Unsay Atong Nahibaloan mahitungod sa Kinabuhi human sa Kamatayon?
“Kon ang usa ka tawo mamatay, mabuhi ba siya pag-usab?” Oo! Apan unsa man dayon?
Sa tibuok kapanahonan, dili maihap ang mga tawo nga nangutana pinaagi ni Job: “Kon ang tawo mamatay, mabuhi ba siya pag-usab?” (Job 14:14). Ang pagsinggit og dakong “Oo!” agig tubag sa ingon nga pangutana mao ang usa ka dakong prebilihiyo niadtong dunay pagpamatuod ni Jesukristo ug sa Iyang Pagkabanhaw.
Apan daghan sa nagpalibut kanato nga nagpakabuhi niining kinabuhia “nga wala ang Dios sa kalibutan” (Mga Taga Efeso 2:12) ug kinahanglan nga magnabigar tali sa nagkadaiyang kamatuoran ug mga pagtuo kalabut sa kamatayon. Alang sa tawo, naay ebidensya nga ilang nakita, o ang “sakit nga kamatuoran” nga ang kamatayon malukpanon ug mahitabo gayud—wala pay nakita nga mibalik. Dayon adunay mga halapad nga mga balita sa mga kasinatian nga nag-ungaw sa kamatayon, nga may talagsaong kamakanunayon tali nila. Ug dayon anaa ang kamatuoran nga ang tawhanong kultura sa tibuok kalibutan kanunayng adunay konsepto sa usa ka sunod nga kinabuhi, lain nga nagmakanunayon nga nanginahanglan og pagpasabut.
Apan ang kasigurohan nga ang atong mga kinabuhi dili motapos sa kamatayon naggikan sa Dios, kinsa nagpadayag niini gikan pa sa sinugdanan pinaagi sa daghang mga saksi, lakip na ang mga propeta, mga apostoles, ug, labing importante, ang Espiritu Santo.
Gikan sa Sinugdanan
Ang plano sa kaluwasan mao ang unang gitudlo dinhi sa yuta ngadto ni Adan ug ni Eva, ang atong unang mga ginikanan. Nakat-unan nila ang mahitungod sa ebanghelyo ni Jesukristo ug sa unsang paagi nga makabalik ngadto sa presensya sa Langitnong Amahan—ug nasabtan nila nga ang pagbalik nagpasabut nga nakauban na nato Siya sa kaniadto. Busa, gikan sa sinugdanan, si Adan ug Eva klaro nga nakahibalo nga kini nga kinabuhi dili lang kutob dinhi. Nakahibalo sila—ug gitudlo nila sa ilang mga anak—nga tungod sa Pag-ula ni Jesukristo, sila mabanhaw human niining kinabuhi ug, kon sila magmasulundon, madawat nila ang kinabuhing dayon (tan-awa sa Moises 5:10–12).
Ang mga kalibutanon nga mga teyoriya nagsugyot nga ang pagtuo sa sunod nga kinabuhi mao ang laing independente nga sangputanan sa psychological nga panginahanglan sa kalibutan. Apan ang halapad nga ideya sa kinabuhi human sa kamatayon hinoon naglangkob sa usa ka karaan o tiningub nga panumduman (kon dili usa ka panumduman sa kinabuhi nga wala pa dinhi sa yuta) sa unsay gipadayag diha sa sinugdanan ug dayon gipasa gikan sa henerasyon ngadto sa laing henerasyon. Unsa ang giingon ni Presidente Joseph F. Smith (1838–1918) kaniadto mahitungod sa uban nga mga relihiyusong buhat magamit usab sa komon nga mga pagtuo sama sa kinabuhi human sa kamatayon: “Walay duda nga ang kahibalo [niini] … nadala pinaagi sa mga kaliwatan ni Adan ngadto sa tanang kayutaan, ug nagpadayon … lahos ni Noe … ngadto niadtong kinsa misunod kaniya, nagsabwag ngadto sa tanang kanasuran” (“Discourse,” Deseret News, Feb. 19, 1873, 36).
Busa, ang ideya sa kinabuhi lapas pa niining kinabuhiamalukpanon tungod kay ang gigikanan mihaum sa sinugdanan sa kaliwatan sa katawhan mismo.
