Atong Amahan, Atong Tigtudlo

Ni Presidente Dieter F. Uchtdorf

Ikaduhang Magtatambag sa Unang Kapangulohan

Nakasulay ka na ba og abli sa usa ka kahon sa mga pisa [parts], mikuha sa instruksyon unsaon pagtaud, ug naghunahuna, “Dili man ni masabtan”?

Usahay, bisan pa sa atong labing maayong mga intensyon ug pagsalig sa kaugalingon, mokuha kita sa usa ka pisa ug mangutana, “Para sa unsa man kana?” o “Unsaon na sa pagpahaum?”

Ang atong kasagmuyo magkagrabe samtang atong tan-awon ang kahon ug makabantay og disclaimer nga nag-ingon, “Kinahanglang i-assemble—8 anyos pataas.” Tungod kay wala gihapon kitay ideya unsaon, dili kini makadugang sa atong pagsalig o pagtan-aw sa kaugalingon.

Usahay aduna kitay susama nga kasinatian sa ebanghelyo. Samtang motan-aw kita sa pipila ka parte niini, tingali mokalut kita sa atong ulo ug mangutana kon para sa unsa kana siya nga parte. O kon atong susihon ang laing parte, kita mahimong makaamgo nga bisan kon naningkamot pag-ayo aron hingpit nga makasabut, dili lang gihapon kita makasabut nganong gilakip kana nga parte.

Ang Atong Langitnong Amahan mao ang Atong Tigtudlo

Maayo gani, ang atong Langitnong Amahan mihatag kanato og talagsaon nga mga instruksyon alang sa paghan-ay sa atong mga kinabuhi ug paghimo sa atong mga kaugalingon nga labing maayo. Kadto nga mga instruksyon moepekto bisan unsa pa ang atong edad o kahimtang. Gihatagan Niya kita sa ebanghelyo ug sa Simbahan ni Jesukristo. Gihatagan Niya kita sa plano sa katubsanan, sa plano sa kaluwasan, gani sa plano sa kalipay. Wala Niya kita pasagdi uban sa tanan nga mga pagduha-duha o mga hagit sa kinabuhi, nga moingon, “Ania o. Hinaut swertehon ka. Sulbara na.”

Kon mapailubon lamang kita ug motan-aw uban sa mapainubsanon nga kasingkasing ug bukas nga hunahuna, atong makita nga ang Dios mihatag kanato og daghan nga mga himan aron mas makasabut sa Iyang komprehensibo nga mga instruksyon alang sa atong kalipay sa kinabuhi:

Gihatagan Niya kita sa bililhong gasa sa Espiritu Santo, nga adunay potensyal nga mahimong atong personal, langitnon nga tyutor samtang magtuon kita sa pulong sa Dios ug mosulay sa pagpahiangay sa atong mga hunahuna ug mga binuhatan ngadto sa Iyang pulong.
Gihatagan Niya kita og 24/7 nga access ngadto Kaniya pinaagi sa mga pag-ampo uban sa hugot nga pagtuo ug pagpangamuyo uban sa tinuod nga katuyoan.
Gihatagan Niya kita og modernong mga apostoles ug propeta, kinsa nagpadayag sa pulong sa Dios sa atong panahon ug adunay awtoridad sa pagbugkos o pag-seal dinhi sa yuta ug didto sa langit.
Gipahiuli niya ang Iyang Simbahan—usa ka organisasyon sa mga tumutuo kinsa nagtambayayong sa pagtabang sa usag usa samtang ilang gitrabaho ang ilang kaluwasan uban sa kahadlok, pagkurog, ug dili matupngan nga kalipay.¹
Gihatagan Niya kita sa balaang mga kasulatan—ang Iyang sinulat nga pulong ngari kanato.
Mihatag Siya og dili maihap nga mga himan sa modernong teknolohiya sa pagtabang kanato nga mahimong mga disipulo. Daghan niining talagsaon nga mga himan mahimong makita sa LDS.org.

