Elder Gary E. Stevenson: Usa ka Masinabuton nga Kasingkasing
Ni Elder Robert D. Hales
Sa Korum sa Napulog Duha ka mga Apostoles
Litrato sa mga balita sa maayong kabubut-on ni Kristin Murphy, Deseret News; ug ni Sarah Jane Weaver, Church News
Dihang si Gary Stevenson mga 11 anyos pa, gidala siya sa iyang papa sa usa ka lakaw. “Milayat ko gikan sa usa ka bato ngadto sa laing bato atubangan sa akong papa,” nahinumdom siya. “Tuyo nako ang pagkat-kat sa dakong bato ug motan-aw sa ubos. Dihang nakakat-kat na ko dapit sa ibabaw sa bato, iyang gigunitan ang akong bakos ug gibira ko paubos.
“‘Ngano diay?’ Miingon ko, ug mitubag siya, ‘Ayaw og kat-kat niana nga bato. Mosubay lang ta sa agianan.’ Mga gutlong milabay dihang among gilantaw sa ubos gikan sa ibabaw nga agianan, among nakita ang usa ka bitin [rattle snake] sa ibabaw sa bato, nagpainit sa adlaw.
“Mao to nganong gibira ta ka,’ mipasabut si papa.
“Wala madugay sa pagbiyahe namo pauli, nahibalo ko nga naghulat siya nako nga mangutana: ‘Giunsa nimo pagkahibalo nga tua didto ang bitin?’ Miingon siya, ‘Tudloan ta ka mahitungod sa Espiritu Santo.’ Duna kami diha-diha nga leksyon mahitungod sa mga tahas nga mahimo sa Espiritu Santo sa atong kinabuhi: tigpanalipud, tighupay, ug usa nga tigpamatuod. ‘Niining sitwasyuna,’ miingon ang akong papa, ‘ang Espiritu Santo nanalipud kanimo pinaagi nako. Gipasidan-an ko niya nga birahon ta ka.’”
Kini nga kasinatian, bisan yano, nakatabang kang Elder Stevenson nga makasabut nga kon madawat ang mga pag-aghat sa Espiritu, kinahanglan nga dawaton kini ug lihukon. Usa kadto sa daghang leksyon nga nakat-unan niya gikan sa iyang amahan.
Talagsaong Inahan, Talagsaong mga Tigtudlo
Mga litrato sa maayong kabubut-on sa Stevenson family, gawas kon gipahibalo; sa wala: mga bulak © tukkata/iStock/Thinkstock; sa tuo: litrato sa Logan Utah Temple pinaagi ni Jarvie Digital
Sumala ni Elder Stevenson, ang iyang mama usa ka ehemplo sa tiunay nga pagkamaayo: “Ang iyang mga gilauman midasig kanako. Hapit sa tanan nakong gibuhat maghunahuna ko nga, ‘Dili ko gustong masagmuyo si mama.’”
Sa pagtinabangay, gitudlo sa iyang mga ginikanan ang mga baruganan sa ebanghelyo atol sa ilang family home evening ug ubang mga kalihokan o panagpundok sa pamilya. “Ilang gilig-on ang among panimalay sa mga pagtulun-an sa ebanghelyo. Mao kadto ang pundasyon sa among kinabuhi,” miingon siya.
Ang uban pang mapuslanon nga tigtudlo migiya usab kaniya. “Nahinumdom ko sa uban nakong unang mga training isip General Authority nga si Presidente Henry B. Eyring, Unang Magtatambag sa Unang Kapangulohan, misugyot nga maghimo kami og lista sa 20 ka tawo nga dunay positibong impluwensya sa among kinabuhi. Sa akong hunahuna ang tanan makabenepisyo sa ingon niadto nga buluhaton. Makadasig ang paghunahuna sa tanang buotan nga mga lalaki ug babaye kinsa anaa aron sa pagtabang kanako, ilabi na sa akong pagkabatan-on.”
Nalig-on pinaagi sa Pamilya ug mga Higala
Si Gary E. Stevenson natawo niadtong Agosto 6, 1955, ug nagdako sa Logan, Utah, USA. Ang iyang mga ginikanan, si Evan ug si Jean Hall Stevenson, dunay upat ka anak. Si Gary ang ikaduha nga anak ug kamagulangan nga lalaki.