Yano ug Bililhon nga mga Kamatuoran
Isip mga Santos sa Ulahing mga Adlaw, makatabang kita sa paghatag og paglaum ngadto sa mga kinabuhi niadtong nagpakabuhi nga wala ang Dios sa kalibutan pinaagi sa kamasaligon sa pagpaambit sa atong pagsaksi sa kamatuoran mahitungod sa atong pagkabuhi: ang kamatayon dili mao ang katapusan. Agig dugang, makatubag kita sa daghang pangutana mahitungod sa kinabuhi human sa kamatayon tungod sa yano ug bililhon nga mga kamatuoran sa gipahiuli nga ebanghelyo nga gipadayag. Ania ang mubo nga mga tubag sa pipila sa ingon nga mga pangutana.
Unsa ang mahitabo kanato human kita mamatay?
Sa panahon sa kamatayon, ang atong mga espiritu mobuwag gikan sa atong mga lawas ug dayon mosulod sa kalibutan sa mga espiritu (tan-awa sa Santiago 2:26; Alma 40:11).
Unsay hitsura sa atong mga espiritu?
Ang atong mga lawas sa espiritu sama ra sa ilang hitsura sa kinabuhi sa wala pa dinhi sa yuta: tawhanong mga lawas sa hingpit nga porma sa pagkahingkod (tan-awa sa Ether 3:16; Mga Pagtulun-an sa mga Presidente sa Simbahan: Joseph F. Smith [1998], 160). Human sa kamatayon, ang atong mga espiritu mao lang gihapon ang kinaiya, mga gana, ug mga tinguha sa atong mga lawas sa panahon sa atong kamatayon dinhi sa yuta (tan-awa sa Alma 34:34).
Unsa ang espiritu?
Ang espiritu usa ka matang sa butang, lamang “labaw nga dalisay o putli” (D&P 131:7).
Unsay hitsura sa kalibutan sa espiritu?
Adunay duha ka dakong estado o mga bahin tali sa mga espiritu sa kalibutan sa mga espiritu: paraiso ug bilanggoan sa espiritu. Ang mga matarung nga mga espiritu moadto sa paraiso, nga mao ang “usa ka kahimtang sa kapahulayan, usa ka kahimtang sa kalinaw, diin sila mopahulay gikan sa tanan nila nga mga kasamok ug tanan nga kabalaka, ug kasubo” (Alma 40:12). Ang mga espiritu sa mga tawo kinsa wala pa nakadawat sa ebanghelyo ni Jesukristo giingon nga maadto sa bilanggoan sa espiritu (tan-awa sa 1 Pedro 3:18–20). Mahimo gihapon silang mopili sa maayo o dautan ug modawat o mosalikway sa ebanghelyo. Ang mga espiritu sa paraiso makatudlo sa ebanghelyo ngadto kanila (tan-awa sa D&P 138). Kadtong kansang mga espiritu ug mga lawas nabulag sulod sa dugay nang panahon naglantaw niini nga panagbulag isip “usa ka ulipon” (D&P 45:17; 138:50).
Unsa ang langit?
Ang langit sa kinatibuk-an gisabut nga usa ka dapit diin ang Dios nagpuyo ug diin ang matarung nga mga tawo mahimong magpuyo sa katapusan. Kini nga pagsabut, lahi gikan sa paraiso sa kalibutan sa espiritu.
Unsa ang impyerno?
Diha sa mga kasulatan, ang impyerno mahimong nagpasabut sa usa sa duha ka mga butang: (1) “ang temporaryo nga pinuy-anan diha sa kalibutan sa espiritu alang niadtong kinsa nagmasinupakon sa mortalidad” o (2) “ang permanente nga dapit sa kadtong kinsa wala matubos sa Pag-ula ni Jesukritsto” (Giya ngadto sa mga Kasulatan, “Impyerno,” scriptures.lds.org). Sa kinatibuk-an nga pagsabut, mao kini ang espirituhanon nga kahimtang nga antuson niadtong kinsa misalikway sa ebanghelyo. Si Joseph Smith mitudlo: “Ang hilabihan nga pag-antus sa mipanaw na nga mga espiritu ngadto sa kalibutan sa mga espiritu … mao ang pagkaamgo nga napakyas sila sa pagkab-ot sa himaya nga naangkon sa uban ug nga unta maangkon usab nila, ug sila ang motulisok sa ilang mga kaugalingon” (Mga Pagtulun-an sa mga Presidente sa Simbahan: Joseph Smith [2007], 224).
Unsa ang pagkabanhaw?
Ang pagkabanhaw mao ang panagbalik sa espiritu ug lawas sa hingpit, imortal nga kahimtang (tan-awa Alma 11:43).
Kinsa ang mabanhaw?
Ang tanang mga tawo nga nakapuyo sa yuta mabanhaw (tan-awa 1 Mga Taga Corinto 15:22; Alma 11:44).
Kanus-a man kita mabanhaw?
