Hangtud sa Sunod Natong Panagkita
Ang Unsa ug Ngano ug Unsaon sa Paghatag og usa ka Pagpamatuod
Gikan sa “President Kimball Speaks Out on Testimony,” New Era, Ago. 1981, 4–7; capitalization gi-standardize.
Kada higayon nga kamo mohatag sa inyong pagpamatuod mapalig-on kini.
Kada kalag niining kalibutana mahimong makabaton og usa ka pagpadayag, sama sa naangkon ni Pedro [tan-awa sa Mateo 16:13–17]. Kana nga pagpadayag mahimong usa ka pagpamatuod, usa ka kahibalo nga si Kristo buhi, nga si Jesukristo mao ang Manunubos niining kalibutan. Matag kalag mahimong makaangkon niini nga kasiguraduhan, ug sa higayon nga iya kining madawat nga pagpamatuod, kinin naggikan sa Dios ug dili gikan sa pagtuon lamang. Ang pagtuon mao ang usa ka importanting elemento, dayag lang, apan kinahanglan gayud nga inubanan sa pagtuon daghang pag-ampo ug pagkab-ot, ug dayon kining pagpadayag moabut. …
Ang mga miting sa pagpamatuod maoy pipila sa labing maayong mga miting sa ward sa tibuok bulan, kon anaa kaninyo ang Espiritu. Kon ikaw gilaayan atol sa usa ka miting sa pagpamatuod, adunay problema diha kanimo, ug dili sa ubang tawo. Mahimo kang mobarug ug mohatag sa imong pagpamatuod ug imong hunahunaon nga mao kini ang pinakanindot nga miting niining bulana; apan kon maglingkod ka diha ug mag-ihap sa mga sayop nga grammar ug mokatawa sa mga tawo nga dili makasulti og tarung, laayan gyud ka, ug sa katapusan laayan ka sa simbahan ug mopalayo sa gingharian. …
Matag bulan ang Unang Kapangulohan ug ang Napulog Duha magkatigum kauban ang tanang General Authority diha sa Templo. Magpaambit sila sa pagpamatuod ug mosulti sa usag usa kon unsa nila kamahal ang usagusa sama kaninyong tanan. Nganong ang mga General Authorities nagkinahanglan og miting sa pagpamatuod? Sa sama ra nga rason nga ikaw nagkinahanglan sa miting sa pagpamatuod. Sa imong hunahuna makalahutay ka ba ngadto sa tulo, ug unom, ug siyam ug dose ka bulan nga dili mopaambit sa imong pagpamatuod ug magpabilin gihapon kini sa hingpit nga bili?
Ang uban sa atong buotan nga mga tawo mahadlok sa pag subli-subli nga ilang ilikay ang pagsulti sa ilang pagpamatuod pinaagi sa paghisgut og laing butang nga walay labot sa ebanghelyo. Ayaw gayud kahasol kabahin sa kapuol sa pagpamatuod. Kon ang Presidente sa Simbahan magpaambit sa iyang pagpamatuod, siya moingon, “Nasayud ako nga si Joseph Smith gitawag sa Dios, usa ka balaan nga representante. Nasayud ko nga si Jesus mao ang Kristo, ang Anak sa buhi nga Dios.” Tan-awa, pareho ra nga butang ang gipanulti sa matag-usa kaninyo. Mao kana ang pagpamatuod. …
Ang pagpamatuod dili usa ka pagpanambag; ang pagpamatuod dili usa ka sermon (walay usa kaninyo nga anaa diha aron manambag sa uban); dili kini usa ka sugilanon sa biyahe. Anaa ka dinha aron ipaambit ang imong kaugalingong pagsaksi. Makapahingangha gayud kon unsay imong masulti sulod sa 60 ka segundos pinaagi sa pagpamatuod, o 120, o 240, o bisan pila ka oras ang ihatag kanimo, kon ikaw mohisgut lang gayud kabahin sa pagpamatuod. Gusto namong mahibaloan kon unsa ang imong gibati. Gihigugma ba nimo ang buhat, tinuod? Malipayon ka ba sa imong gibuhat? Gihigugma ba nimo ang Ginoo? Nalipay ka ba nga ikaw miyembro sa Simbahan?
… Ayaw paglingkod diha sa inyong miting panahon sa puasa ug linglahon ang imong kaugalingon ug moingon, “Siguro dili lang ko mopaambit sa akong pagpamatuod karon. Siguro dili kana makiangayon alang sa ubang mga miyembro tungod kay aduna na akoy daghan kaayo nga kahigayunan.” Ipaambit ang imong pagpamatuod. Ang usa ka minuto taas na kaayo alang sa paghimo niini.
Ikaw adunay pagpamatuod! Nagkinahanglan kini nga matukod ug mapataas ug mapadako; ug mao kana ang imong gibuhat. Kada higayon nga kamo mohatag sa inyong pagpamatuod mapalig-on kini.