Nganong ang atong Langitnong Amahan mihatag man kanato og daghan kaayong tabang? Tungod kay Iya kitang gihigugma. Ug tungod kay, sama sa Iyang giingon Mismo, “Mao kini ang akong buhat ug ang akong himaya—ang pagpahinabo sa pagka-imortal ug sa kinabuhi nga dayon sa tawo.”²

Sa laing pagkasulti, ang Langitnong Amahan mao ang atong Dios, ug ang Dios mao ang tigtudlo nato.

Ang atong Amahan sa Langit mas nasayud og maayo sa mga panginahanglan sa Iyang mga anak kay sa ni bisan kinsa. Kini ang Iyang buhat ug himaya sa padayon nga pagtabang kanato, paghatag kanato og talagsaon nga temporal ug espirituhanon nga mga kapanguhaan sa pagtabang kanato diha sa atong dalan pabalik ngadto Kaniya.

Ang Matag Amahan Usa ka Tigtudlo

Sa pipila ka bahin sa kalibutan, ang mga amahan pasidunggan sa mga pamilya ug katilingban sa bulan sa Hunyo. Kanunay gyud nga maayo ang pagtahud ug pagrespeto sa atong mga ginikanan. Ang mga amahan mobuhat og daghang maayo nga butang alang sa ilang mga pamilya ug adunay daghang dalaygon nga mga kinaiya. Ang duha sa labing importante nga tahas sa mga amahan diha sa kinabuhi sa ilang mga anak mao ang pagkahimong maayo nga ehemplo ug usa ka tigtudlo. Ang mga amahan mobuhat og labaw pa kay sa pagsulti lang sa ilang mga anak kon unsa ang husto o sayop; sila mobuhat og labaw pa kay sa paghatag lang og manwal ngadto kanila ug maglaum kanila nga mosulbad sa kinabuhi sa ilang mga kaugalingon.

Ang mga amahan motudlo sa ilang bililhong mga anak ug mopakita pinaagi sa ilang maayo nga ehemplo sa paagi nga magpuyo og matinuoron nga kinabuhi. Ang mga amahan dili mopasagad sa ilang mga anak apan magdali-dali sa pagtabang nila, motabang nila nga makabuntog sa mga kalisdanan nga ilang masinati. Ug usahay kon maalamon ang pagbuhat niini, ang mga amahan motugot nga manlimbasug ang ilang mga anak, nakaamgo nga kini tingali ang labing maayong paagi aron makat-on sila.

Kitang Tanan mga Tigtudlo

Samtang ang yutan-ong mga amahan mohimo niini alang sa ilang mga anak, ang diwa sa pagtudlo maoy gikinahanglan natong itanyag sa tanang anak sa Dios, bisan unsa pa ang edad, dapit, o sirkumstanya. Hinumdumi, ang mga anak sa Dios atong mga kaigsoonan; kitang tanan sa samang mahangturong pamilya.

Niini nga pagsabut, magmahimo kita nga mga tigtudlo—maghinam-hinam sa pagpangita ug pagtabang sa usag usa aron mahimo kitang labing maayo. Tungod kay kita mga anak sa Dios, aduna kitay potensyal nga mahimong sama Kaniya. Ang paghigugma sa Dios ug sa atong isigka-tawo, pagsunod sa mga sugo sa Dios, ug pagsunod sa ehemplo ni Kristo mao ang tul-id, pig-ot, ug makalipay nga dalan balik ngadto sa presensya sa atong langitnong mga ginikanan.

Kon ang Dios sa uniberso nagpakabana kaayo kanato nga Siya maoy atong tigtudlo, tingali kita usab mahimong motabang sa atong isigkatawo, bisan unsa pa ang ilang kolor, kaliwat, sosyal ug ekonomikanhong kahimtang, pinulongan, o relihiyon. Magmahimo kita nga dinasig nga mga magtutudlo ug mopanalangin sa kinabuhi sa uban—dili lamang sa atong kaugalingong mga anak apan sa tanang mga anak sa Dios sa tibuok kalibutan.