“Suod kaayo ko sa akong mga igsoon. Naglaum ang magulang nako nga babaye, si Debbie, nga mohimo ko unsay eksakto. Ang akong mga manghud sila si Merilee ug si Doug, naglaum nga mahimo kong usa ka ehemplo. Tanan kami mibati og responsibilidad sa pagpakabuhing matarung ug moapil sa mga kalihokan sa Simbahan.” Ang iyang mga paryente usab dunay taas nga ekspektasyon: “Sama pananglit, dihang milarga sa misyon ang kinamagulangan nakong ig-agaw, gipirmahan niya ang $2 ka dolyar nga kwartang papel ug gipasa kini ngadto sa sunod nga ig-agaw nga nangamdam sa pagmisyon. Ang $2 ka dolyar nga kwartang papel gipasa hangtud ngadto sa ika 16 nga ig-agaw kinsa nakaserbisyo og misyon sa tibuok kalibutan, nagpahinumdom sa matag usa nga kami nagkahiusa sa pagserbisyo sa Ginoo.”
Ang mga higala nga priesthood nakaimpluwensya usab kaniya para sa kaayuhan. “Sayo kong nakakat-on sa kinabuhi unsay ipasabut sa pagkasakop sa usa ka korum, nga dili lang sa adlawng Dominggo apan usab sa mga silingan ug sa eskwelahan,” miingon siya. “Naghatag kini kanako og pagbati sa pag-ilhanay, pagkahisakop, panag-igsoonay, ug pagserbisyo.” Nahinumduman kaayo niya ang pakigkuyog sa sakop sa korum sa pagpangolekta og mga halad sa puasa gikan sa usa ka sister sa ward nga anaa ra sa balay, buta, ug wala kaayoy kinitaan. “Bisan sa iyang mga kahimtang, kanunay siyang dunay diyot o sinsilyo isip halad sa puasa,” nahinumdom siya.
Gasa nga Nagkinahanglan og Buhat
Human maka-gradwar sa high school ug sa mubong panahon sa pag-eskwela sa Utah State University, si Elder Stevenson gitawag aron moserbisyo sa Japan Fukuoka Mission. “Nabalaka kaayo ko unsaon pagkat-on sa Hinapon. Ang akong kabalaka nagpadayon hangtud sa missionary training center. Hinoon human sa unom ka bulan, ang tinuoray nga pag-ampo ug makugihong pagtuon mihatag kanako og pagbati sa kalinaw nga panalanginan ko sa Ginoo nga makakat-on og Hinapon, apan dili mahitabo kon walay pagkugi. Nagtudlo kini kanako nga ang gasa sa mga pinulongan susama ra sa usa ka pagtuo ug mga buhat ug sa ubang mga baruganan sa ebanghelyo. Human nimo mabuhat ang tanan nga imong mahimo, niana hatagan ka og panalangin.”
Human sa iyang pagmisyon, milambo ang hilig ni Elder Stevenson sa kasaysayan sa Simbahan, pagtuon sa Basahon ni Mormon ug sa mga Doktrina ug mga Pakigsaad, ug sa pagsiksik sa makasaysayon nga mga journal ug mga family history. Nainteresado siya ilabi na bahin kang Joseph Smith ug sa iyang pamilya, sa pamilya nga Whitmer, Oliver Cowdery, ug ni Martin Harris. Iyang gisiksik ang hubad ug publikasyon sa nagkalain-laing mga edisyon sa Basahon ni Mormon.
Sa makausa pa iyang nakat-unan nga ang hugot nga pagtuo ug pagkugi magkatambayayong. “Ang tanang tubag sa tanang pangutana sa ebanghelyo dili dayon moabut,” mitambag siya. “Ang Ginoo naglaum nga kita mobasa, magtuon, mamalandong, ug mag-ampo. Ug kon buhaton nato kini uban sa hugot nga pagtuo ug matarung nga tinguha, sa katapusan usa ka matam-is nga pagsaksi ang moabut.”
Sa tibuok niyang kinabuhi, gibati niya nga napanalanginan kaayo dihang gitawag siya nga motudlo sa youth Sunday School, Doktrina sa Ebanghelyo, ug sa mga klase sa Young Men. Kini nga mga calling nagtugot nga siya makapamatuod sa iyang lig-on nga pagbati sa kamatuoran sa mga kasulatan, usa ka kombiksyon nga naugmad gumikan sa mga katuigan nga pagtuon.
Balik sa Utah State University, si Elder Stevenson mibalik sa pag-eskwela og business administration ug marketing. Daghang oras ang iyang gigahin didto sa library. “Sa matag sulod nako, sugaton ko sa nakasulat … nga mabasa, ‘Uban sa tanan mo nga pagatinguhaon batoni ang pagsabut’ [Mga Proverbio 4:7].” Kini nga kasulatan napatik sa iyang kasingkasing ug paglabay sa katuigan nahimong tema sa usa ka pakigpulong sa debosyunal nga iyang gihatag sa Brigham Young University.
