Ang Atong mga Panimalay, Ang Atong mga Pamilya
Ang Mahigugmaong Ehemplo sa Akong Amahan
Ang akong amahan mipakita kanako unsaon sa paghigugma sa akong mga anak nga nahisalaag.
Sa wala: paghulagway sa litrato © iStock/Thinkstock; sa tuo: gilitratohan ni Del Benson
Nagpamiyembro ko sa Simbahan human modawat og imbitasyon gikan sa duha ka mga higala sa pagtambong sa seminary. Ang akong mga ginikanan kanunay nga nagsuporta sa akong mga desisyon nga magpabunyag, moserbisyo og misyon, ug maminyo sa templo. Nakahinumdom ko, hinoon, sa kasakit nga akong gibati (ug ako nagtuo nga nasinati usab sa akong mga ginikanan) nga masayud nga sila mabinationg naghulat diha sa waiting room sa Provo Utah Temple samtang ang akong asawa ug ako gi-sealed.
Nakabaton mi sa kaulahian og upat ka mga anak ug akong nahinumduman ang kalipay sa pagkasayud nga silang tanan nabugkos ngari kanamo tungod kay sila natawo diha sa pakigsaad. Ang among mga anak maoy unang mga apo, ug bisan tuod ang akong mga ginikanan ug mga igsoon wala gyud magpamiyembro sa Simbahan, sila nahimong suod kaayo sa akong mga anak. Sulod sa daghang katuigan nagpuyo mi duol sa usag usa, ug ang akong mga ginikanan nakakita sa among mga anak nga miapil sa mga kalihokan sa eskwelahan ug mga dula sa kabatan-onan. Sila mitambong sa mga bunyag sa matag usa sa among mga anak.
Sa dihang nahimo nang tin-edyer ang among mga anak, hinoon, ang akong mga buluhaton sa trabaho nagkinahanglan nga ang among pamilya mobalhin ngadto sa laing estado. Apan bisan niini nga mga katuigan, ang akong mga ginikanan nagpadayon nga masuod sa among mga anak pinaagi sa pagbisita ug sa kanunay nga mga sulat.
Sa dihang ang akong mga ginikanan medyo edad-edaran na, ang akong inahan sayo nga nasakit og Alzheimer’s. Determinado ang akong amahan nga matinud-anong moserbisyo isip iyang tig-atiman, bisan kon ang iyang kondisyon nagkinahanglan og full-time nga pag-amuma. Bisan niining ulahing mga katuigan, ang akong amahan mokontak kanako pinaagi sa sinemana, ug, sa pipila ka mga panahon, kada adlaw, nga tawag sa telepono ug mga sulat. Suod ang akong relasyon sa akong mga ginikanan, apan atol sa katapusang 10 ka tuig sa kinabuhi sa akong amahan, mas nasuod mi kaayo. Nakaamgo ko dayon niana nga nakahimo usab siya nga masuod sa akong tulo ka mga igsoon sa samang paagi—bisan pa sa managlahi nga mga interes ug relihiyon nga among gipili sa amo nang pagdako.
Sa wala: paghulagway sa litrato © iStock/Thinkstock; sa tuo: gilitratohan ni Del Benson
Ang akong mga ginikanan ug ang akong pamilya nagpuyo sa magkaatbang nga bahin sa Estados Unidos atol niadtong katapusang mga tuig, ug kaduha sila mitabuk sa nasud aron sa pagbisita, bisan kon ang Alzheimer’s sa akong inahan migrabe na sa punto nga ang pag-abag kaniya atol sa layo nga biyahe sa eroplano lisud kaayo alang kang Papa.
Niini nga samang panahon, ang akong mga anak tagsa-tagsa nga mihukom nga mohunong na sa pagsimba. Ang duha sa katapusan mipatangtang sa ilang mga pangalan gikan sa mga rekord sa Simbahan. Kini sigurado nga pagsulay sa mga kinabuhi namo sa akong asawa. Ug bisan tuod dili siya usa ka Santos sa Ulahing mga Adlaw, nasakitan ang akong amahan ug naglibug usab sa mga pagpili sa among mga anak. Siya usa ka pribadong relihiyuso nga tawo, ug siya miapil kanamo niadto nga mga katuigan sa pag-ampo alang kanila.
Niadtong 2005 ang akong amahan namatay human mahiling nga adunay kanser, ug ang akong inahan namatay paglabay sa tulo ka tuig. Ang akong asawa ug ako nalipay nga maoy ilang proxy sa pagpahigayon sa mga ordinansa sa templo human sa ilang kamatayon.
Dugay na akong nag-ampo nga makasabut sa labing maayong paagi nga manginlabut sa akong mga anak karon nga mga hamtong na sila, ang pipila duna nay kaugalingon nilang mga kapikas ug mga anak, nga walay usa kanila nga LDS. Suod gayud kami ngadto sa tanan namong upat ka mga anak, ug mapasalamaton kami nga kanunay silang mokontak kanamo uban sa gugma.
Sa katapusan nakadawat ko og klaro nga tubag kon unsaon nako pagdumala ang akong kaugalingon, posible sa tibuok nakong kinabuhi, kalabut niining hamtong nga mga anak. Kinahanglan nakong buhaton ang unsay gibuhat sa akong amahan kanako. Bisan pa sa nagkalain-lain namong mga kinabuhi ug sa lain-laing namong relihiyuso nga panglantaw, ang akong amahan determinado nga magpaduol kanako isip usa ka amahan ug usa ka higala samtang nasinati nako ang kasakit nga makita ang akong mga anak nga mipili og lahi nga estilo sa kinabuhi ug mga tinuohan kay kanako. Nakaamgo ko nga kinahanglan nakong sundon ang ehemplo sa akong amahan, kinsa mitudlo kanako unsaon pagtratar ang mga anak nga dunay lahi nga relihiyon: hingpit sila nga higugmaon, sama sa buhaton sa Manluluwas.