Pito ka Malumo nga mga Milagro sa Mao nga Pag-uswag

Ni Ephrem Smith

Ang tagsulat nagpuyo sa Nevada, USA.

Ang Ginoo mipanalangin sa akong kinabuhi sa mga milagro nga nakatabang kanako sa pagsunod sa dalan nga Iyang giandam alang kanako.

Samtang nagtudlo ug nagserbisyo sa daghang talagsaon nga mga tawo sa Texas Fort Worth Mission, kanunay akong mamalandong sa akong napanalanginan nga kinabuhi. Natingala ko labi na sa pito sa akong mga kasinatian, nga akong gikonsiderar nga mga milagro.

Una, nakalahutay ko sa sayong bahin sa akong kinabuhi, nga nagsugod sa labing ubos nga mga kahimtang. Natawo ko sa yuta nga salog sa payag sa akong inahan sa Dessie, Ethiopia. Si mama mao ra ang bugtong paryente nga akong nailhan sukad, ug siya ra mismo ang mitukod sa among walo ka pye (2.4 m) linginon og porma nga payag, gamit ang mga tukog ug lapok nga iyang gitabunan sa mga sagbut ug mga dahon. Ang among komunidad walay tubig nga nagdagayday ug walay kasilyas nga mga pasilidad. Ang sakit ug kamatayon komon sa among kebele, o kasilinganan. Lisud kaayo pangitaon ang pagkaon ug imposible alang kanamo nga makapalit. Ang akong inahan ug ako wala gayud makasinati og adlaw nga walay kagutom.

Sa dihang kwatro anyos ko, ang akong inahan grabeng nagkasakit. Uban sa iyang katapusang paningkamot, hinay mi nga miadto sa ospital, diin ang akong gihigugma, luya nga inahan namatay. Ang mga kawani sa ospital miluwas kanako gikan sa kinabuhi diha sa kadalanan ug sa kamatayon tungod sa kagutom pinaagi sa pagpahiluna kanako sa usa ka orphanage sa siyudad sa Addis Ababa, ang ulohan sa Ethiopia.

Ang ikaduhang milagro miabut samtang nausab og maayo ang akong kinabuhi. Dinhi niini nga orphanage nagpuyo ko sa usa ka limpyo nga building, natulog sa usa ka tinuod nga katre, ug mikaon sa tanang pagkaon nga akong ganahan. Ang ubang mga ilo nakasinati usab sa pagkawala sa usa ka minahal, ug ila kong gitudloan unsaon pag-atubang sa pagkawala sa akong inahan. Sa mga gabii nagpundok mi aron manganta og mga kanta nga Iningles ug mag-ampo sa Amharic, ang among lumad nga pinulongan. Nag-ampo mi alang sa usag usa ug mihangyo sa Dios sa pagpanalangin namo nga masagup kami ngadto sa “buotan, mabination, mahigugmaong mga panimalay.” Ang musika ug mga pag-ampo nakaapekto sa akong kinabuhi sa dako kaayo nga paagi. Wala gyud ako mohunong sa pag-ampo.

Ikatulo, gipaila-ila ko ngadto sa mga misyonaryo ug sa Simbahan sa dihang otso anyos ko. Gidapit ko nga motan-aw sa pagpahinungod sa unang building sa LDS nga Simbahan sa Ethiopia niadtong Dominggo, Nobyembre 30, 2003. Diha sa pagpahinungod gibati nako ang gamhanang impluwensya sa Espiritu Santo, ug ang mga misyonaryo nga nanambong mipasanag og hingpit nga kalipay, ug nianang sama nga gamhanang espiritu. Nakahinumdom ko nga naghunahuna nga gusto ko nga mahimong sama kanila. Apan wala koy ideya kon sa unsang paagi nga makab-ot kini nga tumong.

Ang ikaupat nga milagro miabut sa wala madugay human niana. Usa ka pamilya sa Estados Unidos misagup kanako. Ang akong bag-ong amahan mikuha kanako gikan sa orphanage ug midala kanako ngadto sa balay. Nagsugod mi sa proseso sa pag-ila-ila, ug misugod ko sa pagpahimutang sa akong bag-ong palibut.

