Atong Luna

Nasinati ba ninyo ang gahum sa Basahon ni Mormon sa inyong kinabuhi? Sulayi kini sama sa gibuhat sa mga misyonaryo!

Paghulagway pinaagi ni Brian Call

Nakit-an Nako ang Nawala nga Sumpay

Sa dihang high school nako, nasilo ko sa pipila ka doktrina sa Simbahan. Sa katapusan misangpot kini nga nahimo kong dili na kaayo aktibo. Miapil ko og mga kalihokan sa laing simbahan, apan dili kompleto ang akong kalipay. Ingon og dunay butang nga nawala.

Milungtad pa kini nako og dugay-dugay sa pagpangita unsay nawala, apan usa ka adlaw niana human ko mag-ampo, gibuka ko ang akong mga mata ug nakita ang Basahon ni Mormon diha sa lamesa. Matulog na unta ko sa dihang dunay misantup sa akong hunahuna: “Natawo ko nga usa ka Mormon. Nganong wala man ko makahuman og basa sa Basahon ni Mormon?” Mao nga nianang adlawa mihukom ko nga akong humanon ang pagbasa sa Basahon ni Mormon.

Human sa daghang mga tuig sa pagpangita, sa katapusan akong nakaplagan ang nawala nga sumpay niana nga kalipay.

Elder Jayme Promise, Philippines Quezon City Mission

Kon ang mga Tawo Moabli sa Basahon

Sa akong misyon nakita nako ang mga tawo kinsa moinom, mosigarilyo, ug mogamit og drugas nga miabli sa Basahon ni Mormon ug mitalikod sa ilang mga pamaagi ug mibalik sa ilang mga pamilya ug sa Simbahan. Nakita nako ang usikan nga mga anak nga mipauli ug miserbisyo og mga misyon human miabli sila niini nga basahon. Nakita nako ang mga pamilya nga nabungkag nga mibasa sa Basahon ni Mormon ug nabugkos sa templo pagkahuman. Nakita nako ang mga tawo nga hingpit nga wala nay paglaum ug wala masayud unsay buhaton miabli niini nga basahon, ug ang tanan nagsugod pagkahimutang.

Sa higayon nga moabli ko sa Basahon ni Mormon ug mogamit og bersikulo sa pagtabang og usa ka tawo, mga milagro mahitabo. Ang gahum sa Dios anaa niana nga mga pahina, naghulat sa usa ka kinabuhi nga mausab, naghulat nga mogawas ang usa ka milagro. Makasaad ko ninyo nga mahitabo ang mga milagro kada higayon nga kamo moabli sa Basahon ni Mormon. Tingali dili sa tanang higayon nga kini mahimo o mahitabo kon gusto natong mahitabo kini, apan mahitabo gayud kini.

Elder Benjamin Baradi, Philippines Bacolod Mission