“Kini nga panabut miabut gumikan sa kombinasyon sa pagtuon ug pag-ampo,” iyang gipasabut niana nga pakigpulong. “Kon kita mosalig ug magmasaligon sa Ginoo, ang dakong panabut nga gikan Kaniya motuhop sa atong kasingkasing.”1
Sugilanon sa Gugma atol sa Institute
Atol sa institute of religion nga klase sa Daang Tugon, iyang nahimamat si Lesa Jean Higley, kinsa mibalhin gikan sa California ngadto sa Idaho ug karon estudyante sa Utah State. “Ang magtutudlo mihangyo kang Lesa nga siya ang modala sa papel ni Eva sa role play ug ako ang modala sa papel ni Satanas nga motintal kaniya. Isip resulta, dugay na noon nako siyang nakumbinsir nga mogawas kuyog nako,” misulti siya uban sa pahiyum. Nag-date sila kapin lang usa ka tuig ug dayon nagminyo sa Idaho Falls Idaho Temple niadtong 1979.
Misanag ang mga mata ni Elder Stevenson dihang gihisgutan niya si Lesa. Iyang gipasabut nga “siya ang tinubdan sa akong kalipay.”2 Si Sister Stevenson mi-graduate sa degree nga home economics education, nagmaestra sa bag-o pa silang minyo, ug padayon nga mitampo sa iyang panahon ug mga talento ngadto sa mga eskwelahan, sibiko ug mga konseho sa komunidad, mga organisasyon, ug ubang mga paningkamot. Apan, si Elder Stevenson mikonsiderar sa iyang mga gasa nga hinatag sa Dios isip usa ka homemaker nga pinakamaayong abilidad sa tanan: “Anaa kaniya ang abilidad sa pagmugna og panimalay nga nagsentro sa ebanghelyo, usa ka luwas ug maabi-abihon nga palibut diin makapuyo ang Espiritu.” Kini nga abilidad, inubanan sa dakong panabut nga ang tinuod nga kalipay moabut pinaagi sa pagserbisyo sa uban, mipanalangin sa kinabuhi sa iyang bana, iyang pamilya, ug sa daghan pa nga naglibut kaniya.
Si Elder ug Sister Stevenson nahimong mga ginikanan sa upat ka anak. “Gikalipay namo ang tanang butang sa tibuok kinabuhi,” miingon siya. “Ang mga bata modula og basketball, football, baseball, ug tennis. Parehas ming tanan nga ganahan og mga kalihokan sa gawas sama sa four-wheeling, snowmobiling, skiing, snowboarding, lain-laing mga water sports. Bisan pa, si Lesa miimpluwensya usab sa among mga anak og pipila ka kultura, giugmad diha kanila nga mahiligon sa musika ug art. Ug aron mapadangat ang gasa sa pagserbisyo ngadto sa uban pinaagi sa among pamilya, gikinahanglan nga moapil siya sa ‘kalagsik’ sa mga batang lalaki.”
Ang Pagtukod og Negosyo
Ang negosyo ni Elder Stevenson namugna tungod sa iyang gugma sa mga tawo sa Asya. Dihang miuli na siya gikan sa iyang pagmisyon, siya ug ubang mga higala nagsugod sa pag-import og mga gift accessories gikan sa Asya. Kini sa kadugayan nahimo nga pagpamaligya og mga fitness products. Kapin sa misunod nga tulo ka dekada, ang gamay nilang negosyo nahimong malampuson nga kompanya nga nakaempleyo og kapin sa 2,500 ka mga tawo.
Ang usa ka empleyado nahinumdom unsa kamabination si Elder Stevenson isip usa ka negosyante: “Gihisgutan namo ang lisud kaayong desisyon sa negosyo. Giingnan nako siya nga siguroon nato nga legal ang atong mahimo. Giingnan ko niya nga dili lang kay legal ang atong himoon kondili eksakto ang atong himoon.”
“Ang pagpasulod og maayong mga baruganan diha sa negosyo usa ka maayong negosyo,” pahayag ni Elder Stevenson. “Ang kaligdong, kakugi, kamanggiloloy-on, pagrespeto sa uban—ug sa samang higayon ang panginahanglan sa pagkamay tulubagon—dili mga butang nga litukon ug buhaton lamang sa matag Dominggo. Kinahanglan kining buhaton matag adlaw sa semana.”
