Angay ba Gayud Kini?

Brandon Comstock, Utah, USA

Ang among kwatro anyos nga anak nga lalaki, si Coleton, mapagarbuhon nga mipakita sa usa ka papel nga gihatag diha niya sa iyang titser sa Primary nga nagdetalye sa iyang bahin sa umaabut nga programa sa Primary. Ang among trabaho mao ang pagtudlo niya sa iyang pito ka linya nga pulong sa dili pa ang programa ipasundayag sa mosunod nga duha ka semana.

Sa Lunes sa gabii among gihimong hingpit nga pagbansay ang gabii sa pamilya. Uban sa iyang pahiyum, si Coleton nagpraktis og kadaghang higayon, uban sa akong asawa ug ako nga naghatag og feedback sama sa, “Ayaw pagbinuang kon magsulti ka niini” ug “Klaroha gyud pagsulti.”

Bisan sa tanan namong paningkamot, bisan dili ko sigurado nga mas maayo pa mi kay sa among pagsugod.

Ang pag-andam alang sa pagsimba sa sunod Dominggo sa buntag naglakip sa nawagtang nga duha ka medyas, nagngipon nga walo ka bulan, ug usa ka naghilak nga kwatro anyos.

Sa dihang nagsugod na ang miting, hapit wala mi kahuman sa pambukas nga himno kaduha ko miadto sa hall uban sa naghilak nga bata. Sa dihang panahon na sa choir nga manindog sa pagkanta, hapit nako mawad-i sa paglaum nga bisan kinsa sa pamilya nga makabaton og kasinatian sa paglamdag ug naglaum hinoon nga makaabut mi hangtud mahuman ang miting.

Sa dihang nasulti na ang katapusan nga amen, nakapanghupaw ko nga nahuwasan. Sanglit samtang nagmaya ko sa kadaugan, dili nako kapugngan nga naghunahuna, “Angay ba gayud kini? Nakahimo ba kami og bisan gamayng kalamboan uban sa mga bata sa among pagdala nila sa simbahan kada semana?”

Ang mga pulong ni Elder David A. Bednar sa Korum sa Napulog Duha ka mga Apostoles misantop sa akong hunahuna: Miingon siya: “Sa mga panahon nga si Sister Bednar ug Ako mapungot tungod sa matarung nga mga kinaiya nga among gitrabaho og maayo ingon og walay diha diha nga espirituhanon nga resulta nga among gusto ug gilauman. …

“Si Sister Bednar ug ako naghunahuna sa pagtabang sa among anak nga mga lalaki nga masabtan ang sulod sa partikular nga leksyon o piho nga kasulatan nga mao ang katapusan nga sangputanan. Apan ang ingon nga resulta wala mahitabo sa matag higayon nga magtuon kami o mag-ampo o dungan nga magkat-on. Ang kamakanunayon sa among tumong ug buhat mao tingali ang kinadak-ang leksyon—usa ka leksyon nga wala kaayo namo mapasalamati sa hingpit nianang higayuna” (“Mas Makugihon ug Mabuhaton diha sa Panimalay,” Liahona, Nob. 2009, 19).

Uban sa gibag-o nga pasalig, mibalik ko sa balay ug mipadayon sa pagbansay og balik-balik uban sa akong anak nga lalaki. Sa dihang miabut na ang iyang higayon sa pagpamulong, naghinamhinam kami nga makadungog niya nga mamahayag nga klaro ug masaligon, “Si Jesukristo mao ang Anak sa Dios.”

Among nadunggan siya nga militok sa linya sa makadaghang higayon sa wala pa gihimo, apan adunay butang nga lahi ra nga nadunggan didto sa balay, sa kinaugalingon, nga lahi ra ug mas makatagbaw.

Daghan pa kami og itudlo nga buhaton sa among gamayng bata nga lalaki sa dili pa siya mahimong hamtong, apan buhaton namo ang labing maayo sa pagtambong sa among mga miting, pagpahigayon og family home evening, ug mag-ampo kada adlaw sa paglaum nga usa ka adlaw kon layo na siya sa panimalay ug nagkinaugalingon na, mahinumduman niya gayud pag-usab kanang importante kaayo nga linya: “Si Jesukristo mao ang Anak sa Dios.”