Toʻu Tupu

Ko hono Tauhi e Ngaahi Fekaú mo e ʻOfa ki he Niʻihi Kehé

ʻI heʻetau fakakaukau ki he ʻofá, ko e fuofua meʻa ʻoku tau faʻa fakakaukau ki aí ko e heleʻuhilá, sokoletí, mo e matalaʻiʻakaú. Ka ko e ʻofá—ʻofa moʻoní—ʻoku lahi pea taʻe-siokita ange ia ʻi he meʻa ko iá. Naʻe moʻui pea pekia ʻa Sīsū Kalaisi maʻatautolu koeʻuhí ko ʻEne ʻofa ʻiate kitautolú. Ko hono moʻoní, ko e ongo fekau lahi tahá ke ʻofa ki he ʻOtuá pea ʻofa ki he tokotaha kotoa pē (vakai, Mātiu 22:36–40). Ka te tau lava ʻo fakahaaʻi fēfē ki he niʻihi kehé ʻoku tau ʻofa ʻiate kinautolú?

ʻOku vahevahe ʻe Palesiteni ʻUkitofa ʻa e talanoa fakatātā ʻa Kalaisi ki he ongo fohá, ko e taha ʻoku ngāue ki heʻene tamaí pea ko e taha ʻoku ʻikai. Naʻe fakamahino ʻe he Fakamoʻuí ko e foha pē naʻe talangofua ki heʻene tamaí naʻe ʻofa moʻoni ʻiate iá. ʻI he founga tatau pē, ko e taimi ʻoku tau talangofua ai ki he ngaahi fekau ʻa e ʻOtuá, ʻoku tau fakahaaʻi ʻoku tau ʻofa kiate Ia pea fie foki hake kiate Ia.

Ka ʻoku tau fakahaaʻi fēfē ʻoku tau ʻofa ki he tokotaha kotoa pē? ʻOku fakamatalaʻi foki ia ʻe Palesiteni ʻUkitofa: “Kapau ʻoku tau ʻofa moʻoni ki hotau kāingá, te tau fāifeinga ke tokoniʻi ʻa e ʻkakai masivá mo e faingataʻaʻiá, pea mo e mahakí mo e tukuhāusiá.’ He ko kinautolu ʻoku fai ʻa e ngaahi ngāue taʻe-siokita ko ʻeni ʻo e manavaʻofá mo e ngāue tokoní, ko e kau ākonga kinautolu ʻa Sīsū Kalaisí.”

Ko ia ko e taimi pē te ke toe sio ai ki hoʻo mātuʻá, ki hao tokoua pe tuongaʻane, pe ko ha kaungāmeʻa, fakakaukau ke ke tokoniʻi kinautolu ke fakahaaʻi ange hoʻo ʻofa kiate kinautolú. He ʻikai ngata pē ʻi heʻene ngaohi koe mo kinautolu ke fiefiá, ka ʻe fiefia foki ai mo hoʻo Tamai ʻi Hēvaní.