghimo og bag-o ug lisud nga mga butang. Niana kamo makakat-on nga dili kaayo seryusuhon ang mga pagbati sa pagkadili sarang. Sama pananglit:

Sulayi ang mga butang nga dili kaayo mo komportable nga buhaton, sama sa bag-ong trabaho, extracurricular nga mga kalihokan, o dili pamilyar nga mga klase. Pangutana, pangayo og tabang, analisara ang mga sayop, ug padayon sa pagpaningkamot. Buhata ang mga butang nga kinahanglan mo nga magpraktis ug magtrabaho aron kamo makakat-on sa pagsalig nga kamo mouswag uban sa paningkamot.
Tubaga ang mga tingog sa inyong hunahuna nga nagsulti kaninyo nga ang mga tawo gipakatawo nga duna na daay talento, salabutan, o sosyal nga mga kahanas o gipakatawo nga wala niini. Ang labing mahinungdanong mga atleta, musikero, eskolar—ug mga misyonaryo—sa kalibutan nakasinati og daghang kapakyasan ug nagpraktis sa daghang mga oras padulong sa kalampusan.

Ang mga Kahanas sa Pag-atubang sa Posible (ug Tinud-anay) nga Pagsalikway

Ang isalikway ug ang kasagmuyo maoy inadlaw nga mga kasinatian sa misyon. Pagpraktis sa pagpangarisgo ug pag-atubang og pagsalikway aron mas maayo na ka nga modawat niini.

Pag-apply og trabaho, pagpa-interbyu sa trabaho, ug pagtrabaho og part-time o full-time.
Pag-try out alang sa usa ka team o sa usa ka dula.
Paghangyo og mga tawo aron mahimong kuyog sa mga date o sa mga kalihokan.
Kon dili maayo ang mga panghitabo, timan-i ang mga hunahuna ug buhat nga makatabang kaninyo nga makasugakod ug mobati nga mas maayo.
Pagkat-on gikan sa kapakyasan ug sulayi pag-usab.

Ang mga Kahanas sa Pagdumala og Kadasig

Kitang tanan kinahanglang masayud unsaon sa pagdasig sa atong kaugalingon kon kita gilaay ug pagpakalma sa atong mga kaugalingon kon masobrahan kita sa stress.

Kon ang sitwasyon makalaay o wala mag-uswag, susiha unsay sayop ug unsaon sa pag-ayo niini, himoa kini nga dula, o hunahuna unsay inyong makat-unan.
Bantayi kon masobrahan ka sa stress ug kat-uni ang mga butang nga mahimo gihapon ninyong mabuhat sa misyon aron makalma (pakig-istorya og tawo, pagparelaks, pagsulat, pagkanta, paglakaw). Hunahunaa ang sitwasyon, analisara ang problema, ilakip ang uban, paghimo og ginagmay nga mga lakang, pag-ampo, ug isalikway ang pagsulti og negatibo sa kaugalingon diha sa hunahuna.

Ang mga Kahanas sa Pagdumala sa mga Panaglahi

Ang mga kauban, mga lider, mga miyembro, ug mga investigator mahimong talagsaon apan mosulay usab sa inyong pasensya sa ubang panahon.

Pagpraktis uban sa mga igsoon ug mga higala sa:

Pagkat-on sa pagpasalamat sa uban pinaagi sa pagpangutana nganong nagbuhat sila sa unsay ilang gibuhat.
Dawat og responsibilidad ug sinserong mangayo og pasaylo kon ang inyong kinaiya nakapasakit sa laing tawo, bisan kon wala nimo kini tuyoa.
Pangita og mapuanguron nga pagpasabut sa kinaiya sa laing tawo. Ayaw pagbaton og kayugot.
Paghisgut og problema ug pangayo og tabang sa pagsulbad niini kay sa mobasol og tawo o maglagut.
Kon ang kagubot moabut, gamit og hinay nga tingog ug magpakita og pagtahud alang sa mga pagbati sa uban.
Pakig-uban sa kwarto uban sa tawo nga lahi kay kanimo. Pagmapositibo ug kuryuso kabahin sa ilang mga hilig.

Ang mga Kahanas sa Pakig-istorya

Kon introvert (maulawon) o extrovert (mahigalaon) man kamo, makakat-on kamo sa mga kahanas sa maayong pag-istoryahanay nga gikinahanglan ninyo sa misyon ug sa tibuok ninyong kinabuhi.

Kon kamo may pagka-maulawon:

Paghimo og tumong nga makig-istorya og bag-ong tawo (ilabi na sa dili kaila nga mga hamtong) sulod sa lima ka minuto kada semana.
Pahiyum, manguryuso sa mga tawo, ug pagkat-on sa maayong mga pangutana nga makasugod og pakig-istorya sa uban.
Paghunahuna og mga paagi sa pagsugod og panagsultihanay ug sa maayong pagtapos og panagsultihanay.
Bantayi kon naningkamot ang uban sa pagsugod og panagsultihanay aron kamo mahimong bukas ug makatubag.

Kon kamo may pagka-mahigalaon:

Sugdi ang pakig-istorya sa uban pinaagi sa pagpangutana.
Pagpraktis nga mahimong maayo nga tigpaminaw.
Pangita og mga timailhan nga ang inyong mga tigpaminaw gikapoy. Hatagi ang uban og luna.

Ang Pisikal nga mga Kahanas sa Pagkaayo

Isip presidente sa misyon, ang akong bana nakig-istorya sa usa ka misyonaryo kinsa naguol ug naglisud. Ang akong bana mibati nga gidasig sa pagpangutana kaniya, “Busa, Elder, unsay imong gikaon sa pamahaw?”

