Unsaon nga Mahimong Maayong Higala

Ni David Morales

Ang tagsulat nagpuyo sa Santa Cruz, Bolivia.

Kitang tanan gustong mobati nga naapil. Aniay inyong mabuhat kon ikaw o laing tawo mibati nga walay labut.

Nagsugod ko sa pag-imbestigar sa Simbahan isip usa ka tin-edyer, apan mihunong ko sa pagtambong sa mga miting sa Dominggo tungod kay mibati ko nga walay labut sa kadaghanan sa kabatan-onan. Sa wala madugay, usa niadtong mga batan-on miimbitar nako sa usa ka kalihokan sa Simbahan. Akong gidawat ug nakagusto sa mga kalihokan tungod kay kini mao ang mga butang nga akong ganahan: pag-akting, pagdula og basketball, ug pagdagan.

Sa akong pagpadayon sa pagtambong sa mga kalihokan, nakaila ko sa mga batan-on ug nakahibalo nga kadaghanan kanila nag-eskwela sa akong eskwelahan. Paglabay sa panahon nakapalambo ko og panaghigalaay uban sa batan-ong mga lalaki ug batan-ong mga babaye kinsa aduna sa samang mga sumbanan nga akong gisunod. Nagpasalamat ko nga nga dunay miimbitar nako sa kalihokan sa Simbahan, ug mapasalamaton ko nga akong gidawat.

Mibati na ba kamo sama sa akong gibati: walay labut o morag wala ka mahiangay? O nakaila ba kamo og usa ka tawo kinsa wala mobati nga gidawat ug walay daghang mga higala? Bisan sa eskwelahan, sa simbahan, o sa ubang mga dapit, kadaghanan sa mga tawo mibati niana usahay sa ilang mga kinabuhi.

Unsaon sa Pagpangita og Maayong mga Higala

Sakit nga mobati nga walay labut, apan ang pagkasuko o pagdumot dili makatabang nimo nga mas monindot ang bation. Hinoon, sulayi ang pagbuhat niining mga butanga:

Apil sa mga kalihokan sa Simbahan. Maayo kini nga mga oportunidad nga malibutan ang imong kaugalingon sa mga tawo kinsa motahud sa imong mga sumbanan.
Pagkat-on ug pagpalambo og mga kahanas. Ang pag-apil og mga asosasyon sa studyante, mga sports team, o mga club maoy usa ka maayong paagi nga makaila og mga tawo kinsa dunay samang mga tinguha.
Ayaw kanunay paghulat sa ubang tawo nga mohangyo nimo nga makighigala. Ipaila ang imong kaugalingon ngadto sa uban.
Paningkamuti nga ikaw mao ang labing maayong tawo kutob sa mahimo ug ipadayon ang imong mga sumbanan. Makakita ka og mga higala kinsa motahud nimo sa imong kinaiya ug sa kahayag nga nagdan-ag nimo.
Paggahin og panahon uban sa imong pamilya. Makaamgo tingali ka nga ang pipila sa imong labing suod nga mga higala makita sa imong kaugalingong panimalay.

Unsaon Paglakip sa Uban

Usahay ingon og lisud ang pagbuhat sa butang nga dili kita komportable ug magmahigalon sa ubang mga tawo, apan kon kita mahinumdom nga kitang tanan mga anak sa Dios, makita nato ang kaimportante sa pagtabang sa uban. Ania ang pipila ka ideya:

Pakigsulti ngadto sa bag-ong mga tawo sa eskwelahan ug sa simbahan. Ipaila-ila sila sa imong mga higala.
Pag-imbitar og usa nga nagkinahanglan og higala ngadto sa eskwelahan o kalihokan sa Simbahan.
Hagita—uban sa kamabination ug pailub—ang mga tawo kinsa motuyo sa pagpabati sa uban nga dili welcome.
Lingkod tupad sa usa ka tawo kinsa nag-inusara o imbitara siya sa pagtupad nimo ug sa imong mga higala.
Pag-ampo sa Langitnong Amahan kon wala ikaw makahibalo unsaon sa pagtabang sa usa ka tawo. Nasayud gayud siya sa hingpit unsa ang gikinahanglan nianang tawhana aron magmalipayon ug makatabang nimo sa pagtanyag niana nga panabang.