Mga Dumadapig sa Igpapahulay
Ang tagsulat nagpuyo sa Washington, USA.
Wala ko magtuo nga ang among pagpili sa pagbalaan sa adlaw nga Igpapahulay makaapekto sa daghan kaayong mga tawo.
Mga litrato sa maayong kabubut-on sa Women’s cougar rugby (BYU) ug Paul Meyers
Sa dihang ang akong rugby coach misulti sa among team nga ang among quarterfinal nga dula sa national championship tournament nakaiskedyul sa Dominggo, ang mahunahuna ra nako mao nga, “Nganong karon man?”
Ang akong team, ang 2010 Brigham Young University women’s rugby team, nangandam sa pagkakampyon sa tanang panahon. Nagpaabut mi nga modula sa team nga nakapilde namo sa torneyo sa miaging tuig. Masaligon ko nga makadaog mi—ania namo ang labing maayong mga magdudula sa nasud. Gusto namong ipamatuod sa among kaugalingon ngadto sa rugby world pinaagi sa pagdaog sa national championship, apan ang Langitnong Amahan dunay laing dalan alang namo.
Pagbarug sa Among mga Sumbanan
Ang mga opisyal sa torneyo misiguro namo nga ang among dula i-iskedyul sa Biyernes ug Sabado, apan tungod sa usa ka sayop, ang mga dula nabutang sa Sabado ug Dominggo. Wala mi makahibalo sa sayop hangtud lima na lang kaadlaw sa dili pa ang torneyo, nga gihimo sa Sanfold, Florida, USA. Tungod kay ang rugby sa mga babaye dili usa ka opisyal nga BYU team niadtong higayuna, dili kami ang modesisyon kon modula ba o dili. Mipili mi nga dili modula. Desisyon kadto sa tanan, ug walay usa nga mibagulbol.
Ang pagdula sa Dominggo dili gani opsyon. Alang nako, dili gayud kini opsyon. Ang akong mga ginikanan mitudlo nako sa pagbalaan sa adlaw nga Igpapahulay, ug gitahud nako kana nga sugo sa akong tibuok kinabuhi. Ang pagsunod sa mga sugo sa Langitnong Amahan mas importante kay sa pagdula og rugby.
Apan ang pagkahibalo nga gibuhat namo ang sakto nga butang wala makapasayon niini. Naguol mi samtang nagsakay mi og eroplano padulong sa Florida nga nakahibalo nga bisan modaog mi o dili, sa Sabado mao ang among katapusang dula.
Pag-abut sa Florida, nakadawat mi og tawag gikan sa reporter sa New York Times kinsa gusto nga mobalita sa among istorya. Nakalitan mi. Wala mi magdahum nga dunay magpakabana sa among pagpili sa pagtahud sa Igpapahulay, ilabi na sa nasyunal nga pamantalaan.
Sa pagka-Biyernes, sa oras nga modula unta kami kon ang iskedyul wala pa masayop, miadto mi sa Orlando Florida Temple aron mohimo og mga bunyag alang sa mga patay. Human mapahigayon namo ang mga ordinansa, ang presidente sa templo nakigsulti namo. Mikuha siya og artikulo nga gisulat kabahin namo ug mibasa sa pipila ka mga komentaryo sa mga magbabasa nga gibutang sa online nga nagsuporta sa among desisyon.
Unya ang among coach mibasa namo og dugang nga mga komentaryo nga iyang nadawat. Ang mga Santos sa Ulahing mga Adlaw ug ang uban mipasalamat namo sa among ehemplo ug misulti namo nga makapadasig nga makakita og mga tawo nga mibarug sa ilang mga sumbanan. Ang ilang mga pulong mibayaw sa among mga espiritu. Didto nakaamgo mi sa epekto nga among ikahatag bisan dili mahimong mga national champion.
Nasayud ko nga ang Langitnong Amahan nagtan-aw namo, apan wala gyud ko maghunahuna nga dunay lain nga nagtan-aw. Ang tubag sa among desisyon nakahatag namo og bag-ong katuyoan sa pag-adto sa Florida: wala mi moadto aron modaog, apan sa pagbarug sa among mga sumbanan.
Usa ka mas Maayo nga Dalan
Miabut ang Sabado, ug nakadaog mi sa among dula 46 sa 7. Pagkahuman miduol mi sa mga opisyales ug gisultihan sila nga pildi na mi sa dula nga nakaiskedyul sa Dominggo—nga batok unta sa team nga nakapapildi namo sa miaging tuig. Naguol ko nga ang among season natapos niining paagiha. Naglaum unta ko nga makadula niini nga team, apan dili ko gusto nga makigdula nila, o ni bisan kinsa, sa Igpapahulay.
Daghang mga artikulo ang gisulat mahitungod namo, ug nagpadayon kami sa pagdawat og mga sulat ug email sa pagsuporta. Pinaagi sa pagbarug sa among mga sumbanan, daghang mga tawo ang among naabut kay sa among maabut kon nakadaog pa kami sa championship.
Nakat-on ko sa pagsalig sa Langitnong Amahan sa paggiya nako ngadto sa mas maayo nga dalan kay sa anaa sa akong hunahuna alang sa akong kaugalingon. Ang akong team gusto nga mopamatuod sa among mga kaugalingon pinaagi sa pagkahimong mga kampyon, apan ako nakaamgo nga ang Langitnong Amahan gusto nga kami mohimo og laing punto sa hingpit. Migiya Siya namo sa oportunidad nga mahimong mga ehemplo sa dihang kami naghunahuna nga walay nagtan-aw, ug Siya nakahimo sa paggamit namo alang sa kaayohan tungod kay mipili kami sa pagsunod.