Samtang magtubo ang negosyo, mao usab ang panginahanglan sa iyang panahon: “Batan-on pa ko adto nga bishop nga may gagmayng mga anak ug nagbiyahian sa makadaghang higayon sa Asya kapin sa 100 ka adlaw sa matag tuig. Giduol ko sa akong papa ug giingnan, ‘Nabantayan nako nga kon naa ka kauban sa imong pamilya, wala gyud nimo sila ikauban. Nabalaka lang ko nga basin nagpasabut kana nga kon naa ka sa imong trabaho, wala nimo matutuki kini sa hingpit, ug kon naglihok ka isip bishop, basin nabalaka ka mahitungod sa imong trabaho o pamilya. Nagkinahanglan ka og mas dako-dako nga pagbalanse sa imong kinabuhi.’”
Kini nga tambag dunay lawom nga epekto. Miingon si Elder Stevenson, “Nakakat-on ko nga importante ang pagbalanse sa pamilya, panarbaho, ug sa calling sa Simbahan, ug sa pagsiguro nga maatiman sab nimo ang imong kaugalingon.”
Balik-balik nga—Gitawag sa Pagserbisyo
Usa ka tinahud nga lider sa negosyo kausa midasig ni Elder Stevenson nga “magkat-on, mangwarta, ug moserbisyo.” Niadtong 2004 ang “moserbisyo” nga kabahin niana nga tambag natestingan dihang si Elder Stevenson ug ang dugay na niyang kauban sa negosyo Scott Watterson gitawag nga moserbisyo isip mga mission president. Gibati nila nga kinahanglan nilang ipasabut sa lain-lain nilang mga stakeholders ug mga kustomer nganong temporaryo nilang biyaan ang ilang kompanya. Sa tinagsa-tagsa sila ilang gibisitahan.
“Dihang gihulagway namo ang among call ug nga kami moserbisyo sulod sa tulo ka tuig nga walay sweldo gikan sa Simbahan, ilang gitahud ang pagkamaayo niana,” miingon siya. Gibiyaan nila ang negosyo sa mga kamot sa kasaligan nga executive nga grupo, ug milambo kini.
Isip presidente sa Japan Nagoya Mission, nakita ni Elder Stevenson nga nagkalawom ang iyang gugma sa Asya. “Gikonsiderar nako kini nga ikaduha nakong panimalay,” miingon siya. Ang kalawmon sa iyang paghigugma ngadto sa iyang asawa milambo usab dihang nakita niya nga gidawat ra sa iyang asawa ang lokal nga kultura, mitabang sa uban, lakip ang mga misyonaryo ug mga miyembro, ug padayon nga nagpadako sa duha ka anak nga mikuyog kanila. Pipila sa mga convert baptism nahimong usa ka bahin isip resulta sa paningkamot nga iyang mahigala ang naa sa iyang palibut.
Mga pito pa lang sila ka bulan sukad miuli sa misyon dihang si Elder Stevenson gitawag nga moserbisyo sa Unang Korum sa Seventy niadtong 2008.
“Nakurat ko ug mibati og kamapaubsanon. Naghunahuna ko, ‘Naay daghan kinsa makaserbisyo og mas maayo kay nako.’ Gani sa miaging mga panahon naghunahuna ko—isip elders quorum president, high councilor, bishop, ug counselor sa stake presidency—dihang gibati nako nga dili pa gyud igo ang akong kabatid sa mga butang nga ipahimo kanako. Nakakat-on ko nga sa dili pa kita tawagon, tingali, kita dili pa kwalipikado, apan ang tawag magsugod sa langitnong kwalipikasyon.
“Usa sa paborito nakong mga kasulatan nagsulti kanako og duha ka butang nga kinahanglan atong buhaton kon kita tawagon: Una, ‘magmatinud-anon.’ Ikaduha, barug diha sa buhatan nga gitudlo nganha kanimo (tan-awa sa D&P 81:5). Para nako nagpasabut kini sa pagpakita og pagtuo, pagkat-on sa mga mapuslanon, ug dayon sa paghimo sa tanan nga mapalambo ang tawag. Kon kini atong buhaton, ang Ginoo mopalambo ug kita mokwalipay para sa pagpanalangin sa uban.”
Adto sa Asya na Usab
Isip usa ka Seventy, si Elder Stevenson gi-assign nga counselor sa Area Presidency ug dayon presidente sa Asia North Area.
Niadtong Marso 2011, ang linog ug tsunami miguba sa Japan. Ang 9.0-nga gikusgon sa linog mimugna og tsunami nga mikalas og 20,000 ka tawo, liboan ang wala nay pinuy-anan, ug miguba sa 550,000 ka mga balay.