Daghang mga hagit ang mitunga dayon sa akong pag-abut. Bisan asa ko moadto ang mga tawo mangatawa sa akong Iningles. Ang akong limitadong edukasyon nakamugna og mga problema sa eskwelahan. Nag-ampo ko alang sa panabang, ug dayon naningkamot ko og maayo ug mas listo aron masangkapan ang akong kakulang sa kahibalo, ilabi na sa Iningles. Sa makausa pa ang Langitnong Amahan mitubag sa akong mga pag-ampo. Paglabay sa duha ka tuig milukso ko og usa ka grado.

Dayon ang akong kinabuhi sa panimalay nagun-ob. Mga pag-ampo ngadto sa Ginoo, tag-as nga personal nga mga tumong, ug usa ka dakong tinguha nga magmalampuson mitabang kanako nianang hilabihan ka lisud nga panahon. Sa katapusan, uban sa tabang sa usa ka social worker, ang akong amahan ug ako miuyon nga undangon ang pagsagop. Kini usa ka panahon alang sa pag-ampo, pailub, hugot nga pagtuo, ug tabang gikan sa Langitnong Amahan.

Karon 15 anyos, mipuyo ko uban sa usa ka foster family sulod sa mga usa ka tuig. Mao kana sa dihang miabut ang ikalima nga milagro. Samtang nagsakay-sakay og sleigh uban sa duha ka mga higala, akong nahimamat ang usa ka LDS nga pamilya nga adunay duha ka nindot nga mga anak nga babaye. Sa among pagpamauli, ang usa sa mga anak nga babaye misulti, nga nag-ingon, “Nagtuo ko nga ang Ginoo buot nato nga sagupon si Ephrem Smith.” Talagsaon, ang ubang tulo ka mga sakop sa pamilya nakadawat usab sa sama nga inspirasyon. Ang amahan miasikaso sa Department of Social Services, ug wala madugay mibalhin ko sa akong bag-ong panimalay. Gikan sa sinugdanan ang akong talagsaon nga bag-ong amahan mihatag kanako sa kabubut-on. Sama pananglit, siya mipasabut nga ang ilang pamilya manimba matag Dominggo. Gitugotan ko niya nga mopili sa pag-apil nila o sa pagpabilin sa balay; siya miingon nga ila gihapon kong higugmaon kon mopili ko sa dili pagtambong sa simbahan. Mipili ko nga motambong sa simbahan, ug sukad niadto mibuhat pa ko og daghang matarung nga mga desisyon.

Ang ikaunom nga milagro samtang nakadawat ko og pagpamatuod sa ebanghelyo. Usa ka Dominggo naglingkod ko sa sakrament miting nga nanganta sa “I Stand All Amazed” (Hymns, no. 193). Dagkong mga luha ang midagayday sa akong mga aping sa dihang akong nadawat ang personal nga pagpamatuod nga si Jesus mao ang Kristo ug nga ang Simbahan mao ang Iyang Simbahan.

Sa katapusan, paglabay sa siyam ka tuig, nasayud ko kon unsaon nga mahimong sama niadto nga mga misyonaryo! Ang misyonaryo nga edad karon 18 na, apan ang pagsagup kanako wala pa mahuman. Mihulat ko og pito ka dugay nga mga bulan hangtud nga nakompleto na gyud ang pagsagup kanako. Sa katapusan, ang akong mga papeles sa misyon masumiter na. Paglabay sa upat ka adlaw akong nadawat ang akong mission call. Sulod lamang sa usa ka semana ang Ginoo mipanalangin kanako sa kompletong mga papeles sa pagsagup ug sa mission call. Gipakabililhon ko og maayo ang duha ka mga papeles! Sila ang akong ikapito nga milagro. Oo, sa pagkatinuod, mikabat og daghan nga mga milagro niana nga proseso gikan niana nga payag nga hinimo sa lapok sa Ethiopia ngadto sa akong gihambin nga misyon.