Mga Pagpamalandong
Hooray!
Ang tagsulat nagpuyo sa Oregon, USA.
Usa ka kwatro-anyos nakatabang nako nga mapasalamatan ang sakrament sa usa ka bag-ong paagi.
Paghulagway pinaagi ni Carolyn Vibbert
Ang akong hunahuna nagtutok sa Manluluwas samtang ang kongregasyon mitapos sa pagkanta sa himno sa sakrament, apan sa akong pagsira sa hymnbook, ang musika mipadayon. Ang dakong kongregasyon nianang adlawa mihimo niini aron ang organista mopadayon sa pagtukar og duha pa ka mga bersikulo samtang ang mga priest mitiwas sa pagpikas-pikas sa pan. Mapasalamaton ko alang sa pakapin nga panahon. Nagtugot kini nako og dugang nga higayon sa balaang pagtahud nga mamalandong sa mga pag-ampo sa sakrament.
Atol sa mga pag-ampo, maampingon nakong gisunod ang mga pulong nga gilitok sa mga priest samtang sila mipanalangin sa mga timaan sa sakripisyo ni Kristo alang kanato. Sa pagtapos sa pag-ampo ug sa dihang ang kongregasyon militok sa ilang pagdawat, ang tingog sa kwatro-anyos nga batang lalaki gikan sa akong luyo nabati taliwala sa mga “pag-amen.”
“Hooray!” misinggit siya.
Ang iyang natural nga ekspresyon igo gayud ang kakusgon nga ming-agik-ik ang mga bata sa duol. Moangkon ko nga nakahatag kini kanako og pahiyum sa kahimuot.
“Hooray?” Naghunahuna ko. Talagsaon kana nga tubag sa mga pag-ampo sa sakrament. Sa pagkatinuod usa kadto ka tubag nga wala pa nako madungog sukad ug lagmit dili na nako madunggan pag-usab. Human sa tanan, among gitapos ang among mga pag-ampo sa “amen.”…
Tingali kadto nga gamayng bata nakamatngon og mas daghang kamatuoran labaw pa nako.
Hooray nagpahayag sa kalipay. Mao kini ang usa ka pagpahayag sa hingpit nga kalipay, kasagaran sa usa ka kadaugan. Usahay isinggit kini aron pagpakita og pag-uyon alang sa usa ka tawo nga maayong mihuman sa malisud nga tahas.1
Diha-diha dayon, ang akong hunahuna nakakuha sa ideya. Oo, naghunahuna ko, nga hooray nga si Jesukristo mibuntog sa kamatayon aron kita mabanhaw! Hooray nga tungod sa Iyang Pag-ula, makapasaylo Siya sa atong mga sala! Dugang nga punto, makapasaylo Siya nako sa akong mga sala! Hooray nga pinaagi niana ang Iyang grasya mahimo ko nga makabalik ngadto sa akong Langitnong Amahan ug matagamtaman ang paglaum sa kinabuhing dayon! Oo! Hooray!
Samtang ako misinggit niini nga mga pagdayeg sa hilum sa pasalamat sa akong Langitnong Amahan, ang Espiritu Santo milukop sa akong kasingkasing uban sa kalipay nga hapit ko makahilak. Natudloan ako nianang adlawa pinaagi sa usa ka gamay nga bata (tan-awa sa Isaias 11:6), ug nagmaya ako uban sa lab-as nga panan-awon tungod sa mga panalangin sa Pag-ula sa Manluluwas diha sa akong kinabuhi.