Ang mga tawo mabanhaw sa lain-laing mga panahon. Ang Pagkabanhaw ni Jesukristo nag-agak sa Unang Pagkabanhaw, o ang pagkabanhaw sa matarung. Ang ubang matarung nga mga tawo nabanhaw na sukad niana nga panahon. Human sa Ikaduhang Pag-anhi ni Jesukristo, daghan pang matarung nga mga tawo ang mabanhaw. Atol sa Millennium, ubang mga maayong tawo mabanhaw. Human sa Millennium, ang dautan mabanhaw. (Tan-awa sa D&P 76:32–112; 88:97–101.)
Unsay hitsura sa nabanhaw nga mga lawas?
Ang nabanhaw nga mga lawas mao ang lawas ug bukog (tan-awa sa Lukas 24:39), imortal (tan-awa sa Alma 11:45), hingpit (tan-awa sa Alma 11:43), mahimayaon, ug matahum. “Walay sama ka anyag nga tan-awon kay sa usa ka nabanhaw nga lalaki o babaye” (Presidente Lorenzo Snow [1814–1901], The Teachings of Lorenzo Snow, ed. Clyde J. Williams [1996], 99).
Unsay mahitabo human kita mabanhaw?
Human mabanhaw ang tanang mga tawo ug ang Millennium mahuman na, dad-on kita sa presensya sa Dios aron hukman sumala sa atong mga pulong, binuhatan, hunahuna, ug mga tinguha (tan-awa sa Pinadayag 20:12; Alma 12:14; D&P 137:9). Si Jesukristo mao ang akong Maghuhukom (tan-awa sa Juan 5:22, 27–29; Mga Taga-Roma 14:10).
Unsay mahitabo human sa Katapusan nga Paghukom?
Human sa Katapusan nga Paghukom, dawaton nato ang usa sa mosunod nga mahangturong ganti:
Celestial nga gingharian: ang panimalay sa Langitnong Amahan, ni Jesukristo, ug sa tanan niadtong kinsa mikwalipay alang sa kinabuhing dayon pinaagi sa paghimo ug pagsunod sa tanang pakigsaad sa ebanghelyo (tan-awa sa D&P 76:50–70).
Terrestrial nga gingharian: ang panimalay niadtong mga maayong tawo kinsa wala modawat sa ebanghelyo ni Jesukristo apan nadawat kini diha sa kalibutan sa mga espiritu o kinsa dili ligdong sa pagpamatuod ni Jesukristo diha sa kinabuhi (tan-awa sa D&P 76:71–80).
Telestial nga gingharian: ang panimalay niadtong mga dautan ug wala modawat sa ebanghelyo ni Jesukristo, kinsa dili mabanhaw hangtud mahuman ang Millennium (tan-awa sa D&P 76:81–89).
Walay katapusan nga silot: ang katapusan nga kahimtang sa mga anak sa perdisyon, ingon usab sa yawa ug sa iyang mga anghel (tan-awa sa D&P 76:31–49).
Unsa man ang gipangbuhat sa mga tawo sa celestial nga gingharian?
Kadtong kinsa makapanunod sa labing taas nga ang-ang sa celestial nga gingharian mahimaya, nagpasabut nga sila makabaton og kinabuhing dayon, mahimong sama sa atong Langitnong Amahan, ug madawat ang tanan nga anaa sa Amahan. Aron mahimong sama sa Langitnong Amahan nagpasabut nga kinahanglan maangkon ang Iyang mga kinaiya sa pagkahingpit, lakip ang gugma ug serbisyo.1 Nagpasabut usab kini sa pagpakigbahin sa Iyang buhat ug himaya, nga mao ang “pagpahinabo sa pagka-imortal ug kinabuhi nga dayon sa tawo” (Moises 1:39). Ang kahimayaan naglakip sa pagpabugkos sa kaminyoon alang sa kahangturan, magpuyo nga mahangturon nga mga pamilya, ug mag-angkon og mga espiritu nga mga anak. (Tan-awa sa D&P 76:59, 62; 130:2; 132:19–23.)
Unsa man ang gipangbuhat sa mga tawo sa uban nga mga gingharian?
Kadtong uban nga mga gingharian mahimong mga anghel, kinsa “mga sulugoon sa pagpangalagad, sa pag-alagad alang niadto kinsa mga takus sa labaw pa, ug usa ka naghingapin, ug usa ka walay katapusan nga sukod sa himaya” (D&P 132:16). Dili sila maminyo o makabaton og espiritu nga mga anak (tan-awa sa D&P 131:1–4; 132:16–17).