Gibisitahan niya ang nagun-ob nga dapit sa makadaghang higayon. “Samtang nakighimamat kami sa mga tawo, grabe ang among mga emosyon,” nahinumdom siya. “Among naobserbahan ang trahedya ug ang mga kadaot sinagulan sa panghinaot ug pagpahiuli. Sa makadaghang higayon ang among kasingkasing natandog dihang among nasaksihan ang makaayo nga tambal sa gugma sa atong Manluluwas.”
Agi og dugang, siya ang unang nakasaksi giunsa sa pagtabang sa Simbahan ang nanginahanglan: “Ang pagtubag sa kalamidad ug pagtabang nga mahimo ang pagtabang—usa kana ka pagpakita sa Simbahan ni Jesukristo sa pagbutang og tawo sa balaanong pinili nga responsibilidad sa pag-atiman sa mga kabus ug sa nanginahanglan.” Gihulagway niya kini nga usa ka sagradong pribilehiyo ang makapangalagad sa nanginahanglan ug mapakita sa uban nga mohimo sa ingon: “Among nakat-unan ang tawhanong kinaiya pagkamaayo.”
Ang Panulundon sa mga Bishop
Ang iyang panabut sa kamanggiloy-on mituhop nga mas lawom gayud diha sa iyang kasingkasing dihang pagka 2012 gitawag siya nga Presiding Bishop. Niana nga kapasidad gidumala niya ang lapad nga buluhaton sa Simbahan sa pagpahatud sa mga hinabang sa welfare ug sa mga emerhensya nga hinabang ngadto sa mga Santos sa Ulahing mga Adlaw ug sa uban, ingon man sa humanitarian nga hinabang sa mga anak sa Langitnong Amahan sa “pipila ka labihan kalisud nga mga dapit, pipila sa labihan kakabus nga mga dapit, ang uban nga gisakit nga mga dapit sa tibuok kalibutan.”3
Ang tahas sa bishop adunay dakong kahulugan para ni Elder Stevenson. “Sa 12 anyos pa ko, gitawag sa pagka-Bishop ang akong papa,” nahinumdom siya. “Ang ward dunay daghang biyuda, ug sagad kong dad-on ni Papa kon mangalagad siya kanila. Iyang ipaatiman nako ang mga basurahan, limpyuhan ang ubang butang sa balay, o patabangon ang uban nakong mga higala sa pagpundok sa mga dahon o pagpala sa snow. Inig biya namo, kanunayng nindot ang akong pagbati. Ang pagbisita sa mga biyuda nakapaamgo nako nga usa ka bahin sa buluhaton sa bishop mao ang tinagsa-tagsa nga pag-alagad sa mga tawo. Ang mga bishop sa Simbahan maoy akong mga bayani.”
Usa ka Saad gikan sa Propeta
Adlaw nga Martes sa wala pa ang Oktubre 2015 nga kinatibuk-ang komperensya, ang kaniadto Bishop Stevenson nakadawat og tawag nga naghangayo nga siya makigkita ni Presidente Thomas S. Monson ug sa iyang mga magtatambag.
“[Gihatag] ni Presidente Monson kanako ang tawag nga mahimong sakop sa Korum sa Napulog Duha. Gipangutana ko niya kon dawaton ba nako. … Mitubag ko nga ako miuyon. Ug dayon … mabination si Presidente Monson nga mitabang nako, gihulagway niya ang [higayon] dihang gitawag siya daghang tuig na ang milabay isip usa ka Apostol, … siya usab mibati og kakulang. Kalma siya nga mitudlo nako nga, ‘Bishop Stevenson, ang Ginoo mohimong kwalipikado niadtong kinsa Iyang gitawag.’ Kining makapahupay nga pulong sa propeta nahimong tinubdan sa kalinaw [sukad].”4
Si Elder Gary E. Stevenson tinuod nga tawo nga walay pagpanglimbong. Isip usa ka Apostol, sama sa gibuhat niya isip Presiding Bishop ug isip Seventy ug sa iyang gibuhat sa tibuok niyang kinabuhi, padayon siyang motabang sa mga kabus ug nanginahanglan. Sundon niya ang gisugo sa kasulatan nga “tabang sa maluyahon, ipataas ang mga kamot sa nawad-an og paglaum, ug lig-una ang mga tuhod nga mahuyang” (D&P 81:5). Usa kini ka mahagiton nga calling, apan haum kaayo siya niini gumikan sa iyang masinabuton nga kasingkasing.