“Ice cream.”

“Unsay imong gikaon sa paniudto?”

“French fries.”

“Unsay imong gikaon sa panihapon?”

“French fries ug ice cream.”

“Unsa na kadugay nga nagsige ka og kaon sa French fries ug ice cream?”

“Mga usa na ka bulan.”

“Mao ni ang imong buluhaton: pauli sa balay ug kaon og green nga pagkaon—apan dili mint ice cream.”

Ang dyeta ug pag-ehersisyo makaapekto gayud sa unsay atong bation mahitungod sa kinabuhi. Sugdi karon nga:

Magkat-on sa maayong nutrisyon. Mokaon alang sa kahimsog. Kon pilian mo, sugdi sa pagsulay og bag-ong mga pagkaon.
Pag-ehersisyo Ang regular nga pag-ehersisyo makatabang sa tanan nga mas maayong makadumala sa mga kabalaka ug depresyon. Sugdi sa ginagmay ug pausbawa sa hinay-hinay, sama sa paglakaw matag gabii (tingali kauban ang usa ka higala o dunay musika), magmartsa sa nahimutangan atol sa pahinumdom sa TV, o sa pipila ka mga sit-up ug push-up.
Pagkat-on sa pag-atiman og maayo sa inyong kabtangan, sinina, kwarta, ug panahon.
Idumala ang pagkatulog. Kon maglisud kamo sa pagkatulog o pagmata, pangayo og ideya sa mga tawo. Pagpahigayon og regular nga oras sa pagkatulog ug pagmata nga mahimo ninyong magamit isip usa ka misyonaryo.

Ang mga Kahanas sa Kamapositibo

Pagpalambo og maayong buot. Kataw-i ang inyong kaugalingon, dili ang uban. Ayaw kaayo iseryuso ang tanang butang nga ma-stress na hinoon mo.
Pangutana sa kanhi mga misyonaryo nga sultihan kamo og usa ka butang nga lisud alang kanila ug giunsa nila kini pagsugakod. Pangita og mga ideya nga inyong magamit.
Paglista og mga kasulatan ug mga himno nga makapadasig kaninyo ug mopuno kaninyo sa hugot nga pagtuo.
Isalikway ang negatibong tingog sa inyong hunahuna og pulihi sa butang nga positibo. Kon kana nga mga tingog mabiay-biayon, makapaubos, makapaulaw, makasuko, mapintas, o makahimo kaninyo nga mobati nga walay paglaum o walay mahimo, dili kana gikan sa Ginoo. Ang iyang tingog kanunay malaumon, maawhagon, ug manggiloy-on, ilabi na kon kamo naninguha.

Ang Espirituhanong mga Kahanas sa Pagkaayo

Tinud-anay gayud nga mag-ampo. Dapita ang Langitnong Amahan nga magpaduol kaninyo, ug pakig-istorya Kaniya sa dayag kabahin sa inyong mga problema, mga tinguha, ug pasalamat. Sulayi ang pag-ampo nga kusog, mag-ampo nga adunay papel ug lapis aron irekord ang mga impresyon, o mag-ampo aron lamang sa pagpasalamat.
Tun-i ang mga kasulatan. Pangita ug pagpaabut og mga tubag sa inyong mga problema.
Pagmahimong usa ka misyonaryo karon. Lakaw ug pagserbisyo kuyog sa full-time nga mga misyonaryo, tuguti nga ang hilisgutan sa ebanghelyo motomaw sa adlaw adlaw nga pakig kulokabildo nimo sa imong mga higala, ug paghatag og matinuoron nga pagpamatuod sa simbahan. Mas maghinam-hinam mo sa misyonaryo nga buhat samtang inyo kining buhaton.

Duha ka Matang sa Tawo Kinsa Kanunay nga Nanlimbasug

Ang mga tawo kinsa nanlimbasug sa misyon sa emosyonal nga paagi kasagaran naglakip sa:

Kadtong wala maninguha og maayo sa ilang pag-eskwela. Ang mga katawhan nga alisto o dunay talento nga makapadayon nga wala kaayo maninguha mahimong motan-aw sa ilang mga abilidad ingon og usa ka matang sa magic. Kon mapalpak ang magic (ug kini kanunay nga mahitabo pag-abut sa panahon), dili sila kahibalo unsay buhaton gawas sa pagsulay sa pagtago sa ilang mga sayop. Sa katapusan ang tanan kinahanglang makat-on nga magpaubos, magkugi, magpraktis, mangayo og tabang, ug mobuntog sa mga babag ug kapakyasan aron padayon nga mouswag ug maglambo.
Kadtong kinsa wala kaayo makasinati og kalampusan. Pipila ka mga tawo motan-aw sa mga kalisdanan isip kumpirmasyon nga sila bugo o walay talento. Apan ang utok ni bisan kinsa mahimong mas maalamon ug mas makahimo kon sila motutok, moanalisar kon unsay sayop mosulay og mamugnaong mga solusyon, mangayo og tabang, magkugi, ug magpraktis.

Kon anaa kamo sa bisan hain niini nga grupo, pahinumdumi ang inyong kaugalingon kanunay nga walay natawong daan nga usa ka talagsaong misyonaryo. Ang misyonaryo nga mga kahanas molambo uban sa pagbansay, pagkugi og maayo, pagpangarisgo, pagbuntog sa mga babag, pagpaningkamot pag-usab human sa mga sayop, pagkat-on gikan sa uban, ug hingpit nga pagsalig sa Ginoo. Siya nahigugma kaninyo ug motabang kaninyo sa pagtuman sa inyong personal ingon man usab sa full-time nga misyon.